Misambu 90 - MUKANDA WA MYIDI MUKULU

MUKANDA MUINAYI (Misambu 90—106 ) Muntu udi ufua, Mvidi Mukulu udi ushala

1 Moshe, muntu uvua Mvidi Mukulu mutume, udi utendelela Mvidi Mukulu.

¹ Moshe, muntu uvua Mvidi Mukulu mutume, udi utendelela Mvidi Mukulu. Maweja-Nangila, mu bikondu bionsu, wewe ke uvua tshisokomenu tshietu.

² Diambedi mikuna kayiyi mianji kuikalaku, diambedi buloba mene kabuyi buanji kufuka, ku kale kuonsu aku, wewe ke udi Mvidi Mukulu, newikale Mvidi Mukulu matuku onsu.

³ Udi upingaja bantu mu lupuishi, ubambila ne: “Pinganayi kunudi bafuma.”

⁴ Bidimu tshinunu bidi bipi ku mesu kuebe, bu dituku dia makelela didi dimane kupita, anyi bu meba makese a butuku.

⁵ Udi ushipa muoyi wa muntu, upita bu tshilota tshia mu dinda, bu tshisosa tshidi tshitoloka,

⁶ mu dinda tshiela nzeba, tshidiunda, dilolu tshifuba, tshiume.

⁷ Bulelela, tshiji tshiebe tshidi tshitushipa, njiya yebe idi itukuatshisha bowa.

⁸ Wewe udi muleje malu etu mabi patoke, butoke buebe budi bukenkesha malu etu masokome.

⁹ Matuku etu a panu adi ajika, bualu adi ashikila amu patshidi muntu ukuula muoyi.

¹⁰ Bantu ba dikanda badi mua kulala panu bidimu makumi muanda mutekete, anyi makumi muanda mukulu, kadi mu bungi bua bidimu abi, tudi ne ntatu ne makenga. Tudi tuya lukasa batangila ku lufu.

¹¹ Udi mumanye bukole bua tshiji tshiebe nnganyi? Nganyi watshina kapia ka dibinduluka diabe?

¹² Utunwuije ne matuku etu adi mabala. Nanku netupete meji.

¹³ Maweja-Nangila neutulondakaje musangu bule munyi? Tangila kutudi, utufuile luse, tuetu bena mudimu bebe.

¹⁴ Utuwuje ne malu ebe mimpe, patshidi butuku butshia, nenku netuele mbila ya disanka matuku onsu.

¹⁵ Udi mutukengeshe musangu mule. Kadi mpindiewu, utupeshe masanka, mu bungi bua bidimu bituvua bakenge.

¹⁶ Tumone mudimu webe, ndelanganyi yetu imone bunene buebe!

¹⁷ Maweja-Nangila, Mvidi Mukulu wetu, utuleje muudi umvuangana netu, ufile bipeta bimpe ku midimu yetu.