Misambu 31 - MUKANDA WA MYIDI MUKULU

Maweja-Nangila, ndi nkutekemena

¹ Musambu wa mu mukanda wa misambu ya Davide, wa mu mukanda wa mulombodi wa bena misambu.

² Maweja-Nangila, ndi nsokoma kuudi. Unsungidile, kumfuishi bundu, bualu ke tshiuvua mulaye.

³ Unteleje! Kolesha, umpandishe mpindiewu. Wikale lubuebue lundi nsokomena, nzubu mukole undi mua kunyemena.

⁴ Wewe udi lubuebue lundi mua kusokomena. Undombole, undame, bualu ke tshiuvua mulaye.

⁵ Amu wewe udi undama, ungepule ku makondu adibu banteya.

⁶ Maweja-Nangila, ndi nteka muoyi wanyi mu bianza biebe. Neumpandishe, bualu wewe Mvidi Mukulu, udi ukumbaja biuvua mulaye.

⁷ Ndi mbenga badi batendelela mvidie ya dishima, ndi nkutekemena amu wewe, Maweja-Nangila.

⁸ Ndi nsanka, ntshionkomoka, bualu uvua mungenzele bimpe, mumone dikenga dianyi, muvuluke dibungama dianyi.

⁹ Kuvua muanyishe bua baluishi bankuate. Wewe kunkopola, bua ngenze mundi musue.

¹⁰ Maweja-Nangila, umfuile luse, ndi mu dikenga. Mesu mmanguwule ne binsonji, muoyi mmunshikile munda, mubidi mmuntekete.

¹¹ Ntatu idi ikepesha matuku anyi a panu, bidimu bienda bipita, meme ndi ntua amu mikemu. Mibi yanyi mminyange bukole buanyi. Nansha mifuba yanyi idi isheleleka.

¹² Baluishi banyi bonsu badi bampenda, bena mutumba mbandembakaja. Badi bammanye, bakadi bantshina, badi bammona mu njila banyema lubilu.

¹³ Bakadi bampue muoyi bu mufue, nkadi bu tshibambalu.

¹⁴ Ndi ngunwua mudi bantu bangamba bibi. Miaba yonsu idi inkuatshisha bowa. Badi bangelela tshifufu tshibi, bakeba kunshipa.

¹⁵ Kadi meme ndi mueyemine amu kuudi wewe, Maweja-Nangila, ngamba ne: “Wewe ke Mvidi Mukulu wanyi!”

¹⁶ Diba dionsu, ndi mu bianza biebe. Umpatule mu bianza bia baluishi badi bankengesha.

¹⁷ Ungakidile bimpe, bualu ndi muntu webe. Umpandishe, bualu udi munnange.

¹⁸ Maweja-Nangila, ndi nkutendelela, nanku kumfuishi bundu. Bundu mbua bantu badi kabayi bakuitaba. Bapuwe, bapueke mu kandondu ka bafue.

¹⁹ Bena dishima aba bashale tumama. Badi baditambisha, bapepeja bantu badi kabayi ne bualu, babafunda.

²⁰ Kadi Maweja-Nangila, bantu badi bakuitaba, udi ubenzela bimpe bitambe. Bantu bonsu badi bamona bilenga biudi upesha badi banyemena kuudi.

²¹ Udi ubalama pabuipi nebe, ubepula ku mateyi a bantu babi. Udi ubasokoka mu nzubu muebe mutantshi ne bena buenzayi.

²² Maweja-Nangila, tuasakidila, uvua mundeje muuvua munnange bikole. Meme mvua bu tshimenga tshidibu baluisha.

²³ Mvua ndubakana, ngamba ne: “Maweja-Nangila katshiena umvuluka kabidi!” Kadi meme kukusengelela, wewe kungitaba, kungambuluisha.

²⁴ Nuenu bonsu bantu ba Maweja-Nangila, munangayi, bualu udi ulama badi bamuitaba. Kadi udi unyoka bena ditambisha bilondeshile bubi buvuabu benze.

²⁵ Nuenu bonsu badi batekemena kudi Maweja-Nangila, koleshayi muoyi, nusangale.