Misambu 119 - MUKANDA WA MYIDI MUKULU

Mikenji ya Mvidi Mukulu idi ya dikema kabidi mmisokome

¹ Bantu badi ne nsombelu muakane, balonda mikenji ya Maweja-Nangila mu nsombelu wabu, badi ne disanka!

² Bantu badi balonda mikenji yende, bamutumikila ne muoyi wabu mujima, badi ne disanka!

³ Bobu kabena benza bualu bubi nansha bumue, badi benza mudi Mvidi Mukulu musue.

⁴ Wewe Maweja-Nangila, udi mumanyishe bantu mikenji yebe, bua bayilame.

⁵ Eyi, nsombelu wanyi ikale muimpe, ndame mikenji yebe muudi musue wewe!

⁶ Nanku tshiakufua bundu pandi ndama meyi ebe.

⁷ Nenkutumbishe ne muoyi umue, ndonge malu malelela audi mupangadike.

⁸ Nengenze muudi musue, kundekedi kashidi!

⁹ Patshidi muntu muana, mmunyi mudiye mua kuikala ne nsombelu muimpe? — Amu padiye ulama tshiudi muambe wewe Maweja-Nangila.

¹⁰ Wewe ngundi nkeba bua kuitaba ne muoyi wanji mujima, kundekedi bua nsesuke ku meyi ebe.

¹¹ Ndi ndama mikenji yebe mu muoyi wanyi, bua tshikadi mua kupila ku mesu kuebe.

¹² Maweja-Nangila, tuasakidila, bualu udi mundongeshe tshiudi musue.

¹³ Mishiku yanyi idi ibala mapangadika onsu audi muambe.

¹⁴ Kulonda mikenji yebe kudi kunsankisha, bu mudi muntu mupete biuma bia bungi.

¹⁵ Ndi musue kuelangana meji ku mikenji yebe, ne kulonda njila uudi undeja.

¹⁶ Ndi ne disanka dia kulonda mikenji yebe, tshiena mpua diyi diebe muoyi.

¹⁷ Ungenzele meme muena mudimu webe bimpe, ngikale ne muoyi, ndame diyi diebe.

¹⁸ Tabaja mesu anyi, mmone malu a dikema adi mu mikenji yebe.

¹⁹ Ndi muenyi pa buloba, kunsokoki mikenji yebe.

²⁰ Muoyi wanyi mmusue kulonda mapangadika, audi muangate mu malu onsu.

²¹ Udi ukanyina bena kapeja, udi ubela mulawu, badi bapambuka mu njila webe.

²² Ungumbushile kapeja ne tuseku, bualu ndi ndama mikenji yebe.

²³ Nansha bamfumu bangelela tshitungu tshibi, ndi muena mudimu webe, ndi ngelangana meji ku malu audi wewe musue.

²⁴ Malu audi mungambile adi ansankisha, wowu ke adi ampesha meji makane.

²⁵ Ke meme ewu panshi mu lupuishi; umfululule bu muuvua mulaye.

²⁶ Mvua mukulondele mundi nsomba, wewe kunteleja, undongeshe tshiudi musue.

²⁷ Ungumvuije tshidi mikenji yebe yamba, ngelangane meji ku malu ebe a dikema.

²⁸ Dibungama didi mua kumpuekeshisha binsonji, unkankamike bu muuvua mulaye.

²⁹ Ungumbushe mu njila wa dishima, ummanyishe mikenji yebe bua bulenga buebe.

³⁰ Ndi muanyishe bua kukulamata, ndi mulonde mapangadika ebe.

³¹ Ndi mulame diyi diuvua mungambile, Maweja-Nangila, kumfuishi bundu.

³² Ndi ndonda njila uudi ungambila, bualu udi munzulule lungenyi luanyi.

³³ Maweja-Nangila, undeje njila wa meme kulonda, nemmulonde too ne ku ndekelu.

³⁴ Ungunwuije mikenji yebe, nenyilonde, nenyilame ne muoyi wanyi mujima.

³⁵ Undombole mu njila wa mikenji yebe, nensanke.

³⁶ Tangija muoyi wanyi ku mikenji yebe, kuutangiji ku biuma.

³⁷ Lama mesu anyi kaatangidi bintu bia tshianana. Undombole panu bu muudi musue.

