Matayi 7 - MUKANDA WA MYIDI MUKULU

Kanutangidi bantu bakuabu bu bantu babi

¹ — Kanutangidi bantu bakuabu bu bantu babi, bua Mvidi Mukulu kanutangidi kabidi nanku.

² Mushindu unudi nulumbuluisha bakuabu, Mvidi Mukulu neanulumbuluishe kabidi nanku. Neanupime munudi nupimangana.

³ Udi utangila anu kasosa mu disu dia muanenu, kuyi umona mutshi munene udi mu disu diebe bua tshinyi?

⁴ Mmunyi muudi mua kuambila muanenu ne: “Semena apa, nkumushe kasosa mu disu,” kadi wewe ne mutshi munene mu diebe disu!

⁵ Muena mpala ibidi we, bangabanga umusha mutshi munene mu disu diebe, nenku neumone bimpe bua kumusha kasosa kadi mu disu dia muanenu.

⁶ — Tshintu tshia tshijila, kanutshieledi mbua, bua kayinukudimukidi, ikebe kunusuma. Kanueledi ngulube busanga, bua kayibudiatakaji.

Lombayi, kebayi, kokolayi ku tshiibi

⁷ — Lombayi, nebanupeshe; kebayi, nenusangane; kokolayi, nebanunzuluile tshiibi.

⁸ Bualu muntu yonsu udi ulomba, udi upeta. Udi ukeba, udi usangana. Udi ukokola, badi bamunzuluile tshiibi.

⁹ Nganyi wa kunudi udi mua kupesha muanende dibue, padiye umulomba diampa?

¹⁰ Nansha umupesha nyoka, padiye umulomba kanyinyi ka mu mayi?

¹¹ Nuenu bantu babi, nudi nupesha bana benu bintu bimpe. Tatu wenu udi mu diulu kena mua kupesha badi bamulomba bintu bimpe bipite anyi?

¹² — Enzelayi bakuabu bionsu binudi basue bua banuenzele. Ke bidi mikenji ya Moshe mufundila, ke bidi bambi banulongesha.

Mushiku wa mbelu mubumbakane

¹³ — Buelelayi ku mushiku wa mbelu mubumbakane. Bualu mushiku wa mbelu mubaluluke, ne njila mualabale, ke bidi bifikisha bantu ku kabutu. Bantu bavule badi bendela mu njila amu.

¹⁴ Kadi mushiku wa mbelu mubumbakane, ne njila mufimpakane, ke bidi bifikisha bantu ku muoyi. Amu bantu bakese ke badi bendela mu njila amu.

Bambi ba dishima

¹⁵ — Nuadimukilayi bambi ba dishima. Badi bafika kunudi, badileja bu mikoku, kadi munda muabu bikale nyama midianganyi.

¹⁶ Nenubamanyine anu ku malu adibu benza. Kabatu bapola tumuma tua mutshi wa nwinyo ku mingonga, nansha bimuma bia mfiku ku muonji wa mpesa.

¹⁷ Mutshi muimpe onsu udi ukuama bimuma bimpe; kadi mutshi mubi udi ukuama bimuma bibi.

¹⁸ Mutshi muimpe kawena mua kukuama bimuma bibi, kabidi mutshi mubi kawena mua kukuama bimuma bimpe to.

¹⁹ Mutshi onsu udi kauyi ukuama bimuma bimpe, nebaukose, bawele muiku.

²⁰ Nenku nenumanyine bambi ba dishima ku malu adibu benza.

Tshiudi wamba, utshikumbaje

²¹ — Bantu badi bambikila ne: “Mfumu, Mfumu,” kabena babuela bonsu mu Bukalenga bua mu diulu to, amu badi benza tshidi Tatu wanyi udi mu diulu musue.

²² Pafika dituku dia tshilumbuluilu, ba bungi nebangambe ne: “Mfumu, Mfumu, tuvua bamanyishe bantu malu a Mvidi Mukulu mu dina diebe, tuvua bipate mikishi mibi mu dina diebe, kabidi tuvua benze bishima bia bungi mu dina diebe!”

²³ Kadi dituku adi, nembajukuile ne: “Meme tshiena munumanye to! Nudi bena buenzayi! Umbukayi kundi!”

Lusumuinu lua bibaki babidi

²⁴ — Nenku muntu yonsu udi unteleja, wenza bindi ngamba ebi, neafuanangane ne muena lungenyi, uvua muibake nzubu wende pa dibue.

²⁵ Mvula kuloka, misulu kuwula kupasalalangana, tshipepele kutuuta bikole ku nzubu. Kadi nzubu nansha kushimbuka, bualu bavua bamuibake pa dibue.

²⁶ Kadi muntu yonsu udi mumvue miaku yanyi eyi, kayi wenza tshindi ngamba, neafuanangane ne muntu udi kayi ne lungenyi, uvua muibake nzubu mu lusenga.

²⁷ Mvula kuloka, misulu kupasalala, tshipepele kutuuta bikole ku nzubu. Nzubu kushimbuka, kubutuka butubutu.

Bumfumu bua Yezu

²⁸ Yezu ujikija kuakula, bantu kushala bapuwe, bualu miaku yende ivua ibatuila ku muoyi.

²⁹ Bualu Yezu kavua ulongesha bu balongeshi bakuabu ba mikenji, uvua ulongesha ne bumfumu.