Matayi 27 - MUKANDA WA MYIDI MUKULU

Badi baya ne Yezu kua Pilate

¹ Patshiatshia, bamfumu bonsu ba batuangaji, ne bakulu ba bena Yuda, kupunga diyi dia kushipesha Yezu.

² Kumusuikishabu mionji, kuyabu nende kua Pilate, muena Rome, uvua mulombodi wa ditunga adi.

Lufu lua Yudase

³ Yudase, uvua mupangile Yezu, umona ne: tubafundile Yezu tshibawu tshia lufu, kunyingalalaye. Kuyaye kupingajila bamfumu ba batuangaji ne bakulu ba bena Yuda, nkanu makumi asatu ya tshiamu tshitoke ayi.

⁴ Kubambilaye ne: — Ndi muenze bibi, mufikishe ku lufu muntu udi kayi ne bualu. Kadi kumuandamunabu ne: — Bualu buetu anyi? Abu mbualu buebe!

⁵ Yudase kuimansha nkanu ayi mu nzubu wa Mvidi Mukulu, kumukaye. Pashishe kuyaye kudiowa.

⁶ Bamfumu ba batuangaji kuangula nkanu ayi, bamba ne: — Mikenji yetu kayena mianyishe bua kuela nkanu eyi mu tshibutshilu tshia mu nzubu wa Mvidi Mukulu, bualu mmushinga mufume ku mashi a bantu.

⁷ Bobu bamane kumyuangana, kusumbabu budimi bua mufumbi wa ngesu ku nkanu eyi, bua kujikamu benyi.

⁸ Ke padibu binyika budimi abu ne ku lelu ne: “mBudimi bua mashi.”

⁹ Nanku miaku ya muambi Yirmeya kukumbanayi ya ne: “Kuangatabu nkanu makumi asatu ya tshiamu tshitoke tshia mushinga mukole (ke mushinga uvua bena Izrayele bumvuangane bua kufuta bualu buende),

¹⁰ kusumbabu nayi budimi bua mufumbi wa ngesu, bu muvua Maweja-Nangila mungambile bua kuenza.”

Pilate udi ulumbuluisha Yezu

¹¹ Yezu kuimana kumpala kua mulombodi wa ditunga adi. Awu kumuebeja ne: — Udi mukalenga wa bena Yuda anyi? Yezu kuandamuna ne: — Anu muudi muambe amu.

¹² Kadi pavua bamfumu ba batuangaji ne bakulu bamusonguela, kavua wandamuna to.

¹³ Ke Pilate kumukonka ne: — Kuena mumvue malu onsu adibu bakufunda anyi?

¹⁴ Kadi Yezu kavua mumuandamune kalu nansha kamue. Nanku mulombodi wa ditunga kukema bikole.

Badi bafundila Yezu tshibawu tshia lufu

¹⁵ Mu tshibilu tshionsu tshia Dipita dia Maweja-Nangila, mulombodi wa ditunga uvua ne tshibidilu tshia kulekela muena lukanu umue, uvua bantu mua kusungula.

¹⁶ Nanku tshikondu atshi, kuvua muena lukanu wa dilambu. Dina diende Yezu Barabase.

¹⁷ Ke Pilate kukonka bantu bavua basangile muaba awu ne: — Unudi basue nnulekele, nnganyi? Yezu Barabase anyi, peshi Yezu udibu binyika ne: nKristu?

¹⁸ Bualu Pilate uvua mumanye bimpe ne: bena Yuda mbafunde Yezu kudiye anu bualu bavua nende lukuna.

¹⁹ Pavua Pilate mu kabadi ulumbuluisha, mukajende kumutumina mukenji ne: “Kubuelakanyi mu tshilumbu tshia muntu udi kayi ne bualu awu. Bualu butuku bua lelu, ndi mukenge bikole mu tshilota bualu buende.”

²⁰ Bamfumu ba batuangaji ne bakulu kuambila bantu ne: nulombe bua balekele Barabase, bafundile Yezu tshibawu tshia lufu.

²¹ Mulombodi kubakonka kabidi ne: — Ku babidi aba, unudi basue nnulekele, nnganyi? Bobu kumuandamuna ne: — Anu Barabase!