³⁸ Kumbajila muena mudimu webe, bionsu biuvua mulaye badi bakuitaba.

³⁹ Ngumbushile kapeja, kadi kankuata bowa, bualu mapangadika ebe ke adi mimpe.

⁴⁰ Dijinga dianyi ndia kulonda mikenji yebe, umpe muoyi bualu udi muakane.

⁴¹ Maweja-Nangila, undeje buimpe buebe, unsungidile bu muuvua mulaye.

⁴² Mpete meji a kuandamuna badi bampenda, bualu ndi mutekemene bionsu biuvua mungambile.

⁴³ Kumbushi malu malelela mukana muanyi, bualu ndi ngindila mapangadika ebe.

⁴⁴ Ndi musue kulama mikenji yebe kashidi, tshiyi mpungila.

⁴⁵ Ndi musue kusomba panu bimpe, bualu ndi nditatshisha bua kulama mikenji yebe.

⁴⁶ Nengambile bakalenga mikenji yebe, tshiyi mfua bundu.

⁴⁷ Ndi munange meyi ebe, ndi ngalonda ne disanka.

⁴⁸ Ndi nkutendelela maboku mela mulu, ngelangana meji ku biudi musue.

⁴⁹ Vuluka diyi diuvua muambile muena mudimu webe, bualu ndinshiye ne ditekemena.

⁵⁰ Pandi mu dikenga, diyi diebe didi dinsamba, dinkolesha ku muoyi.

⁵¹ Nansha bena kapeja banseka, tshiena musesuke ku mikenji yebe.

⁵² Maweja-Nangila, ndi mvuluka mapangadika ebe a kale, ngumvua dikisha mu muoyi.

⁵³ Tshiji tshidi tshinkuata pandi mmona bantu babi, babenga mikenji yebe.

⁵⁴ Biudi musue, ke bindi meme muena tshimuangi nsaka mu misambu.

⁵⁵ Maweja-Nangila, ndi nkuvuluka butuku, ndama mikenji yebe.

⁵⁶ Tshindi ne bua kuenza bulelela, nkuangata mikenji yebe ne mushinga.

⁵⁷ Maweja-Nangila, ndi muambe ne: tshindi ne bua kuenza, nkulama mikenji yebe.

⁵⁸ Ndi musue kukusankisha ne muoyi wanyi mujima, ungambuluishe bu muuvua mulaye.

⁵⁹ Ndi ndiela meji a malu amvua muenze, ndi mpingana ku mikenji yebe.

⁶⁰ Tshiena njingakana bua kuenza tshiudi muambe.

⁶¹ Bantu babi nebankuate mu buteyi, kadi tshiena mpua mikenji yebe muoyi.

⁶² Ndi mbika mundankulu, nkutumbisha bua mapangadika makane audi muangate.

⁶³ Ndi mudie bulunda ne badi bakunemeka bonsu, ne badi banemeka kabidi mikenji yebe.

⁶⁴ Maweja-Nangila, udi muuje buloba ne malu ebe mimpe, undongeshe biudi musue.

⁶⁵ Maweja-Nangila, udi muenzele muena mudimu webe bimpe, bu muuvua mulaye.

⁶⁶ Undongeshe mua kumanya ne kuanyisha meyi ebe, bualu ndi muatekemene amu wowu.

⁶⁷ Mvua mupambuke kabayi banji kumfuisha bundu, mpindiewu ndi ngenza tshiudi muambe.

⁶⁸ Maweja-Nangila, udi muimpe, wenza malu mimpe, undongeshe biudi musue.

⁶⁹ Bena kapeja badi bannyanga ne malu a didinga, kadi meme ndi ndama mikenji yebe ne muoyi mujima.

⁷⁰ Lungenyi luabu ndujibale, kadi meme ndi nsanka bua kutumikila mikenji yebe.

⁷¹ Bidi bimpe bantu bamfuishe bundu, bua mmanye tshiudi musue.

⁷² Mikenji yebe idi indengelela, bipitshidile biamu bia mpawungi ne biamu bitoke bia mushinga mukole binunu ne binunu.

⁷³ Bianza biebe mbimfumbe, mbinkoleshe, umpeshe lungenyi lua kujingulula nalu malu, mmanye mikenji yebe.

⁷⁴ Bakulamatshi badi ne disanka pa kumona ne: ndi mutekemene biudi mua kuamba.

