Misambu 114 - MUKANDA WA MYIDI MUKULU

Mvidi Mukulu uvua mupatule bena Izrayele mu Ejipitu

¹ Diba divua bena Izrayele bapatuke mu Ejipitu, divua ndelanganyi ya Yakobe mishiye tshisamba tshia benyi,

² Yuda kushala muaba wa tshijila wa Maweja-Nangila, Izrayele kushala buloba buende.

³ Mayi manene amona bena Izrayele, kukosolokawu. Musulu wa Yardene kupingana tshianyima.

⁴ Mikuna minene kutupika bu mbuji ya bimpanga, mikuna mikese bu tuana tua mikoku.

⁵ Wewe mayi manene, tshiudi unyemena ntshinyi? Wewe musulu wa Yardene, tshiudi upingena tshianyima ntshinyi?

⁶ Nuenu mikuna ne minene ne mikese, tshinudi nutupikila bu mbuji ya bimpanga, kabidi bu tuana tua mikoku ntshinyi?

⁷ Buloba bumona Maweja-Nangila ufika, kuzakala, kukuatshika bowa kumpala kua Mvidi Mukulu wa Yakobe.

⁸ Bualu yeye udi wandamuna lubuebue luenza dijiba dia mayi, ukudimuna dibue dishala mpokolu wa mayi.