Misambu 28 - MUKANDA WA MYIDI MUKULU

Ditendelela dia muntu udi upunga ne lufu

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Maweja-Nangila ndi nkutendelela, wewe Lubuebue luanyi, teleja mbila yanyi. Wewe mubenge kunteleja, nkadi bu muntu udi ukeba kukula muoyi.

² Unteleje pandi nkusengelela, nkulomba bua ungambuluishe, pandi ngolola bianza ku muaba wa tshijila menemene uudi usombe.

³ Kunteki kaba kamue ne bena tshikisu, badi bakengesha bakuabu, babambila miaku ya ditalala, kadi munda muabu muikale lonji.

⁴ Ubanyoke bilondeshile malu mabi avuabu benze, ubapingajile bubi buvuabu benzele bakuabu.

⁵ Kabena bamona bidi Maweja-Nangila wenza. Nanku Maweja-Nangila abanyoke, ababutule!

⁶ Ndi ngela Maweja-Nangila tuasakidila. Pamvua mmusengelela, uvua munteleje.

⁷ Maweja-Nangila udi undama, udi ngabu wanyi. Ndi mmutekemena muanyi muonsu. Bu nuwuaye mungambuluishe, ndi nsanka, ntshionkomoka, ndi musue kumuimbila misambu, kumutumbisha.

⁸ Maweja-Nangila udi ulama bantu bende. Udi upandisha mukalenga uvuaye musungule, umukolesha ku muoyi.

⁹ Maweja-Nangila, sungidila bantu bebe, ubele lupemba, wikale mulami wabu, ubakube kashidi.