Misambu 138 - MUKANDA WA MYIDI MUKULU

Ndi nkutumbisha ne muoyi wanyi mujima

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Maweja-Nangila, ndi nkutumbisha ne muoyi wanyi mujima. Ku mesu kua batumibue ba mu diulu ndi nkutumbisha ne misambu,

² ndi ela panshi mu nzubu webe wa tshijila. Mvidi Mukulu wa kashidi, ndi nkutumbisha bua bulenga buebe ne bulelela buebe, bualu uvua muvuluke dilaya diebe, mutuvua katuyi batekemene.

³ Pamvua mukubikile, uvua munteleje; wewe kumpetesha muoyi mukole ne dikanda.

⁴ Maweja-Nangila, bakalenga bonsu ba pa buloba bakutumbishe, padibu bumvua biudi wamba!

⁵ Batumbishe midimu yebe bimba ne: “Lumu lua Maweja-Nangila ndunene.

⁶ Maweja-Nangila udi mulu mu diulu kadi udi umona bapuekele, umanya bena ditambisha pa bule.”

⁷ Pandi meme nsomba mu dikenga, neundame ne muoyi nansha mudi baluishi banyi bamfikila munda, neolole tshianza tshiebe tshia bukole tshimpandishe.

⁸ Maweja-Nangila, ungenzele malu aa. Wewe muena dinanga dia kashidi, kulekedi mpindiewu, bantu bauvua mufuke ku bianza biebe.