Misambu 116 - MUKANDA WA MYIDI MUKULU

Muntu mupanduke ku lufu udi utendelela Mvidi Mukulu

¹ Ndi munange Maweja-Nangila bualu udi unteleja pandi mmubikila

² Udi unteleja ne ntema. Nemmutendakene too ne ku lufu.

³ Lufu kunjingila nkanu yalu, bowa bua kandondu ka bafue kunkuata, luzakalu kungenza, muoyi kunshikila.

⁴ Ke meme kubikila Maweja-Nangila, ngamba ne: “Maweja-Nangila, umpandishe ku lufu!”

⁵ Maweja-Nangila udi ne muoyi muimpe, udi ukumbaja bivuaye mulaye, Mvidi Mukulu wetu udi ufuila bantu luse.

⁶ Maweja-Nangila udi ulama badi kabayi mua kudisungidila, mvua mu njiwu yeye kunsungidila

⁷ Muoyi wanji kubutama, bualu Maweja-Nangila mmungenzele bimpe.

⁸ Bushuwa, wewe Maweja-Nangila, uvua munsungidile ku lufu, munkupule binsonji ku mesu, mungepule ku kabutu.

⁹ Nenku, nengende kumpala kua Maweja-Nangila mu buloba bua ba muoyi.

¹⁰ Mvua mutekemene kudi Mvidi Mukulu, nansha pamvua ndila, ngamba ne: “Ndi mu dikenga dinene!”

¹¹ Mvua ndubakana ngamba ne: “Kakuena muntu undi mua kutekemena!”

¹² Tshindi mua kupingajila Maweja-Nangila, bua bionsu bidiye mungenzele ntshinyi?

¹³ Nendambule Maweja-Nangila mulambu wa mvinyo, mmuele tuasakidila, bualu mmumpandishe!

¹⁴ Nenkumbaje bimvua mulaye Maweja-Nangila, bantu bende batangila.

¹⁵ Maweja-Nangila udi ubungama bikole, padi bantu badi bamulamata bafua.

¹⁶ Maweja-Nangila, ndi muena mudimu webe, mulela kudi mukaji muena mudimu webe. Wewe ke uvua munsulule nkanu ya lufu.

¹⁷ Nenkulambule mulambu bua kukuela tuasakidila, kabidi nentumbishe dina diebe.

¹⁸ Nenkumbaje bimvua mulaye Maweja-Nangila, bantu bende bonsu batangile,

¹⁹ mu lubanza lua nzubu wende wa tshijila, udi munkatshi muebe wewe, Yerushalayime. Tutumbishayi Maweja-Nangila, Aleluya!