Misambu 101 - MUKANDA WA MYIDI MUKULU

Mukalenga udi uditshipa kumpala kua Mvidi Mukulu ne: neanemeke buakane

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Nganji kuimbila malu mimpe ne buakane. Maweja-Nangila wewe ke undi musue kutumbisha.

² Ndi nnanukila bua kulonga, njila wa nsombelu muakane. Wewe neufike kundi difuku kaayi? Nengende ne muoyi muakane, munkatshi mua bantu badi bannyunguluka.

³ Tshiena mua kuteka tshintu tshibi ku mesu kuanyi. Ndi mubenge nsombelu wa bantu babi, kena mua kundamata.

⁴ Tshiena musue kumanya bualu bubi, bivi nembipatshile pa bule.

⁵ Nempuwishe bantu badi bajana bakuabu mu musokoku. Tshiena mua kubuikidila bantu badi bapetula bakuabu, ne badi baditambisha.

⁶ Mu ditunga nentangile muntu undi mua kutekemena, bua kusombaye nanyi muaba umue; ne muntu udi ne nsombelu muimpe, neangambuluishe mu mudimu.

⁷ Muntu udi udinga kena usomba mu nzubu muanyi. Muntu udi ushima kena ujalama kumpala kuanyi.

⁸ Dinda dionsu nempuwishe bantu babi bonsu ba mu ditunga, bua kumusha bantu babi bena malu mabi mu tshimenga tshia Maweja-Nangila.