Misambu 21 - MUKANDA WA MYIDI MUKULU

Disanka dia mukalenga

¹ Musambu wa mu mukanda wa misambu ya Davide, wa mu mukanda wa mulombodi wa bena misambu.

² Mukalenga udi usanka, utua tshianga, bualu wewe Maweja-Nangila uvua umuambuluisha, yeye kutshimuna!

³ Udi mukumbaje tshivuaye ujinga. Kuena mumupale tshivuaye ukulomba.

⁴ Udi mumuele lupemba, mumuase nsala wa lumu.

⁵ Uvua mukulombe bua kushala panu, wewe kuitaba, kumupesha matuku mulongulongu.

⁶ Uvua umuambuluisha, yeye kupeta lumu lunene. Wewe kumuvudijila buneme ne butumbi.

⁷ Uvua mumusankishe kashidi. Paudi pabuipi nende, udi umvua diakalenga.

⁸ Eyowa, mukalenga mmutekemene kudi Maweja-Nangila. Kena mua kutenkakana, bualu Mvidi Mukulu Muena kulu udi umuambuluisha.

⁹ Mukalenga, neukuate baluishi bebe, tshianza tshiebe katshiakupanga badi bakukina.

¹⁰ Pawamueneka ne tshiji, neuboshe mu tshikutu tshia kapia. — Eyowa, Maweja-Nangila ababutule, kapia kaboshe! —

¹¹ Neushidishe ndelanganyi yabu pa buloba, ubutule lulelu luabu lujima.

¹² Padibu bakeba kukuenzela bibi, bakuelela bipangu, kabakukuenzela bualu to.

¹³ Neubase mikete, banyeme lubilu.

¹⁴ Maweja-Nangila, leja bukole buebe. Nanku netuimbe, tusamune biudi muenze!