Misambu 103 - MUKANDA WA MYIDI MUKULU

Ndi musue kuela Maweja-Nangila tuasakidila

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Ndi musue kuela Maweja-Nangila tuasakidila, ndi musue kuela Mvidi Mukulu tuasakidila ne muoyi wanyi onsu.

² Eyowa, ndi musue kuela Maweja-Nangila tuasakidila, tshiena ndekela kuvuluka bualu buende buimpe nansha bumue.

³ Yeye ke udi umbuikidila malu mabi anyi onsu, ondapa masama anyi onsu,

⁴ yeye ke udi unsungidila ku lufu, umbumbuila dinanga ne luse.

⁵ Udi umpetesha diakalenga divule matuku onsu andi panu, udi umpingaja nsongalume, ndi ne bukole bu bua nyunyi wa tshiminyi udi ubuka.

⁶ Maweja-Nangila udi ukosa nsambu pa yoyi, udi ulumbuluila bantu badibu bakengesha.

⁷ Uvua muleje Moshe mapangadika ende, ne bena Izrayele malu ende a lumu.

⁸ Maweja-Nangila udi luse ne dinanga, kena upia tshiji lukasa, udi ne luse lua bungi.

⁹ Kena utanda misangu yonsu, kena ushala ne tshiji kashidi to.

¹⁰ Kena utupesha dinyoka didi diakanangane ne mibi yetu to, kena utupesha difutu didi dikumbanangane ne malu mabi etu nansha.

¹¹ Bu mudi diulu dilunguluka pa mutu pa buloba, ke mudi malu ende mimpe, amueneka kudi bantu badi bamunemeka.

¹² Udi umbusha malu etu mabi, wasemeja kule netu, bu mudi luseke ludi diba dipatukila, lusemena kule ne luseke ludi diba dibuelela.

¹³ Maweja-Nangila udi unanga bantu bende badi bamunemeka, bu mudi tatu unanga bana bende.

¹⁴ Yeye udi mumanye tshitudi, udi uvuluka ne tudi bafuka ne lupuishi.

¹⁵ Matuku a muntu a panuapa adi bu tshisosa tshia mu budimi, tshidi tshiela nzeba,

¹⁶ kadi padi lupepela lua luya lutshipitshila, tshidi tshifua tshijima, katshiyi tshimanyika muaba uvuatshi.

¹⁷ Kadi malu mimpe a Maweja-Nangila adi ashala bikondu bionsu kudi badi bamunemeka. Buakane buende budi bujama kudi bana ba bana babu,

¹⁸ pikalabu banemeka ndondu, bavuluka mikenji yende bua kuyilonda.

¹⁹ Maweja-Nangila mmujadike nkuasa wende wa bukalenga mu diulu, ukokesha bintu bionsu.

²⁰ Nuenu batumibue ba Mvidi Mukulu, nuenu badi benza tshidiye wamba ne bukole buonsu, ne badi bamutumikila, elayi Maweja-Nangila tuasakidila.

²¹ Nuenu tshikulu tshia bena mudimu bende, badi benza tshidiye musue, elayi Maweja-Nangila tuasakidila.

²² Nuenu bifukibue biende bionsu, bidi mu miaba yonsu ya bukalenga buende, elayi Maweja-Nangila tuasakidila. Ne meme kabidi ndi ngamba ne: “Maweja-Nangila, tuasakidila.”