²² Ke Pilate kubebeja ne: — Kadi Yezu udibu binyika ne: Kristu, ngenze nende tshinyi? Bonsu kuandamuna ne: — Umupopele pa mutshi mutshiamakane!

²³ Pilate kubakonka ne: — Mmuenze bualu bubi kaayi? Kadi kuelabu mbila mikole mipite, bamba ne: — Umupopele pa mutshi mutshiamakane!

²⁴ Pilate umona ne: kumuena mushindu wa kutungunuka, bualu mutoyi wa bantu uvua anu wenda uvulangana, kuangataye mayi, kowaye bianza, bantu batangile, wamba ne: — Tshilumbu tshia lufu lua muntu ewu katshinkuatshi! Buenu bualu!

²⁵ Bantu bonsu kuandamuna ne: — Bua lufu luende, batunyoke amu tuetu ne bana betu!

²⁶ Nanku Pilate kubalekela Barabase, kututshisha Yezu mikaba. Kutumaye kabidi diyi bua bapopele Yezu pa mutshi mutshiamakane.

Basolayi badi baseka Yezu

²⁷ Basolayi ba Pilate kuya ne Yezu mu lubanza lua mulombodi wa ditunga. Kunguilabu bonsu muaba uvua Yezu.

²⁸ Kuvulabu Yezu bilamba, kumuvuadika tshinkutu tshikunze.

²⁹ Pashishe kujingabu tshikata tshia mionji ya meba, kumuasa ku mutu. Kumupeshabu dilenga mu tshianza tshiende tshia balume. Bavua batua binu kumpala kuende, bamuseka ne: — Muoyi, mukalenga wa bena Yuda!

³⁰ Bavua bamutuila mate, bangata dilenga, bamufuta nadi ku mutu.

³¹ Bobu bamane kumuseka, kumuvulabu tshinkutu, kumuvuadika bilamba biende, kuya nende bua bamupopele pa mutshi mutshiamakane.

Badi bapopela Yezu

³² Pavuabu bumuka mu tshimenga, kusangilabu ne muntu wa mu musoku wa Sirene. Dina diende nSimone. Basolayi kumukolela bua ambule mutshi mutshiamakane wa Yezu.

³³ Kufikabu pa muaba udibu binyika ne: Ngolgota, mmumue ne: “Muaba wa Kabalubalu”.

³⁴ Muaba awu kupeshabu Yezu nwinyo, musambakaja ne bintu bia bululu. Yezu ulabula, kubengaye mua kunua.

³⁵ Kumupopelabu pa mutshi mutshiamakane. Kuabanyanganabu bilamba biende, bilondeshile muvuabu batshinke.

³⁶ Pashishe kusombabu muaba awu bua kumulama.

³⁷ Kufundabu pa dibaya miaku idi ileja bualu buvuabu bamushipele ne: “Ewu Yezu, mukalenga wa bena Yuda.” Kupopelabu dibaya adi pa mutshi mutshiamakane kulu kua mutu wende.

³⁸ Pashishe bavua bapopela kabidi bivi babidi pa mitshi mitshiamakane, ewu ku dia balume, mukuabu ku dia bakaji dia Yezu.

³⁹ Bantu bavua bapitshila muaba awu, bavua bashikula mutu, bapenda Yezu,

⁴⁰ bamba ne: — Wewe uvua musue kuupula nzubu wa Mvidi Mukulu, kuasulula mukuabu mu matuku asatu. Nanku dipandisha wewe muine. Pawikala Muana wa Mvidi Mukulu, tuluka ku mutshi mutshiamakane!

⁴¹ Bamfumu ba batuangaji, balongeshi ba mikenji, ne bakulu, bavua bamuseka kabidi, bamba ne:

⁴² — Yeye ewu uvua musungidile bantu bakuabu. Kadi kena mua kudisungidila bua tshinyi? Yeye kena mukalenga wa Izrayele anyi? Atuluke mpindiewu ku mutshi mutshiamakane, netumuitabe!

⁴³ Uvua mutekemene kudi Mvidi Mukulu. Nanku bu Mvidi Mukulu umunanga bushuwa, amusungidile mpindiewu! Bualu uvua ujadika ne: “Ndi Muana wa Mvidi Mukulu.”

