Misambu 17 - MUKANDA WA MYIDI MUKULU

Ndi nyemena kuudi

1 Ditendelela dia mu mukanda wa misambu ya Davide.

¹ Ditendelela dia mu mukanda wa misambu ya Davide. Maweja-Nangila, unteleje, ndi ndila muadi, ungumvue. Tshiena ne bubi bundi muenze. Ndi nkutendelela, ungitabe. Mukana muanyi kamuena dishima.

² Wewe neundumbuluishe, umbingishe, bualu udi ujingulula udi kayi ne bualu.

³ Butuku udi unkenketa, unjooja, unteta, kuyi unsangana ne bualu. Bindi ngela meji ke bindi ngamba.

⁴ Ndi nkumbaja biudi muambe. Tshiena ndonda njila wa bubi.

⁵ Ndi ngenda amu mu njila webe, tshiena mpambukamu nansha kakese.

⁶ Mvidi Mukulu wanyi, ndi nkutendelela. Ndi mumanye muudi ungitaba. Teleja ne ntema bindi ngamba.

⁷ Undeje muudi munnange. Badi basokomena kuudi, udi ubapatula mu bianza bia baluishi babu.

⁸ Bu mudi muntu ulama lumonyi lua disu, undame, unsokoke mu mapuapua ebe.

⁹ Bantu babi badi bankengesha, bena tshikisu badi bangela munkatshi.

¹⁰ Badi bapapisha muoyi wabu, kabayi ne luse. Badi baditemba amu kuditemba.

¹¹ Badi bamfmakaja, banjingila, bakeba kungela panshi.

¹² Badi bangalamina mu tshisuku bu ntambue, bakeba kunsunsula bu nyama ya lonji.

¹³ Maweja-Nangila, juka, ubaluishe, ubafuishe binu. Patula muela webe, unsungidile.

¹⁴ Ubabutule, ubajikije mu bantu. Ubanuishe lulengu luuvua mubalamine. Bana babu banue buukute, biikulu babu balabule luvua lushale!

¹⁵ Meme nenkumone, bualu tshivua muenze bibi. Pangabika, nenkutangile, kabiyi bintonda!