⁷⁵ Maweja-Nangila, ndi mumanye ne: mapangadika ebe adi makane, avua mamfuishe bundu pa bualu.

⁷⁶ Unsambe bua buimpe buebe, bu muuvua mungambile meme muena mudimu webe.

⁷⁷ Undeje muudi munnange, nemfululuke, bualu ndi nsanka bua kutumikila mikenji yebe.

⁷⁸ Bena kapeja badi bankengesha kapayi bualu, bafue bundu! Meme ndi mulame mikenji yebe.

⁷⁹ Bantu badi bakunemeka bapingane kundi, bua kumanyabu biudi wamba.

⁸⁰ Nengenze biudi musue ne muoyi wanyi mujima, nanku tshiakufua bundu ku mesu kuebe to.

⁸¹ Ndi nditatshisha bua kupeta diambuluisha diebe, mutekemene tshiudi wamba.

⁸² Mesu anyi adi bilejileji, bua pandi mpita kubalulula mukenji webe, ke pandi nkonka ne: “Neunsambe diba kaayi?”

⁸³ Nkadi ne minyengu mu mpala bu mulondu muteka pa muinshi, kadi tshiena mpua biudi musue muoyi.

⁸⁴ Matuku audi mumpeshe bua kushala ne muoyi panu, adi bungi munyi? Neulumbuluishe bantu badi bankengesha diba kaayi?

⁸⁵ Bena kapeja kabena balonda mikenji yebe, badi bangimbila dijimba.

⁸⁶ Meyi ebe onsu adi malelela. Bantu badi bandondakaja tshiyi ne bualu, ungambuluishe.

⁸⁷ Nansha mumvua mulale panshi, ngamba kufua, tshivua mulekele mikenji yebe to.

⁸⁸ Umpe muoyi bua buimpe buebe, bua ndame meyi ebe.

⁸⁹ Maweja-Nangila, diyi diebe nedikaleku matuku onsu, didi ne muaba wadi wa kashidi mu diulu.

⁹⁰ Bulelela buebe budi bushala bidimu nkama ne nkama. Wewe kufuka buloba kushalabu;

⁹¹ bintu bionsu bidi bishala ne ku lelu bu muuvua mupangadike bualu bintu bionsu bidi bienza mudimu webe.

⁹² Bu meme tshiyi ndonda mikenji yebe idi insankisha, dikenga divua mua kunkuata.

⁹³ Tshiakupua mikenji yebe muoyi kashidi, bualu yoyi ke iudi umfululula nayi.

⁹⁴ Ndi nkulonda, umpandishe, ndi nkeba mikenji yebe.

⁹⁵ Bantu babi badi bakeba pa kunshipela, kadi ndi nteleja meyi ebe.

⁹⁶ Ndi mmona ne: tshintu tshionsu tshidi ne ndekelu, kadi diyi diebe kadiena ne nshikidilu wadi.

⁹⁷ Eyi, ndi munange diyi diebe bikole, ndi nadi mu meji anyi matuku onsu.

⁹⁸ Diyi diebe ke bubanji buanyi bua kashidi, didi dimpesha meji mapite a balunda banyi.

⁹⁹ Ndi mupete dimanya mupite ne balongeshi banyi, bualu ndi ngelangana meji ku meyi ebe.

¹⁰⁰ Ndi mupite ne bantu banunu ku lungenyi, bualu ndi ngangata mikenji yebe ne muoyi umue.

¹⁰¹ Ndi mubenge kulonda njila wa bubi, bua kuenza tshiudi musue.

¹⁰² Ndi mulonde mapangadika ebe, bualu wewe ke udi mungambilewu.

¹⁰³ Pandi ngumvua malongesha ebe, ndi ngamona masheme mapite buitshi.

¹⁰⁴ Lungenyi luanyi ludi lufuma ku mikenji yebe, ke pandi mbenga malu onsu a dishima.

¹⁰⁵ Diyi diebe didi bu muendu ku makasa anyi, bu butoke budi buntokeshila njila.

¹⁰⁶ Nenwuluke dilaya dimvua mukulaye, dia kukumbaja mapangadika ebe makane.

¹⁰⁷ Maweja-Nangila, bantu bavua bamfuishe bundu, undame ne muoyi bu muuvua mulaye.

