Misambu 62 - MUKANDA WA MYIDI MUKULU

Kudi Mvidi Mukulu ke kundi mpeta dikisha

¹ Musambu wa mu mukanda wa mulombodi wa bena misambu. Wa kuimba bu Yedutune. Musambu wa mu mukanda wa misambu ya Davide.

² Kudi Mvidi Mukulu ke kundi mpeta dikisha, kudiye ke kundi ntekemena lupandu.

³ Yeye nkayende ke lubuebue luanyi, muaba mukole undi mua kusokomena. Tshiena ntshina tshintu to.

⁴ — Bonsu pamue nenuluishe muntu nkaya too ne ku diba kaayi? Nudi nukeba kunshipa bua tshinyi? Ndi amu bu tshimana tshibendame, bu lupangu lukeba kupuka.

⁵ Nudi amu ne meji mabi a kunyenga muanzu wanyi. Ke panudi nunshiminyina malu. Nudi betu ku mesu, mundamunda batuamba munga.

⁶ Kudi Mvidi Mukulu ke kundi mpeta dikisha, kudiye ke kundi ntekemena.

⁷ Yeye nkayende ke lubuebue luanyi, muaba mukole undi mua kusokomena. Tshiena ntshina tshintu to.

⁸ Mvidi Mukulu neampandishe. Neampingajile lumu. Yeye ke lubuebue luanyi, muaba undi mua kusokomena.

⁹ — Nuenu bonsu, bantu ba Mvidi Mukulu, tekemenayi amu kudiye. Numupuile ntatu yenu. Yeye ke muaba utudi mua kunyemena.

¹⁰ Bantu badi bu lupepele, bantu tshiabu ndishima. Bobu babande pa tshipimu bonsu pamue, kabena ne bujitu.

¹¹ — Kukebi buneme ku tshinyangu, kutekemenyi makasa ku buivi. Nansha bubanji buebe buvulangane, kutekiku muoyi.

¹² Misangu mivule nkadi mumvue diyi dia Mvidi Mukulu, diamba ne: “Bukole buonsu budi amu kundi.”

¹³ — Kadi Maweja-Nangila, wewe udi kabidi muena dinanga, udi ufuta muntu yonsu bilondeshile malu avuaye muenze.