Misambu 139 - MUKANDA WA MYIDI MUKULU

Maweja-Nangila udi mummanye

1 Musambu wa mulombodi wa bena misambu. Mu mukanda wa misambu ya Davide.

¹ Musambu wa mulombodi wa bena misambu. Mu mukanda wa misambu ya Davide. Maweja-Nangila, udi mujingulule muoyi wanyi, udi mummanye:

² Udi mumanye pandi nsomba nansha mbika, majinga anyi udi muamanye kale.

³ Udi umona pandi pambelu nansha pandi mu nzubu, udi mumanye bionsu bindi ngenza.

⁴ Tshiyi muanji kuamba diyi mukana muanyi, wewe ukadi mumanye bionsu bindi musue kuamba.

⁵ Udi kumpala ne kunyima kuanyi kabidi, udi muntenteke tshianza tshiebe.

⁶ Mushindu uudi mummanye udi unkemesha, mmupite bionsu bindi mua kumvua.

⁷ Nenkusokome muaba kaayi? Muaba kaayi undi mua kukunyema?

⁸ Nansha meme mubande mu diulu, udimu; nansha mulale mu kandondu, udi anumu.

⁹ Nansha meme muye kudi diba dipatukila, nansha muye kusomba kudidi dibuelela,

¹⁰ nansha kuinaku, tshianza tshiebe tshidi tshinkuata, diboku diebe dia bukole kadiena dindekela.

¹¹ Meme muambe ne: “Miidima imbuikile, butuku bungidile!”

¹² Miidima yandamuke butoke ku mesu ebe, butuku nebukenke bu munya; miidima nansha butoke bidi bia momumue ku mesu ebe.

¹³ Wewe ngudi mumfuke mumfumbe munda mua mamu.

¹⁴ Maweja-Nangila, tuasakidila, bualu udi muenzele mubidi wanyi, malu a dikema. Biudi muenze bidi bia dikema, ndi mubimanye.

¹⁵ Mubidi wanyi kauvua musokome ku mesu ebe, pauvua umfuka mu musokoku, umfumba munda mua mamu.

¹⁶ Uvua mummone ntshidi mu lukutu; mu mukanda webe, ukavua mufunde matuku onsu andi ndala panu, dimue dia kudiwu kadiyi dianji kubanga.

¹⁷ Mvidi Mukulu wanyi, mbikole bua meme kumanya meji ebe, mmapite bungi!

¹⁸ Mua kuabala mmunyi? Adi mapite lusenga bungi. Nansha meme muabale, tshiena mfika ku dikujingulula.

¹⁹ Mvidi Mukulu wanyi butula bantu babi, ipata bashipianganyi ku mesu anyi.

²⁰ Badi bakutela bua kudinga, badi batela dina diebe bua kushima.

²¹ Maweja-Nangila, ndi mbenga bonsu badi bakubenga. Ndi nkina bonsu badi bakukina.

²² Ndi mbakina bikole, mbaluishi banyi.

²³ Mvidi Mukulu wanyi, jingulula malu adi mu muoyi wanyi, ummanye. Untete, umanye majinga anyi onsu.

²⁴ Manya ne tshiena mukukuile bamvidie ba dishima, undombole mu njila webe matuku onsu.