Misambu 32 - MUKANDA WA MYIDI MUKULU

Udibu bajimijile mibi, mmuena diakalenga

1 Kasala ka mu mukanda wa misambu ya Davide .

¹ Kasala ka mu mukanda wa misambu ya Davide. Udi muena diakalenga, padi Mvidi Mukulu ukujimijila mibi yebe, ukufuila luse bua bilema biuvua muenze.

² Udi muena diakalenga, padi Maweja-Nangila, kayi ukutangila bu muena tshibawu, kayi usangana dishima munda muebe!

³ Pamvua tshiyi ntonda bubi buanyi, bukole buanyi buvua buenda bukepela, meme kutua mikemu butuku ne munya.

⁴ Bualu dituku dijima, tshianza tshiebe wewe, Maweja-Nangila, tshivua tshinkengesha, tshindamina panshi. Bu mudi mutshi wa matuku a minanga, tshitshivua ne bukole.

⁵ Kadi mpindiewu ndi mukutondele bubi buanyi, tshiena mukusokoke bilema bianyi. Mvua muambe ne: “Ndi muena tshibawu, ndi ne bua kutondela Maweja-Nangila bimvua muenze.” Ke wewe kumusha tshibawu tshia mibi yanyi.

⁶ Ke mudi bantu bebe bonsu mua kukutendelela diba dia dikenga. Nansha babuele ne kasuki mu njiwu minene, badi amu bapanda.

⁷ Wewe udi muaba undi mua kusokomena. Udi undama mu dikenga. Neumpandishe, nanku nengele mbila ya disanka.

⁸ Maweja-Nangila udi wamba ne: — Nenkulongeshe, nkuleja njila wa kulonda. Nenutangile miaba yonsu iudi uya, nkubela ne:

⁹ Kuikadi muntu mupote, bu nyama wa kabalu nansha wa mpunde, idibu mua kutekesha amu ne nkanu, nansha ne mikaba. Nanku kuakupeta dikasa dibi to.

¹⁰ Muntu mubi udi udikebela makenga mavule. Kadi udi utekemena kudi Maweja-Nangila, udi upeta diakalenga kudiye.

¹¹ Maweja-Nangila anusankishe nuenu, bantu bende. Nuenu badi bamuitaba, katshilayi, tuayi tshianga.