Misambu 85 - MUKANDA WA MYIDI MUKULU

Maweja-Nangila udi wakula bua ditalala

1 Musambu wa mu mukanda wa mulombodi wa bena misambu. Wa mu mukanda wa misambu wa bena Kora .

¹ Musambu wa mu mukanda wa mulombodi wa bena misambu. Wa mu mukanda wa misambu wa bena Kora.

² Maweja-Nangila udi mutokele ditunga diebe munda, udi mukudimune nsombelu ya ndelanganyi ya Yakobe.

³ Udi mukupule tshilema tshia bantu bebe, mubabuikidile malu mabi abu.

⁴ Udi mulekele tshiji tshiebe, kuena musue kubafikila munda.

⁵ Eyi, Mvidi Mukulu musungidi wetu, mulengeje tshiakabidi, lekela kutufikila munda.

⁶ Neutukuatshile tshiji matuku onsu anyi? Neufikile ndelanganyi yonsu munda anyi?

⁷ Utupeshe muoyi tshiakabidi, bua tuetu bantu bebe tusanke bualu buebe.

⁸ Maweja-Nangila, utuleje buimpe buebe, utuambuluishe.

⁹ Ndi musue kuteleja tshidi Mvidi Mukulu wamba. Maweja-Nangila udi wamba bua ditalala, dia bantu bende, badi bamulamate, ne badi batekemena kudiye.

¹⁰ Bulelela, diambuluisha diende didi pa buipi ne badi bamutshina, butumbi buende nebushale mu ditunga dietu.

¹¹ Malu mimpe ne bulelela nebisangile, buakane ne ditalala nebiupukilangane.

¹² Bulelela nebufumine mu buloba, kadi buakane nebufumine mu diulu.

¹³ Maweja-Nangila ke udi upesha bantu masanka, ne ditunga dietu nedipatule bintu biadi.

¹⁴ Buakane budi buenda kumpala kua Maweja-Nangila, nebumuleje njila wa kuenda.