¹⁰⁸ Maweja-Nangila, anyisha ditendelela dianyi bu mulambu, undongeshe tshiuvua mupangadike.

¹⁰⁹ Muoyi wanyi udi mu njiwu diba dionsu, kadi tshiena mpua mikenji yebe muoyi.

¹¹⁰ Nansha bantu babi banteya, tshiena mpambuka mu mikenji yebe.

¹¹¹ Meyi ebe ke bubanji buanyi bua mushinga mukole bua kashidi, adi asankisha muoyi wanyi.

¹¹² Ndi musuminyine bua kuenza biudi musue, ke difutu dianyi dia kashidi.

¹¹³ Ndi mubenge mioyi ibidi, ndi munange mikenji yebe.

¹¹⁴ Wewe ke ngabu wanyi udi undama; ndi mutekemene diyi diwamba.

¹¹⁵ Nuenu bena malu mabi umbukayi muaba undi, ndi musue kulonda meyi a Mvidi Mukulu wanyi.

¹¹⁶ Ungambuluishe bu muuvua mulaye, bua ngikale ne muoyi, kufuishi ditekemena dianyi bundu.

¹¹⁷ Ikala tshieyemenu tshianyi, mpande; nenkebe biudi musue matuku onsu.

¹¹⁸ Udi wipata bantu badi kabayi benza muudi musue, bualu meji abu adi ne dishima.

¹¹⁹ Udi wimansha bantu babi ba pa buloba muaba udi bunyawu, ke pandi munange meyi ebe.

¹²⁰ Mubidi wanyi udi uzakala bua kukunemeka, ndi ne bowa bua mapangadika ebe.

¹²¹ Ndi muenze muuvua muambe, kundekedi mu bianza bia badi bankengesha.

¹²² Unshindikile ne: malu onsu neajike bimpe; bena kapeja, kabakengeshi kabidi!

¹²³ Mesu anyi adi amona bilejileji, bualu ndi mpita kubala mukenji webe, ke pandi nkonka ne: “Neunsambe diba kaayi?”

¹²⁴ Ndi nkusengelela ne: ungenzele bu mudi bulenga buebe, undongeshe biudi musue.

¹²⁵ Ndi muena mudimu webe, unzulula lungenyi luanyi, mmanye meyi ebe bimpe.

¹²⁶ Maweja-Nangila, diba ndikumbane dia wewe kuenza, mudimu webe wa kulumbuluisha, bualu bantu mbanyange mikenji yebe.

¹²⁷ Ndi munange meyi ebe kumpala kua bintu bionsu, kumpala kua tshiamu tshia mpawungi wa menemene.

¹²⁸ Mikenji yebe yonsu ndi nyimona miakane, ndi mubenge malu onsu a dishima.

¹²⁹ Meyi audi muambe adi a dikema, ke pandi musuminyine bua kualonda.

¹³⁰ Diyi diebe didi dipetesha muntu butoke padiye udimanya, didi dipetesha bantu bapuekele lungenyi.

¹³¹ Ndi nganyisha ne dijinga dionsu biudi wamba, bualu ndi njinga meyi ebe.

¹³² Untangile, ungambuluishe, bu muuvua mupangadike bua bonsu badi bakunanga.

¹³³ Mukenji webe umpeshe bukole buonsu, bualu bubi nansha bumue kabuntshimunyi.

¹³⁴ Umpikule ku bianza bia badi bankengesha, bua nnemeke mikenji yebe.

¹³⁵ Ungakidile, undongeshe biudi musue.

¹³⁶ Ndi ndila, binsonji bipueka, pandi mmona bantu kabayi balama mikenji yebe.

¹³⁷ Maweja-Nangila, udi muakane, mapangadika ebe adi makane.

¹³⁸ Paudi muambile bantu meyi ebe, udi uleja buakane buebe ne bulelela buebe bujima.

¹³⁹ Tshiji tshidi tshinkuata pandi mmona baluishi banyi, bapue biudi muambe muoyi.

¹⁴⁰ Muaku webe mmukumbaje mudimu wawu, ndi muunange meme muena mudimu webe.

¹⁴¹ Meme ndi muntu mukese udibu bapepeja, kadi tshiena mupue mikenji yebe muoyi.

¹⁴² Buakane buebe mbua kashidi, mikenji yebe kabena mua kuyishintulula.

