Misambu 66 - MUKANDA WA MYIDI MUKULU

Tumbishayi Mvidi Mukulu

1 Musambu wa mu mukanda wa mulombodi wa bena misambu.

¹ Musambu wa mu mukanda wa mulombodi wa bena misambu. Bantu bonsu ba pa buloba, kokuelayi Mvidi Mukulu.

² Nutumbishe dina diende dia butumbi, nudisamune ne misambu.

³ Nuambile Mvidi Mukulu ne: “Biudi muenze mbia dikema! Baluishi bebe badi badiela panshi ne bowa, bualu bukole buebe mbupite!

⁴ Maweja-Nangila, bantu bonsu ba pa buloba, bakukukuile, bakuimbile misambu, bakutumbishe!”

⁵ Vuayi numone mudi Mvidi Mukulu muenze. Bidiye muenzele bantu bidi bikemesha.

⁶ Uvua mupandile bantu njila mu mayi manene. Bantu kusabuka musulu ku makasa. Tusanke, tukatshile malu ende a dikema.

⁷ Udi ushala mukalenga kashidi, ukokesha buloba. Udi ukenketa bisamba bionsu ne ende abidi: Bantomboji, kanuditambishi to!

⁸ Bisamba bionsu, elayi Mvidi Mukulu tuasakidila, numutumbishe ne diyi dikole.

⁹ Yeye ke udi utulama ne muoyi. Kavua musue bua tubutuke.

¹⁰ Mvidi Mukulu wetu, udi mututete, mutulengeje, mudibu bengulula tshiamu tshia mushinga mukole mu kapia.

¹¹ Udi mutusakile mu buteyi, mututeke bujitu bupite pa makaya.

¹² Uvua muanyishe bua baluishi betu batudiate mu mutu ne nyama ya tubalu. Tuvua ne bua kupitshila mu kapia ne mu mayi. Kadi wewe kutupatulamu bua tuikishe.

¹³ Ndi mbuela mu nzubu webe mukutuadile milambu ya kuosha, bua kukumbaja malaya amvua mukulaye.

¹⁴ Ke imvua mulaye, pamvua mu dikenga dinene.

¹⁵ Ndi nkulambula nyama ya manyi ya kuosha, bimpanga, mpumbu, ne ngombe milume mene. Muinshi wayi neubande kulu ku tshilambuilu, ukusankishe.

¹⁶ Nuenu bonsu, bantu ba Mvidi Mukulu, vuayi nunteleje, nennuambile bidiye mungenzele.

¹⁷ Mvua mumubikile bua angambuluishe, meme kumuelelamu tuasakidila.

¹⁸ Bu meme ne meji mabi munda, Mvidi Mukulu kavua mua kunteleja to.

¹⁹ Kadi Mvidi Mukulu mmunteleje, mmuitabe ditendelela dianyi.

²⁰ Tuelayi Mvidi Mukulu tuasakidila! Kena mubenge dimusengelela dianyi, bualu udi munnange kashidi.