Misambu 37 - MUKANDA WA MYIDI MUKULU

Lekela lubabu

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Lekela kubaba bantu babi, kutekedi badi benza bibi lubabu.

² Bualu nebafube lukasa bu bisoosa, nebuume bu biseki.

³ Tekemena kudi Maweja-Nangila, enza bimpe, neushale mu ditunga, usombemu talalaa.

⁴ Disanka diebe dikale amu kudi Maweja-Nangila. Nanku neakupeshe bionsu biudi umulomba.

⁵ Udifile kudi Maweja-Nangila, utekemene kudiye, kakukufuisha bundu.

⁶ Neakulumbuluile, akubingishe. Neutoke bu munya wa mu dinda, neukenke bu diba munda munya.

⁷ Shala talalaa kumpala kua Maweja-Nangila, indila ne lutulu tshiavuaye kuenza. Kubabi badi bapeta diakalenga, badi bakumbaja meji abu mabi.

⁸ Kufiki munda, kubinduluki, kubabi badi benza bibi, bualu bidi mua kukulamata!

⁹ Benji ba bibi nebabutuke. Kadi badi batekemena kudi Maweja-Nangila, nebapete ditunga.

¹⁰ Katupa kakese, bantu babi nebajimine. Neukebe muaba uvuabu bapitshila, kuyi upeta nansha tshifundu tshia dikasa diabu.

¹¹ Kadi bakengi nebapete ditunga. Nebasombemu ne disanka divule.

¹² Muntu mubi udi ukina muntu muakane, usumakaja dinu bua kumuenzela bibi.

¹³ Kadi Maweja-Nangila udi useka muntu awu, bualu mmumanye ne: dituku dia kumunyoka nedifike!

¹⁴ Bantu babi badi batula muela, banana buta, bua kutapa mupela ne muena dikenga, bua kushipa badi balonda njila mululame.

¹⁵ Kadi muela wabu neubatubule muoyi, buta buabu nebutshibuke.

¹⁶ Bikese bidi kudi muntu wa Mvidi Mukulu, mbipite mpetu mivule ya muntu udi umubenga.

¹⁷ Bualu bumfumu bua muena bubi nebunyanguke, kadi bantu bende Maweja-Nangila udi ubashindika.

¹⁸ Maweja-Nangila udi ukuba diba dionsu badi benza tshidiye musue. Ditunga didibu bapeta kudiye, nebashale nadi kashidi.

¹⁹ Bantu abu kabakufua bundu diba dia dikenga. Mu bikondu bia nzala nebapete bonsu bidibu nabi dijinga.

²⁰ Eyowa, bantu babi nebabutuke, bakinyi ba Maweja-Nangila nebuume lukasa bu bilongu mu mpata, nebajimine, nebajimine lubilu bu muinshi wa kapia.

²¹ Muntu mubi udi usomba tshintu, kayi utshipingaja. Kadi muntu muakane udi ne luse, wambuluisha bakuabu.

²² Badi Mvidi Mukulu wela lupemba, nebapete ditunga. Badiye utshipa, nebabutuke.

²³ Maweja-Nangila udi wambuluisha muntu udi umusankisha. Neamuludike mu njila, amushindike.

²⁴ Muntu awu, nansha yeye udishinda, kena ushala panshi, Maweja-Nangila udi umukuata ku tshianza, umujula.

²⁵ Katshia bandela ne mundi mukulakaje emu, tshiena muanji kumona Maweja-Nangila ushiya muntu wende mu dikenga, nansha bana bende balombangana tshiakudia mu misesu.

²⁶ Matuku onsu muntu awu udi ufuila bantu luse, ubambuluisha. Bana bende badi ne muabi.

²⁷ Paudi ubenga bubi, wenza biakane, neushale kashidi mu ditunga.

²⁸ Bualu Maweja-Nangila kena ulekela bantu bende, mmusue ne: bonsu benzelangane bimpe. Benji ba bibi nebabutuke kashidi, ndelanganyi yabu neijimine.

²⁹ Kabidi bantu bakane nebapete ditunga, basombemu tshiendelelele.

³⁰ Muntu wa Mvidi Mukulu udi wakula miaku ya meji, umvuija bantu bidi Maweja-Nangila musue.

³¹ Bualu udi wenda ne mikenji ya Mvidi Mukulu mu muoyi wende, uyikumbaja.

³² Muntu mubi udi utentekela muntu wa Mvidi Mukulu, ukeba kumushipesha.

³³ Kadi Maweja-Nangila kena ulekela muntu wende mu bianza bia muntu mubi. Yeye ku tshilumbu, Maweja-Nangila kena musue bua bamupishe to.

³⁴ Tekemena kudi Maweja-Nangila, ulame lutulu, ukumbaje mikenji yende. Neakuzangike, upete ditunga. Neumone mudiye ubutula bantu babi.

³⁵ Meme kumona muena tshinyangu ukengesha bantu, wenda ukola bu mutshi wa sedre wa mu Lebanone.

³⁶ Matuku apita, meme kupitshila tshiakabidi muaba awu, tshiyi mumone muntu. Meme kumukeba, nansha kumusangana to.

³⁷ Jooja muntu udi wenza malu makane, tangila muntu wa nsongu. Neumone ne: muntu wa nenku udi ne diakalenga mu bana bende.

³⁸ Kadi badi benza bibi, nebabutuke musangu umue. Ndelanganyi yabu neijimine.

³⁹ Maweja-Nangila udi upandisha bantu bende, diba dia dikenga badi mua kusokomena kudiye.

⁴⁰ Udi ubambuluisha, ubalama bimpe, ubasungidila kudi bantu babi, bualu bavua banyemena kudiye.