Misambu 19 - MUKANDA WA MYIDI MUKULU

Lumu lua Mvidi Mukulu

¹ Musambu wa mu mukanda wa misambu ya Davide, wa mu mukanda wa mulombodi wa bena misambu.

² Diulu didi dileja ne: Mvidi Mukulu mmunene. Bia kulu bionsu bidi bimanyisha bidiye muenze.

³ Dituku dionsu didi diambila dituku dikuabu, butuku budi bumanyisha butuku bukuabu bia dikema biende.

⁴ Kabiena biyukila, kabiena biamba bualu, katuena nansha tunwua tshintu.

⁵ Kadi diyi diabi didi ditangalaka buloba bujima, miaku yabi yumvuika ne ku ndekelu kuabu. Mvidi Mukulu mmuashile diba nzubu mu diulu.

⁶ Patshiatshia didi dipatukamu, bu mudi mulume upatuka kua mukajende, usanka, bu mudi tshilobu tshitua ntunku.

⁷ Didi dibanda ku ntuadijilu wa buloba, dibuela ku ndekelu wabu, nkenke yadi itua miaba yonsu.

⁸ Mikenji ya Maweja-Nangila kayena bubi. Idi ifila bukole, ipetesha muoyi. Mibelu ya Maweja-Nangila idi mimpe, ikebela bena lungenyi lutekete meji.

⁹ Meyi a Maweja-Nangila adi makane, aludika muntu mu njila wa diakalenga.

¹⁰ Kunemeka Maweja-Nangila nkuakane, tumunemeke kashidi. Maweja-Nangila udi ukosa nsambu pa yoyi, kabayi mua kumudinga.

¹¹ Mikenji yende mmipite tshiamu tshia mpawungi mushinga, idi mimpe, mipite buitshi busheme.

¹² Maweja-Nangila, ndi muena mudimu webe. Mikenji yebe idi imbela, kuyilonda nkupeta diakalenga.

¹³ Bantu bonsu badi batupakana. Umfuile luse bua bilema bindi muenze mu mpukapuka.

¹⁴ Ungepule ku ditambisha, bua kadivu kumpita bukole. Nanku nengikale tshiyi kalema, tshiyi muena tshibawu.

¹⁵ Wanyishe miaku yanyi ne meji anyi. Ke tshindi ntekemena. Wewe, Maweja-Nangila, udi lubuebue luanyi, tshilobu tshidi tshimpandisha!