Misambu 84 - MUKANDA WA MYIDI MUKULU

Musambu wa difika dia bena ngendu mu Yerushalayime

¹ Musambu wa mu mukanda wa mulombodi wa bena misambu. Wa mu mikanda wa misambu wa bena Kora. Wa kuimba ne lunkombe lua Ngate.

² Maweja-Nangila wa bukole buonsu, ndi munange nzubu webe bikole!

³ Muoyi udi undubakana munda, pandi ngindila bua kubuela mu lubanza lua nzubu wa Mvidi Mukulu. Mubidi wanyi mujima udi wela mbila ya disanka, kudi Mvidi Mukulu wa muoyi.

⁴ Nansha mushamusha mmupete muaba wa kuikishila, ne kandindi nkapete disua bua kuteka bana baku, pabuipi ne bilambuilu biebe wewe Maweja-Nangila, wa bukole bonsu, mukalenga wanyi ne Mvidi Mukulu wanyi.

⁵ Diakalenga ndia badi basomba mu nzubu muebe, bakutumbisha amu kukutumbisha diba dionsu.

⁶ Ba diakalenga mbantu badi bapeta tshisokomenu kuudi, badi ne disanka dia luendu mu muoyi wabu.

⁷ Padibu bapitshila mu tshibandabanda tshiume, Mvidi Mukulu udi utshikudimuna, utshienza muaba mutalale wa mayi, nansha mvula mbedi udi utshibuikila ne majiba.

⁸ Badi bapeta bukole padibu baya, bua umueneka kumpala kua Mvidi Mukulu mu Siyone.

⁹ Maweja-Nangila Mvidi Mukulu wa bukole buonsu, umvua kutendelela kuanyi, Mvidi Mukulu wa Yakobe, unteleje.

¹⁰ Eyi, Mvidi Mukulu, mukalenga wetu ne ngabu wetu, akidila muntu webe uudi mujidile.

¹¹ Bualu kusomba dituku dimue mu lubanza lua nzubu webe wa kutendelela, nkupite kusomba matuku tshinunu munga muaba. Mvidi Mukulu wanyi, kuimana kumbelu kua nzubu webe, nkupite kusomba mu ntenta ya bantu babi.

¹² Bualu Maweja-Nangila, udi Diba ne Ngabu. Tudi tumanyisha Mvidi Mukulu bua luse ne butumbi; Maweja-Nangila udi upesha bantu bakane masanka.

¹³ Maweja-Nangila wa bukole buonsu, muntu udi unyemena kuudi udi ne disanka!