⁴⁴ Bivi bavuabu bapopela pa mitshi mitshiamakane pabuipi ne Yezu, bavua bamupenda kabidi amu nanku.

Yezu udi ufua

⁴⁵ Munda munya, midima kuenzeka mu ditunga dijima. Kunengayi meba asatu.

⁴⁶ Pa diba disatu dia musendamu, Yezu kuela diyi dikole ne: — Eli, Eli, lama sabaktanyi? (mmumue ne: “Mvidi Mukulu wanyi, Mvidi Mukulu wanyi, wakundekela bua tshinyi?”)

⁴⁷ Bantu bakuabu bavua muaba awu bumvua nanku, kuambabu ne: — Udi ubikila Eliya!

⁴⁸ Diakamue umue wa kudibu kuya lukasa, kuambula musukulampampa, kuutuaye mu maluvu a buanji, kuusuika ku lusongu lua dilenga, kuusemejila Yezu bua anue.

⁴⁹ Kadi bantu bakuabu kuamba ne: — Indila, tutangile Eliya, ne wafika bua kumusungidila!

⁵⁰ Yezu kuela kabidi lubila lukole, kukula muoyi.

⁵¹ Diba adi, tshilamba tshiyuabu balembeleje mu nzubu wa Mvidi Mukulu kupandikatshi kulu ne panshi bitupa bibidi. Buloba kuzakala, mbuebue kuela mitanta,

⁵² nkita kubuluka. Bantu bafue ba bungi bavua bitaba Mvidi Mukulu, kubikabu.

⁵³ Kupatukabu mu nkita. Yezu mumane kubika ku lufu, kubuelabu mu tshimenga tshia tshijila tshia Yerushalayime. Bantu ba bungi bavua babamone mu tshimenga amu.

⁵⁴ Mulombodi wa basolayi muena Rome, ne basolayi bende bavua balame Yezu pamue nende, bamona muvua buloba buzakala, ne bionsu bitua bienzeka, kutshinabu bikole, bamba ne: “Muntu ewu utua Muana wa Mvidi Mukulu bulelela!”

⁵⁵ Bakaji ba bungi batua kuine aku, batangile pa bule. Bobu ke bavua balonda Yezu biangatshile ku Ngalileya bua kumuambuluisha.

⁵⁶ Munkatshi muabu mutua Mariya wa mu tshimenga tshia Magdala, Mariya mamuende wa Yakobe ne Yozefe, ne mamuende wa bana ba Zebede.

Badi bajika Yezu

⁵⁷ Dilolu, muena biuma wa mu tshimenga tshia Arimateya kufika. Dina diende Yozefe. Utua kabidi mulongi wa Yezu.

⁵⁸ Kuyaye kua Pilate bua kulomba tshitalu tshia Yezu. Nanku Pilate kuanyisha bua batshipeshe Yozefe.

⁵⁹ Awu kutshiangata, kutshikuta mu tshilamba tshipiatshipia.

⁶⁰ Pashishe kulongaye tshitalu atshi mu lukita luende lupialupia, luvuaye mumbuishe mu lubuebue. Kubungulujaye dibue dinene bua kubuikila mushiku wa lukita, kuyaye.

⁶¹ Mariya wa mu Magdala, ne Mariya mukuabu, bavua muaba awu, basombe, batangila ku lukita.

Badi balama lukita lua Yezu

⁶² Butshia dinda, mmumue ne dituku dia Dikisha, bamfumu ba batuangaji ne Baparushe kuya pamue kudi Pilate.

⁶³ Kumuambilabu ne: — Mukalenga, tudi tuvuluka muvua muena dishima ewu, pavuaye ne muoyi, muambe ne: “Kunyima kua matuku asatu, nembike ku bafue.”

⁶⁴ Nanku anyisha, utume diyi bua balame lukita too ne dituku disatu, bua balongi bende kabavu kuiba tshitalu tshiende, bambila bantu ne: “Wabiki ku bafue.” Dishima dia nanku nedikale dibi dipite dia kumpala.

⁶⁵ Pilate kubambila ne: — Ke basolayi aba. Nuye nabu, balame lukita bimpe munudi basue.

⁶⁶ Nanku kuyabu kulongolola mudimu wa kulama lukita. Kutuabu dibue divua dibuikila lukita tshitampi, kushiyabu basolayi bua balulame.