Misambu 35 - MUKANDA WA MYIDI MUKULU

Maweja-Nangila udi wambuluisha udi kayi ne bualu

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Maweja-Nangila, luangana ne bankinyi banyi, uluishe badi bangenza mvita.

² Kuata ngabu ne bia mvita, unsungidile!

³ Sempela ne difuma ne muela, uluishe badi bankina. Unjadikile ne: “Nenkupandishe!”

⁴ Badi banjingila lufu, bundu bubakuate, bupuke lumu! Badi bela meji a kungenzela bibi, bapingane tshianyima, bapange bualu!

⁵ Mutumibue wa Maweja-Nangila neabatangalaje bu bisoosa biambula kudi lupepele.

⁶ Mutumibue wa Maweja-Nangila neabalondakaje, mu njila ya miidima ne ya busenu.

⁷ Bavua bangelela bukondu, meme tshiyi ne bualu, bangumbuila tshiina bua meme kudishindamu.

⁸ Kabutu kabakuate kabayi bamanye. Bukondu buabu bubakuate. Badishinde mu tshiina tshivuabu bumbule!

⁹ Kadi meme nensanke, ntshionkomoke, bualu Maweja-Nangila neansungule.

¹⁰ Nengambile Maweja-Nangila muanyi muonsu ne: “Kakuena udi bu wewe. Wewe udi upandisha mupele mu bianza bia baluishi bende, usungidila muena dikenga kudi muena tshinyangu.”

¹¹ Bantu badi banjadikila malu a dishima. Badi bandumbuluisha bua malu andi tshiyi mumanye.

¹² Badi bampingajila bibi pa bimpe, tshiyi ne udi ungakuila!

¹³ Pavua baluishi banyi basama, mvua ne kanyinganyinga, mbenga kudia, ntendelela Maweja-Nangila. — kadi dilomba dianyi kadivua dipeta tshipeta!

¹⁴ Mvua nkengakana bu padi mulunda nansha muanetu usama. Mvua munyingalale bu muntu mu madilu a mamuende mumuledi.

¹⁵ Kadi mpindiewu pandi mu dikenga, baluishi banyi badi basanka, badikunguja bua kunseka. Nansha bantu benyi mene, bandi tshiyi mumanye, badi bantuuta, bangela bibingu.

¹⁶ Padibu bammona ntetuka, badi banseka, bansumakajila menu.

¹⁷ Maweja-Nangila, muudi mulengulule bualu ebu nenku mbishi? Unsungidile ku tshinyangu tshiabu. Umpatule mukana mua ntambue eyi, nshala ne muoyi.

¹⁸ Nanku nenkuele tuasakidila muaba udi bantu bebe basangile. Nenkutumbishe, bonsu bateleje.

¹⁹ Baluishi bavua banshiminyina malu, kabasanki ne: “Tuamutshimunyi!” Badi bankina kapayi bualu, kabaleji musangelu kuisu.

²⁰ Kabena ne diyi dimpe, kadi badi amu bajana, bantu badi basomba talalaa mu ditunga.

²¹ Badi babulula mukana, banjana ne: “Eyowa, tudi bakumone, tudi bakukuate!”

²² Kadi wewe Maweja-Nangila uvua mudimuene bionsu bivua bienzeka. Nanku kupuwi, kundekedi nkayanyi!

²³ Mvidi Mukulu wanyi, juka, undumbuluile! Maweja-Nangila, tabuluka, unsungidile!

²⁴ Maweja-Nangila, wewe udi ukosa nsambu pa yoyi, nanku umbingishe! Mvidi Mukulu wanyi, kabandembakaji!

²⁵ Baluishi banyi kabangambi ne: “Eyowa, tudi bamukuate! Ke tshitudi bajinge!”

²⁶ Badi basanka bua diakabi dianyi, bundu bubakuate, bupuke lumu! Badi baditambisha, bampepeja, bafue bundu disu tente!

²⁷ Kadi badi bambingisha, basanke, batue tshianga, bambe amu kuamba ne: “Maweja-Nangila mmunene! Udi usankisha muntu wende, umusombesha talalaa!”

²⁸ Meme kabidi nemmanyishe bantu muudi ne diyi dimue, nenkutumbishe matuku anyi onsu!