Matayi 9 - MUKANDA WA MYIDI MUKULU

Yezu udi ujikija disama dia muena tuneke

¹ Yezu kubuela mu buatu, kupingana dishiya dia dijiba. Kuyaye mu tshimenga tshiabu.

² Bantu kufika ne muena tuneke muladike pa bulalu. Yezu umona ditaba dia bantu abu, kuambilaye muena tuneke ne: — Muananyi, kolesha muoyi! Mibi yebe mmimane kujimina!

³ Ke balongeshi bakuabu ba mikenji kuambilangana ne: — Muntu ewu udi upenda Mvidi Mukulu!

⁴ Yezu umanya meji avuabu bela, kubakonkaye ne: — Nudi nuela meji mabi munda muenu bua tshinyi?

⁵ Tshidi tshitekete mua kuamba ntshinyi: “Mibi yebe mmimane kujimina,” anyi “Juka, enda?”

⁶ Kadi ndi musue bua numanye ne: Muana wa muntu udi ne bukole bua kujimija mibi pa buloba. Ke Yezu kuambila muena tuneke ne: — Juka, ambula bulalu buebe, pingana kuebe!

⁷ Muntu awu kujuka, kuya kuende.

⁸ Bantu bamona bualu abu, kutshinabu bikole. Kutumbishabu Mvidi Mukulu, bualu mmupeshe bantu bukole bua mushindu ewu.

Yezu udi ubikila Matayi

⁹ Yezu kumuka muaba awu, kumona muntu musombe ku nzubu kuvuabu balambuila bitadi. Dina dia muntu awu mMatayi. Yezu kumuambila ne: — Undonde! Nanku Matayi kujuka, kumulonda.

¹⁰ Ke Matayi kuakidila Yezu ku nzubu kuende. Balambuishi ba bitadi ba bungi, ne bantu bakuabu kabidi bavua ne lumu lubi, kufikabu bua kudia ne Yezu, kabidi ne balongi bende, ku mesa.

¹¹ Baparushe bamona nanku, kukonkabu balongi ba Yezu ne: — Mudi mfumuenu udia ne balambuishi, kabidi ne bena buenzayi mmunyi?

¹² Yezu umvua nanku, kubandamuna ne: — Bantu badi ne bukole bua mubidi, kabena bakengela munganga to. Anu badi basama ke badi bamukengela.

¹³ Nuye kuela meji bua kumvua tshidibu bafunde mu Mukanda wa tshijila ne: “Ndi musue bua nufuilangane luse. Tshiena njinga bua nundambule nyama nansha.” Bualu tshiena umvue bua kubikila bantu bimpe, kadi anu babi.

Badi bakonka Yezu bua dijila dia biakudia

¹⁴ Ke balongi ba Yowanane-Batiste kusemena kudi Yezu, bamukonka ne: — Tuetu ne Baparushe, tudi tujila biakudia misangu mivule. Kadi balongi bebe kabena babijila bua tshinyi?

¹⁵ Ke Yezu kubakonka ne: — Nudi nuela meji ne: bantu batshidi basomba ne musedianganyi mu tshibilu tshia dibaka, badi mua kubungama anyi? Nansha kakese! Kadi matuku adibu bumusha musedianganyi, nebajile biakudia.

¹⁶ Muntu kena mua kulamika tshitetela tshia ku tshilamba tshipiatshipia ku tshilamba tshikulukulu to. Bualu tshitetela etshi netshipande tshilamba tshikulukulu. Nanku muaba uvua mupandike neudiunde.

¹⁷ Kabidi kabena mua kuela maluvu a nwinyo mapiamapia mu milondu ya biseba mikulukulu to. Bualu milondu ya biseba neyitayike, maluvu apumuke. Nanku milondu neyinyanguke. Kadi bua kulama bionsu bibidi bimpe, badi bela maluvu mapiamapia mu milondu ya biseba mipiamipia.

