Misambu 68 - MUKANDA WA MYIDI MUKULU

Mvidi Mukulu udi utshimuna

¹ Musambu wa mu mukanda wa mulombodi wa bena misambu. Musambu wa mu mukanda wa misambuya Davide.

² Padi Mvidi Mukulu ujuka, uya ku mvita, baluishi bende badi batangalaka, bena lukuna bende badi bamunyema lubilu.

³ Udi ubatangalaja, bu mudi muinshi utangalaka, ujimina. Padiye umueneka, baluishi bende badi bateketa mu maboku, bu mudi manyi enguluka ku kapia.

⁴ Kadi bantu ba Mvidi Mukulu nebamutumbishe, Nebasanke batue tshianga!

⁵ Imbilayi Mvidi Mukulu misambu, nutumbishe dina diende. Nuakidile udi wendakana pa mavuba. Dina diende mMaweja-Nangila. Nutue tshianga, numusamune.

⁶ Mvidi Mukulu udi usomba mu nzubu wende wa tshijila. Udi Tatu wa bana ba nshiya, ulumbuluila bakamba.

⁷ Udi kayi ne babu, Mvidi Mukulu udi umupa nzubu. Badi mu lukanu udi ubapatula, bapete diakalenga, benze mudibu basue. Kadi bantomboji nebasombe mu buloba buume.

⁸ Mvidi Mukulu, pauvua uya kumpala kua bantu bebe, mudianjidile mu tshipela,

⁹ buloba kuzakala, mvula kuloka bikole, bionsu bikutshina wewe, Mvidi Mukulu wa Sinayi, bitshina Mvidi Mukulu wa Izrayele.

¹⁰ Wewe kulokesha mvula wa bungi, buloba buume kutota.

¹¹ Ke muaba uvua bantu bebe baya kusomba, muaba uuvua mulongoluele bapele, bualu uvua ubananga.

¹² Maweja-Nangila udi wamba amu muaku umue. Bakaji kabayi kubala badi baya kuambila bantu ne:

¹³ “Tuatshimunyi! Bakalenga ba baluishi betu mbanyeme lubilu! Tuetu bakaji bavua bashala ku nzubu, netuabanyangane bidi babayetu bapawula mu mvita.

¹⁴ Mapuapua a nyunyi ya nkudimba avua akenka bu malamika tshiamu tshitoke tshia mushinga mukole, masala ayi akenka bu malamika mpawungi muimpe! — Kadi nudi nushala nuenu mu lupangu bua tshinyi? —

¹⁵ Pavua Mvidi Mukulu wa bukole buonsu wipata bakalenga, mabua a mvula kuloka pa mukuna wa Salmone.”

¹⁶ Mukuna wa Bashane nngua tshijila, mukuna wa Bashane udi ne nsongu ya bungi.

¹⁷ Kadi wewe mukuna udi ne nsongu mivule, udi ubaba mukuna udi Mvidi Mukulu musue kusomba, mukuna udi Maweja-Nangila muase, bua tshinyi?

¹⁸ Mvidi Mukulu udi ne matempu a mvita binunu ne binunu. Maweja-Nangila mmufume nawu ku mukuna wa Sinayi, uya ku muaba wende wa tshijila.

¹⁹ Udi ubanda pa mukuna wa Siyone ne bena mvita bavuaye mukuate. Bantu ne bavua bamutombokela, kumulambula milambu! Maweja-Nangila nease pa mukuna wa Siyone kashidi.

²⁰ Tuelayi Maweja-Nangila tuasakidila ku dituku ku dituku, bualu Mvidi Mukulu udi wambula bujitu buetu, utusungidila.

²¹ Yeye ke Mvidi Mukulu udi utupandisha, ke Maweja-Nangila udi ne bukole bua kutusungidila ku lufu.

²² Kadi Mvidi Mukulu neabose mitu mikale ne nsuki mile ya baluishi bende, neazaze tubalubalu tua mitu ya benji ba bibi.

²³ Maweja-Nangila uvua muambe ne: “Bantu banyi, nansha nuenu bikale kulu ku mikuna ya Bashane, nansha muinshi mua mayi manene, nennupatulemu, nnupingaje kuenu.

²⁴ Nenudiate mu mashi a baluishi benu, mbua yenu neisunsule bitalu bia bena lukuna benu.”

²⁵ Mvidi Mukulu, tuetu kumona bantu bebe batue milongu, benda luendu lua mazengu mu nzubu webe wa tshijila. Eyi! Mvidi Mukulu wanyi, Mukalenga wanyi!

²⁶ Bena misambu bafilele kumpala, bansongakaji pankatshi, bimbe tutumbi, bena bisanji ku ndekelu.

²⁷ Nuenu bonsu, ndelanganyi ya Yakobe, sangilayi mu bibilu, nutumbishe Maweja-Nangila, nuele Mvidi Mukulu tuasakidila.

²⁸ Bena tshisamba tshia Binyamine wa mukala bafilele kumpala, pashishe bamfumu ba bena Yuda ne bilamba biabu bilengeja bimpe, bamfumu ba Zebulone ne ba Naftali ku ndekelu.

²⁹ Mvidi Mukulu wanyi, leja bukole buebe. buuvua mutuenzele nabu malu a dikema!

³⁰ Mu Yerushalayime, mu nzubu webe wa tshijila, bakalenga badi bakulambula milambu.

³¹ Kanyina bena Ejipitu, nyama ya mu mayi eyi. Tandisha bakalenga ba matunga, balume ba ngombe aba. Bakuambule nkanu yabu ya tshiamu tshitoke tshia mushinga mukole. Tangalaja bisamba bidi binanga mvita.

³² Bamienampala ba mukalenga wa bena Ejipitu nebafike. Bena Kushe nebatendelele Mvidi Mukulu, bamutuadile milambu yabu.

³³ Nuenu bakalenga ba pa buloba, imbilayi Mvidi Mukulu misambu, tumbishayi Maweja-Nangila.

³⁴ Udi wendakana mu diulu, mu diulu dia kashidi, ukungula ne diyi dikole.

³⁵ Ambilayi bantu bonsu ne: Mvidi Mukulu udi ne bukole, udi Mukalenga munene mu Izrayele, butumbi buende mbutue mulu, mbutue panshi!

³⁶ Padi Mvidi Mukulu upatuka mu nzubu wende wa tshijila, bowa budi bukuata bantu. Mvidi Mukulu wa Izrayele udi upesha bantu bende bukole ne bumfumu. Mvidi Mukulu wetu, tuasakidila!