Misambu 49 - MUKANDA WA MYIDI MUKULU

Bia panu mbia mushiya wa mushiya

1 Musambu wa mu mukanda wa mulombodi wa bena misambu. Musambu wa mu mukanda wa misambu wa bena Kora .

¹ Musambu wa mu mukanda wa mulombodi wa bena misambu. Musambu wa mu mukanda wa misambu wa bena Kora.

² Bisamba bionsu telejayi! Bonsu badi basombe pa buloba, teyayi matshi!

³ Ndi nnubela bonsu, badi ne mianzu, ne badi kabayi nayi, bena kantu ku bianza, ne badi patupu.

⁴ Ndi nnulongesha miaku ya meji, nnumanyishe malu a lungenyi.

⁵ Mvua mualonge kudi bena meji. Mpindiewu ndi nnumvuijawu pa kuimba mu lunzenze.

⁶ Padi makenga makole mankuate, bena mutshima bangela munkatshi, bankengesha, nempampakene tshinyi?

⁷ Badi batekemena amu ku mpetu yabu, baditemba bua bubanji budibu nabu.

⁸ Kadi kakuena udi mua kupikula muoyi wa muntu mukuabu, nansha kudipikula wende yeye mene kudi Mvidi Mukulu.

⁹ Mushinga wa muoyi wa muntu mmupite. Bidiye mua kufuta kabiena mua kukumbana nansha kakese.

¹⁰ Muntu udi mua kulala panu kashidi anyi? Neasokome lufu bua kamonu lukita anyi?

¹¹ Tudi tumona mudi bena meji bafua, mudi bapela ne batshimbakane bashiya buloba. Bonsu mbashile bantu bakuabu bintu biabu!

¹² Nansha binyike maloba mena abu, nkita ke yabu nzubu ya kashidi, muaba udibu balala tshiendelele.

¹³ Bualu muntu, nansha yeye ne bintu bia bungi, kena ushala kashidi pa buloba. Neabutuke amu bu nyama.

¹⁴ Umvuayi bidi bienzekela bantu badi baditekemena. Monayi kuaya bonsu badi baditemba.

¹⁵ Badi babasaka bu mikoku, baya nabu mu kandondu ka bafue. Lufu ke mulami wabu. Mibidi yabu idi yenda ijimina. Ku bajangi ke kudi nzubu wabu. Bantu ba muoyi muimpe nebatshimune.

¹⁶ Mvidi Mukulu neansungidile; neampatule mu kandondu ka bafue.

¹⁷ Kupampakanyi padi muntu unema, nansha bubanji buende bupite kuvulangana.

¹⁸ Pafuaye, kena uya ne tshintu. Bubanji buende kabuena bumulonda mu lukita.

¹⁹ Nansha muntu udiamba muena diakalenga patshidiye ne muoyi, udiela kalumbandi, bualu malu ende onsu adi enda amu bimpe,

²⁰ kadi neafue, neaye kumonangana ne bankambua bende, badi bashala mu miidima kashidi.

²¹ Bualu, muntu nansha yeye ne bintu bia bungi, kena ushala kashidi pa buloba. Neabutuke amu bu nyama.