Misambu 109 - MUKANDA WA MYIDI MUKULU

Muntu udibu basonguela udi ulomba diambuluisha kudi Mvidi Mukulu

1 Musambu wa mu mukanda wa mulombodi wa bena misambu. Wa mu mukanda wa misambu ya Davide.

¹ Musambu wa mu mukanda wa mulombodi wa bena misambu. Wa mu mukanda wa misambu ya Davide. Mvidi Mukulu wewe ke undi ntumbisha, kupuwi nansha,

² bualu bantu babi, bena dishima, badi bansonguela, badi banjana.

³ Meyi abu a lukinu adi antatshisha nseke yonsu, badi banduisha kapayi bualu.

⁴ Nansha meme mubanange, badi bansonguela, kadi meme ndi ntendelela bua baluishi banyi,

⁵ badi bangenzela malu mabi pa malu mimpe, bankina pandi meme mubanange.

⁶ Badi bangamba ne: “Bamupishe, muntu imane ku tshianza tshiende tshia balume, bua amusonguele!

⁷ Palumbululaye bamupishe, ditendelela diende diandamuke bualu bubi!

⁸ Matuku ende a kulala panu ikale makese, muntu mukuabu angate midimu yende.

⁹ Bana bende bashale bana ba nshiya, mukajende ashale mukamba!

¹⁰ Bana bende ba balume bikale balalakanyi, ne bena lulombu, babipate muaba udi nzubu yabu, mishale bibuwa.

¹¹ Muntu uvua mumusombeshe bintu, abiangate bionsu, benyi banyenge bintu bivuaye mupete ku mudimu wende.

¹² Muntu kamufuidi luse to, kafuidi nshiya yende luse to!

¹³ Ndelanganyi yende ifue, dina diende dijimine mu tshikondu tshidi tshilonda!

¹⁴ Bavuluije Maweja-Nangila bilema bia tatuende ne bia kakuende wa balume, kababuikidi malu mabi a mamuende nansha!

¹⁵ Maweja-Nangila avuluke malu aa matuku onsu, umbushe tshivulukilu tshia bantu abu mu ditunga.

¹⁶ Bualu muntu ewu, kavua muvuluke bua kuleja bantu luse, kadi uvua ukengesha mupele, muena dikenga, muena dibungama bua kumushipa.

¹⁷ Uvua utshipa bantu: mulawu umukuate! Kavua wela bantu lupemba: yeye kabidi kabamuedi lupemba!

¹⁸ Ikale muntu wa mulawu, mulawu umubuele munda bu mayi, umubuele mu mifuba bu mafuta!

¹⁹ Ikale nawu bu tshilamba tshidiye udijingila, ne bu mukaba udiye uvuala matuku onsu.”

²⁰ Ke mudi Maweja-Nangila wenzela bonsu badi bansonguela kudiye, ne badi banjana nanku.

²¹ Kadi wewe Maweja-Nangila, Mvidi Mukulu wanyi, ungenzele bimpe bua dina diebe, bualu malu ebe mimpe mmapite, unsungidile.

²² Ndi mupele ne muena dikenga, muoyi wanyi mmunyingalale munda.

²³ Ndi nya kakese kakese, bu mudi mundidimbi uya ujimina, badi bangipata bu mudibu bumusha kishi pambidi.

²⁴ Bua kujila kua biakudia, tshiena ne bukole bua kuimana kulu, didikengesha ne nzala mbinyanyisha.

²⁵ Ndi tshintu tshidibu bapepeja, padibu bantangila, badi banseka.

²⁶ Maweja-Nangila Mvidi Mukulu wanyi, ungambuluishe, unsungidile bua malu ebe mimpe.

²⁷ Bua bamanye ne: wewe ke udi muenze, wewe Maweja-Nangila ke udi mungenzele bualu ebu.

²⁸ Nansha bobu bantshipe, kadi wewe udi ungela lupemba. Bobu banduishe, bundu bubakuate, kadi meme muntu webe, ngikale ne disanka.

²⁹ Bua badi bansonguela, lumu luabu lupuke bu kazaku, bafue bundu bu muntu mudibuikile tshilamba!

³⁰ Nensakidile Maweja-Nangila ne diyi dikole, nemmutumbishe munkatshi mua tshisumbu tshia bantu.

³¹ Bualu udi wakuila mupele bua kumusungidila, kudi badi bakeba kumushipa.