Matayi 3 - MUKANDA WA MYIDI MUKULU

Yowanane-Batiste udi ulongesha

¹ Tshikondu atshi Yowanane-Batiste kuya mu tshipela tshia Yudeya. Kutuadijaye kulongeshamu,

² wamba ne: — Kudimunayi mioyi yenu, bualu Bukalenga bua mu diulu budi pabuipi!

³ Yowanane ke muntu uvuabu batele kudi muambi Yeshaya ne: “Ndi ngumvua diyi dia muntu, wela lubila mu tshipela ne: Longoluelayi Maweja-Nangila njila, numuenzele njila milulame!

⁴ Yowanane uvua uvuala bilamba bia miosa ya nyama wa kamelu, usuika mukaba wa tshiseba mu tshimonu. Uvua udia mpasu ne buitshi bua muitu.

⁵ Diba adi bantu bavua basomba mu Yerushalayime, mu ditunga dijima dia Yudeya, ne mu misoku yonsu ivua pabuipi ne Yardene, kuyabu kudi Yowanane.

⁶ Bantu abu bavua batonda mibi yabu, bantu bonsu bumvue. Nanku Yowanane uvua ubatua mu mayi a Yardene.

⁷ Yowanane umona baparushe ne basaduke bavule bafike kudiye bua abatue mu mayi, kubambilaye ne: — Nuenu, nudi nyoka! Udi munulongeshe munudi mua kupanduka ku dinyoka dia Maweja-Nangila dikadi pabuipi nnganyi?

⁸ Enzayi malu adi aleja ne: tudi basue kukudimuna mioyi yetu.

⁹ Kadi lekelayi kuela meji ne: “Tudi mua kupanduka ku dinyoka, bualu Abrahame nnkambua wetu.” Bualu ndi nnujadikila ne: mabue aa, Mvidi Mukulu udi mua kuandamuna ndelanganyi ya Abrahame!

¹⁰ Mbamane kulongolola kasuyi bua kukosela mutshi ku miji. Mutshi onsu udi kauyi ukuama tshimuma tshimpe, nebaukose, bawela mu kapia.

¹¹ Meme ndi nnutua mu mayi bua nukudimune nsombelu wenu. Kadi udi undonda panyima, neanutue mu Mueyelu wa Tshijila ne mu kapia. Yeye udi ne bukole, mumpite meme. Meme tshiena mukumbane nansha bua kumukopola bisabata biende.

¹² Yeye ke udi ne lubenji mu bianza biende, bua kupepula bisote, kushiya ntete. Neateke ntete mu diyeba. Kadi bisote neabioshe mu kapia kadi kakayi kajima.

Yowanane-Batiste udi utua Yezu mu mayi

¹³ Tshikondu atshi Yezu uvua utumina ku ditunga dia Ngalileya, uya ku musulu wa Yardene. Kufikaye kuvua Yowanane, bua amutue mu mayi.

¹⁴ Yowanane kubenga, umuambila ne: — Wewe ke uvua mua kuntua mu mayi. Kadi wewe ukadi ulua kundi!

¹⁵ Kadi Yezu kumuandamuna ne: — Kuanji kubenga to. Tuetu benze bionsu ebi, netukumbaje tshidi Mvidi Mukulu ulomba. Nanku Yowanane kuanyisha.

¹⁶ Yowanane mumane kutua Yezu mu mayi, Yezu kupatukamu diakamue. Diulu kubululuka. Yezu kumona Mueyelu wa Mvidi Mukulu upueka bu nyunyu wa nkudimba, umuikila.

¹⁷ Ke diyi kumvuika mu diulu, diamba ne: — Ewu ke Muananyi undi munange. Yeye ke udi unsankisha bikole.