Misambu 59 - MUKANDA WA MYIDI MUKULU

Mvidi Mukulu wanyi, unsungidile kudi baluishi banyi

1 Musambu wa mu mukanda wa mulombodi wa bena misambu. Wa kuimba ne meyi a musambu wa “Kunyangi…”. Kasala ka mu mukanda wa misambu ya Davide. Uvua muusake pavua Shawule mutume bantu bua kumukuata muende, kumushipa .

¹ Musambu wa mu mukanda wa mulombodi wa bena misambu. Wa kuimba ne meyi a musambu wa “Kunyangi…”. Kasala ka mu mukanda wa misambu ya Davide. Uvua muusake pavua Shawule mutume bantu bua kumukuata muende, kumushipa.

² Mvidi Mukulu wanyi, unsungidile kudi baluishi banyi, ungepule kudi badi bankina.

³ Ungumushe mu bianza bia badi bankebela diakabi, unsungidile kudi bashipianganyi aba.

⁴ Bena tshikisu badi bangalamina, bakeba kunshipa. Kadi meme tshiena muenze bualu bubi. Maweja-Nangila, tshiena mukutombokele.

⁵ Badi bafike lubilu bua kunduisha, nansha meme tshiyi muenze bibi. Maweja-Nangila, tabuluka vuakunu, tangila bidibu bangenzela.

⁶ Maweja-Nangila, Mvidi Mukulu wa bukole buonsu, Mvidi Mukulu wa Izrayele, juka ku tulu, unyoke bantu babi aba. Bena tshibawu aba, kubafuidi luse to.

⁷ Badi bapingana dilolu mu tshisumbu, banyunguluka tshimenga tshijima, bela mikunda bu mbua.

⁸ Mukana muabu mudi muwule tente ne miaku mibi. Bidibu bamba bidi bu muela wa nkanza. Badi bela meji ne: muntu nansha umue kena mua kutumvua.

⁹ Kadi wewe, Maweja-Nangila, udi ubumvua, ubaseka, upepeja bonsu badi bakutombokela aba.

¹⁰ Ndi ntekemena kuudi, bualu wewe udi undama. Mvidi Mukulu, Wewe udi nzubu mukole undi nsokomena.

¹¹ Mvidi Mukulu wanyi udi unnanga. Ke mudiye ungambuluisha, undeja mudi baluishi banyi babutuka bonsu.

¹² Kadi kubabutudi musangu umue nansha. Tshianana, bena tshisamba tshianyi badi mua kupua muoyi biudi mungenzele. Tangalaja bantu babi ku bukole buebe, ubafine! Maweja-Nangila, wewe udi ngabu wetu.

¹³ Bionsu bidibu bamba bidi amu bibi. Ditambisha diabu nedibakuatshishe mu buteyi, bualu badi belangana milawu, bashimangana.

¹⁴ Tshiji tshiebe tshibabutule, tshibajimije, kakushadi nansha muntu. Nanku pa buloba bujima bantu nebamanye ne: mu Izrayele mudi Mvidi Mukulu, Mukalenga wa bukole buonsu.

¹⁵ Badi bapingana dilolu tshisumbu, banyunguluka tshimenga tshijima, bela mikunda bu mbua.

¹⁶ Badi bakenguluka, bakeba biakudia. Kabayi babipeta bikumbane, badi babinduluka.

¹⁷ Kadi meme ndi nkutumbisha, bualu udi ne bukole. Dinda ndi nkuimbila, bualu udi utunanga. Udi nzubu mukole undi mua kusokomena, muaba undi mua kubutama diba dia dikenga.

¹⁸ Ndi nkuimbila misambu, nkutumbisha, bualu wewe udi umpesha bukole. Mvidi Mukulu wanyi, wewe udi muaba undi mua kusokomena, bualu wewe udi upita kunnanga.