Misambu 50 - MUKANDA WA MYIDI MUKULU

Mutudi mua kutendelela

1 Musambu wa mu mukanda wa misambu ya Asafe .

¹ Musambu wa mu mukanda wa misambu ya Asafe. Mvidi Mukulu, Mvidi Mukulu Maweja-Nangila uvua muakule, muele lubila pa buloba. Kumvuikalu kudi diba dibanda ne kudidi dibuelela.

² Mvidi Mukulu udi umueneka, bamunyungulule kudi bukenke, mu Siyone, tshimenga tshipite buimpe.

³ “Mvidi Mukulu wetu afike! Alekele kupuwa!” Kapia kanene kadi kamudianjidila, lupepele lua mvunde lumuela munkatshi.

⁴ Mvidi Mukulu udi ubikila diulu ne buloba, bua bijadike mudiye ulumbuluisha bantu bende.

⁵ Udi wamba ne: “Nsangishilayi bena dianyi, bamvua mutue nabu ndondu, balaye mua kuntumikila, bajadike tshiovu ne milambu.”

⁶ Diulu didi mua kujadika ne: “Maweja-Nangila mmukumbaje bivuaye mulaye. Padiye ulumbuluisha bantu, udi wenza pa bualu.”

⁷ — Tshisamba tshianyi, teleja, ndi nkuambila bualu. Izrayele, meme Mvidi Mukulu, Mvidi Mukulu webe, ndi nkufunda ku tshilumbu.

⁸ Tshiena nkudiwila bua milambu yebe nansha, bualu utu uyindambula matuku onsu.

⁹ Tshiena bualu ne ngombe milume ya mu tshikumbi tshiebe, nansha mpumbu ya mu mpangu yebe.

¹⁰ Bualu nyama ya ditu yonsu nyanyi meme, kabidi ne nyama ya mu mikuna binunu ne binunu.

¹¹ Ndi mumanye nyunyi yonsu ya mulu. Nyama yonsu ya mu tshisuku idi yanyi.

¹² Meme ne nzala, tshiena mua kukulomba tshintu, bualu buloba bujima ne bidipu mbianyi meme.

¹³ Ntu ndia munyinyi wa ngombe anyi? Ntu nnua mashi a mpumbu anyi?

¹⁴ Tshindi ntekemena kuudi, ki mbiakudia nansha, kadi amu bua untumbishe, meme Mvidi Mukulu webe, ne bua ukumbaje malaya auvua mundaye meme, Muena kulu.

¹⁵ Pakukuata dikenga, umbikile nenkusungidile. Nenku neuntumbishe!

¹⁶ Kadi muntu mubi, Mvidi Mukulu udi umuebeja ne: — Muudi utela mikenji yanyi mbishi? Muudi ukimina kuakula bua tshiovu tshianyi mmunyi?

¹⁷ Kuena muanyishe mibelu yanyi. Udi ubenga bindi ngamba.

¹⁸ Udi umvuangana ne muivi yonsu uudi umona, udia bulunda ne badi banyanga mbanza ya bende.

¹⁹ Mukana muebe muwule tente ne bijanu, ludimi luebe lutumpilangana malu.

²⁰ Udi ufunda muanenu ku tshilumbu, unyanga lumu lua muana wa mamuebe.

²¹ Wamonyi biudi muenze! Udi musue bua ngikale amu mupuwe anyi? Udi muele meji ne: ndi bu wewe anyi? Nansha kakese! Ndi ukutandisha, nkuleja mibi yebe yonsu patoke!

²² Nuenu nukadi bampue muoyi! Kadi telejayi bimpe bindi nnuambila. Tshianana nennusunsule bu ntambue, muntu kayi mua kunkandika!

²³ Muntu udi ungela tuasakidila, ke udi untumbisha! Udi untumikila, ke undi mpandisha!