Misambu 112 - MUKANDA WA MYIDI MUKULU

Diakalenga dia bantu bakane

¹ Tumbishayi Maweja-Nangila, aleluya! Muntu udi unemeka Maweja-Nangila, umvua disanka bua kulonda mikenji yende, udi ne disanka.

² Bana bende nebikale bilobu mu ditunga, ndelanganyi ya bantu bakane nebayele lupemba.

³ Mu nzubu muende mudi lupetu ne bubanji, buakane buende mbua tshiendelele.

⁴ Munya udi utema mu miidima bua kutokeshila bantu bakane, Maweja-Nangila udi ne dinanga, udi ufuila bantu luse.

⁵ Muntu udi uleja bakuabu luse, ubasombesha bintu, ulongolola malu ende mu buakane, udi wenza bimpe.

⁶ Bualu kena mua kutekankana tshiendelele, nebavuluke muntu muakane matuku onsu.

⁷ Kena utshina ngumu mibi; udi ne muoyi mukole, udi weyemena Maweja-Nangila.

⁸ Udi ne muoyi mukole, kena ne bowa, too ne padiye umona batshimuna baluishi bende.

⁹ Udi upesha bapele bintu tshipapa, Mvidi Mukulu udi umuanyisha matuku onsu. Bukole buende ne butumbi bidi bivulangana.

¹⁰ Padi muntu mubi umona bualu ebu, udi unyingalala, usumakaja menu, ubutuka. Dijinga dia bantu babi nedijimine.