¹⁴³ Dibungama ne dikenga bidi binkuata, kadi meyi ebe ke disanka dianyi.

¹⁴⁴ Meyi ebe adi makane kashidi, ungumvuije, nempande.

¹⁴⁵ Maweja-Nangila, ndi nkubila ne muoyi wanyi mujima, ungitabe nendonde njila yebe.

¹⁴⁶ Ndi nkubila, fika ungambuluishe, ndame meyi ebe.

¹⁴⁷ Ne dinda dionsu, ndi ndomba diambuluisha diebe, ngindila diandamuna diebe.

¹⁴⁸ Ndi ntabala butuku kabuyi buanji kutshia, bua kuela meji ku malongesha ebe.

¹⁴⁹ Maweja-Nangila, teleja lubila luanyi bua buimpe buebe, umfululula bu muuvua mupangadike.

¹⁵⁰ Bantu badi bankengesha badi basemena pabuipi nanyi, badi kule ne mikenji yebe.

¹⁵¹ Maweja-Nangila, wewe udi pabuipi, bantu batekemene meyi ebe onsu.

¹⁵² Meyi ebe ndi muamanye ku kale, uvua muambe bua kashidi.

¹⁵³ Mona dikenga dianyi, unsungidile, bualu tshiena mpua mikenji yebe muoyi.

¹⁵⁴ Undumbuluile, umpandishe, umfululula bu muuvua mulaye.

¹⁵⁵ Lupandu ludi kule bua bantu badi kabayi bitaba Mvidi Mukulu, kabayi balama mikenji yende, bualu kabena bitaba biudi musue.

¹⁵⁶ Maweja-Nangila, muoyi webe mmuwule ne dinanga, umpandishe bu muuvua mupangadike.

¹⁵⁷ Ndi ne bantu badi bankengesha ne bena lukuna banyi ba bungi, kadi tshiena mutupakane ku meyi ebe.

¹⁵⁸ Muoyi udi unsama pandi mmona bantu babi, bualu kabena balama malongesha ebe.

¹⁵⁹ Maweja-Nangila, mona mundi munange mikenji yebe; umpandishe bua buimpe buebe.

¹⁶⁰ Muaku onsu uudi wamba, udi amu pa wowo, mapangadika ebe onsu adi makane, adi kabidi bua kashidi.

¹⁶¹ Bana ba bamfumu badi bankengesha kapayi bualu, meyi ebe ke andi ntshina.

¹⁶² Ndi nsanka bua mukenji webe, bu mupete biuma bia bungi bia mushinga mukole.

¹⁶³ Ndi mubenge dishima, ndi mudikine, kadi ndi munange mikenji yebe.

¹⁶⁴ Ndi nkutumbisha ku dituku misangu muanda mutekete bua mapangadika ebe makane.

¹⁶⁵ Bantu badi bananga mikenji yebe, badi ne disanka dia bungi, kabena mua kutetuka.

¹⁶⁶ Maweja-Nangila, ndi mutekemene, umpandishe, ndi ngenza muuvua muambe.

¹⁶⁷ Ndi ndama meyi ebe ne muoyi mujima, ndi muanange bikole.

¹⁶⁸ Eyowa, ndi nnemeka mikenji yebe ne meyi ebe; udi mumone bionsu bindi ngenza.

¹⁶⁹ Maweja-Nangila, teleja muadi wanyi ne luse, umpeshe lungenyi bu muuvua mulaye.

¹⁷⁰ Lubila luanyi lufike kuudi, umpandishe bu muuvua mulaye.

¹⁷¹ Mishiku yanyi itangalaje butumbi buebe, bualu udi undongesha biudi musue.

¹⁷² Ludimi luanyi lutumbishe biudi wamba, bualu meyi ebe onsu adi makane.

¹⁷³ Tshianza tshiebe tshingambuluishe, bualu ndi musungule mikenji yebe.

¹⁷⁴ Maweja-Nangila, dijinga dinene ndia wewe kumpandisha, mikenji yebe ke idi insankisha.

¹⁷⁵ Ngikale panu ne muoyi bua kukutumbisha, mapangadika ebe angambuluishe!

¹⁷⁶ Ndi mupambuke bu mukoku mujimine; fika ungambuluishe meme muena mudimu webe, bualu tshiena mpua meyi ebe muoyi.