Misambu 33 - MUKANDA WA MYIDI MUKULU

Tumbishayi Mvidi Mukulu

¹ Nuenu bantu ba Maweja-Nangila, mukobuelayi! Amu nuenu badi bakumbaja bidiye musue, ke badi mua kumutumbisha!

² Tumbishayi Maweja-Nangila ne lunzenze, musamunayi ne tshisanji tshia nshinga dikumi!

³ Imbilayi Maweja-Nangila musambu mupiamupia, numusekelele ne bisanji, numukobuele!

⁴ Tshidi Maweja-Nangila wamba, udi utshikumbaja. Tshidiye wenza, tshidi tshijalame.

⁵ Maweja-Nangila udi unanga malu makane ne malelela, uwuja buloba bujima ne dinanga diende!

⁶ Maweja-Nangila mmufuke diulu ku muaku wende, mmufuke bia mulu bionsu ku mueyelu wa mukana muende.

⁷ Udi usangisha mayi manene muaba umue. welela mayi manene nkila.

⁸ Buloba bujima butshine Maweja-Nangila! Bantu bonsu bazakale kumpala kuende!

⁹ Udi wakula, etshi tshienzeka! Utuma diyi, tshiatshia tshipatuka!

¹⁰ Maweja-Nangila udi utupakaja ngenyi ya bukua bisamba, upumbisha meji adi bantu bela.

¹¹ Kadi bulongolodi bua Maweja-Nangila mbua kashidi, meji ende adi ashala tshiendelele.

¹² Bantu badi Maweja-Nangila muikale Mvidi Mukulu wabu, bantu badiye mudisunguile mbena diakalenga!

¹³ Maweja-Nangila udi utangidila mu diulu, umona bonsu badi benda muinshi mua diba.

¹⁴ Ku muaba wende wa bukalenga, udi ujooja bonsu badi basomba pa buloba.

¹⁵ Yeye ke udi mufuke mioyi ya bantu, mumanye bionsu bidibu benza.

¹⁶ Mukalenga kena upandila mu mvita bua bungi bua basalayi bende. Tshilobu kena utshimuna bua dikanda diende nansha.

¹⁷ Kabalu kakena kasungidila muntu, bukole buaku kabuena buambuluisha mukabandi.

¹⁸ Kadi Maweja-Nangila udi ulama bantu bende, ukuba badi batekemena bulenga buende.

¹⁹ Udi ubasungidila ku lufu, ubalama nansha matuku mene a tshiyole.

²⁰ Tudi tutekemena kudi Maweja-Nangila, bualu udi utuambuluisha, utulama bu ngabu.

²¹ Tudi tusanka bikole bualu buende, tutekemena kudi Mvidi Mukulu wa tshijila.

²² Maweja-Nangila, kumbaja bitudi batekemena, utuleje muudi mutunange.