Matayi 4 - MUKANDA WA MYIDI MUKULU

Diabolu udi uteta Yezu

¹ Pashishe Mueyelu wa tshijila kufikisha Yezu mu tshipela, bua bamutetemu kudi diabolu.

² Yezu mumane kupitshisha matuku makumi anayi a munya ne butuku kayi udia, kushishaye kumvua nzala.

³ Diabolu kusemena kudiye, umuambila ne: — Pawikala Muana wa Mvidi Mukulu, ambile mabue aa andamuke mampa.

⁴ Yezu kuandamuna ne: — Mukanda wa tshijila udi wamba ne: “Muntu kena ne muoyi anu bua mampa nkayawu, kadi nangananga bua diyi dionsu didi Mvidi Mukulu wamba.”

⁵ Nanku diabolu kufikisha Yezu mu Yerushalayime, tshimenga tshia tshijila, kumuteka ku musonga wa nzubu wa Mvidi Mukulu,

⁶ umuambila ne: — Pawikala Muana wa Mvidi Mukulu, diela panshi; bualu Mukanda wa tshijila udi wamba ne: “Mvidi Mukulu neambile batumibue bende, bakuambule mu bianza biabu, bua kututshi dikasa diebe ku dibue.

⁷ Yezu kumuandamuna ne: — Mukanda wa tshijila udi wamba kabidi ne: “Kutetshi Maweja-Nangila Mvidi Mukulu webe to.”

⁸ Diabolu kufikisha Yezu kabidi pa mukuna mule mutumbuke, kumuleja makalenga onsu a pa buloba ne buneme buawu,

⁹ umuambila ne: — Nenkupe bionsu ebi, anu pawikala muntuile binu bua kunkukuila.

¹⁰ Kadi Yezu kumuandamuna ne: — Diabolu, umbuka! Bualu Mukanda wa tshijila udi wamba ne: “Kukuila Maweja-Nangila Mvidi Mukulu webe. Umuenzele amu Yeye nkayende mudimu.”

¹¹ Diba adi diabolu kumushiya. Batumibue ba Mvidi Mukulu kufika kudi Yezu, kumuenzela mudimu.

Yezu udi utuadija mudimu wende mu Ngalileya

¹² Yezu umvua ne: mbele Yowanane mu nzubu wa lukanu, kumukaye bua kuya mu Ngalileya.

¹³ Kadi kavua mushale mu Nazarete to. Kuyaye kusomba mu Kefamawume, tshimenga tshiyuabu base ku muelelu wa Dijiba dinene dia Ngalileya, mubuloba bua Zebulone ne bua Naftali.

¹⁴ Bionsu ebi bivua bienzeka bua kukumbaja bivua muambi Yeshaya mumanyishe bantu ne:

¹⁵ “Wewe, buloba bua Zebulone, wewe, buloba bua Naftali, maloba adi dishiya dia Yardene, mu njila wa ku Dijiba dinene, wewe, Ngalileya, muaba udi bantu benyi base!

¹⁶ Bantu badi basomba mu midima nebamone butooke bunene! Bantu badi basomba mu ditunga dia lufu mu midima, butooke nebubakenkele!”

¹⁷ Biangatshile tshikondu atshi, Yezu kutuadija kulongesha bantu, wamba ne: — Kudimunayi mioyi yenu, bualu Bukalenga bua mu diulu bukadi pabuipi.

Yezu udi ubikila balobi ba mishipa banayi

¹⁸ Pavua Yezu wendakana ku muelelu wa Dijiba dinene dia Ngalileya, kumonaye balobi babidi, bana ba muntu umue. Umue uvua Simone, uvuabu binyika kabidi ne: Petro, mukuabu uvua Andre. Bavua baloba mu dijiba ne bukondu buabu.

¹⁹ Yezu kubambila ne: — Ndondayi, nennuenze balobi ba bantu.

²⁰ Diakamue kushiyabu makondu abu, kuyabu nende.

²¹ Yezu mumane kuenda mutantshi, kumonaye kabidi bana bakuabu babidi ba muntu umue, Yakobe ne Yowanane, bana ba Zebede. Bavua ne tatuabu Zebede mu buatu, balongolola makondu abu. Yezu kubabikila.

²² Diakamue kushiyabu buatu, kabidi ne tatuabu, kuyabu ne Yezu.

²³ Yezu uvua wendakana mu ditunga dia Ngalileya dijima. Uvua ulongesha mu nzubu ya kutendelela, wambila bantu Lumu lua Disanka lua Bukalenga. Uvua ujikija kabidi masama ne matekete onsu avua bantu nawu.

²⁴ Mu ditunga dijima dia Siriya, kutuadijabu kuyukidilangana bualu bua Yezu. Bavua bafika kudiye ne bantu bonsu bavua kabayi bumvue bimpe, bikale ne masama ne ntatu bishilangane. Munkatshi muabu muvua bavuabu bakuate kudi diabolu, bena tshiseke, ne bena tuneke. Yezu uvua ujikija masama abu onsu.

²⁵ Bantu ba bungi bavua balonda Yezu, batumine ku Ngalileya, ku buloba bua Bimenga Dikumi, ku Yerushalayime, ku Yudeya, ne ku buloba budi dishiya dia Yardene.