Nsongakaji, muana wa mfumu wa bena Yuda, ne mukaji udi ulenga ku tshilamba tshia Yezu

¹⁸ Patshivua Yezu ubambila malu awu, mfumu kampande wa bena Yuda kufika. Kutuaye binu kumpala kua Yezu, umuambila ne: — Muananyi wa bakaji utshidi ukula muoyi amu mpindiewu. Katuye, umutenteke tshianza. Nanku neapete muoyi.

¹⁹ Ke Yezu kujuka, kulonda mfumu awu, pamue ne balongi bende.

²⁰ Mukaji mukuabu uvua ukenga ne disama dia mashi a muyeya bidimu dikumi ne bibidi. Kusemenaye panyima pa Yezu, kulengaye ku luzemba lua tshilamba tshiende.

²¹ Uvua wela meji ne: “Meme mulenge anu ku tshilamba tshia Yezu, disama dianyi nedijike.”

²² Yezu ukudimuka, umona mukaji awu, kumuambilaye ne: — Muananyi, kolesha muoyi! Disama diebe ndimane kujika, anu bua ditaba diebe! Anu pinapu, disama dia mukaji awu kujikadi.

²³ Yezu kufika ku nzubu kua mfumu wa bena Yuda. Kumonaye bimbi ba bisanji bamane kudilongolola bua kujika muntu uvua mufue. Kumonaye kabidi bantu ba bungi bateka mutoyi.

²⁴ Ke kubambilaye ne: — Patukayi, muana kena mufue to, mmulale. Bantu abu kumuseka.

²⁵ Bamane kupatula bantu bonsu pambelu, Yezu kubuela mu nzubu, kukuata muana ku tshianza, muana kujuka.

²⁶ Lumu lua bualu ebu kumvuika mu ditunga dijima adi.

Yezu udi utabeja bampofu babidi

²⁷ Yezu kumuka muaba awu. Bampofu babidi kumulonda, benda bela mbila ne: — Muana wa Davide, utufuile luse!

²⁸ Yezu mumane kubuela mu nzubu, bampofu abu kusemena kudiye. Yezu kubakonka ne: — Nudi nuitaba ne: meme ndi mua kuenza bualu ebu anyi? Kumuandamunabu ne: — Eyowa, Mfumu.

²⁹ Ke Yezu kulenga mesu abu, wamba ne: — Binuenzekele bu mudi ditaba dienu!

³⁰ Mesu abu kutabala. Yezu kubakandika ne diyi dikole ne: — Telejayi bimpe: muntu kamanyi bualu ebu to.

³¹ Kadi kuyabu kutangalaja lumu lua Yezu mu ditunga dijima adi.

Yezu udi wakuisha kamama

³² Patshivuabu baya, kufikabu kudi Yezu, ne muntu uvua kamama, bualu uvua ne mukishi mubi.

³³ Anu Yezu wipata mukishi mubi awu, kamama kutuadija kuakula. Bantu bonsu kukema bikole, bamba ne: — Katshia katuena banji kumona bualu bua mushindu ewu mu Izrayele!

³⁴ Kadi Baparushe kuamba ne: — Muntu ewu udi wipata mikishi mibi ayi, bualu mmupete bukole kudi mfumu wa mikishi mibi!

Yezu udi ufuila bantu luse

³⁵ Yezu uvua upitshila mu bimenga bionsu ne mu misoku yonsu. Uvua ulongesha mu nzubu ya kutendelela ya bena Yuda. Uvua wenda wambila bantu Lumu lua Disanka lua Bukalenga bua Mvidi Mukulu. Uvua ujikija masama ne matekete onsu a bantu.

³⁶ Ke Yezu kumvua luse bua bungi bua bantu bavuaye mumone, bualu bavua bapungile, bakengakana, bu mikoku idi kayiyi ne mulami.

³⁷ Nanku Yezu kuambila balongi bende ne: — Bintu bia kunowa bidi bia bungi, kadi bena mudimu badi mua kubinowa mbakese.

³⁸ Lombayi kudi muena budimi, bua atume bena mudimu bakumbane bua kubinowa.