Matayi 25 - MUKANDA WA MYIDI MUKULU

Lusumuinu lua mishikankunde dikumi

¹ — Nenku Bukalenga bua mu diulu nebufuanangane ne mishikankunde dikumi, ivua miangate miendu yayi, bua kuya kuakidila muntu uvua mubuele mu dibaka dituku adi.

² Mishikankunde itanu isua mipote, mikuabu itanu ivua midimuke.

³ Mipote isua miangate miendu, kadi kayivua miangate mafuta makuabu.

⁴ Kadi midimuke isua miangate miendu, miangate ne milangi ya mafuta.

⁵ Pine apu musedianganyi kavua mufike lukasa to. Mishikankunde yonsu kubunga ne tulu, kulala.

⁶ Mundankulu, kuelabu lubila ne: “Musedianganyi ukadi ufika. Jukayi! Nuye kumuakidila.”

⁷ Nenku mishikankunde yonsu ayi kujuka ku tulu, kulongolola miendu yayi.

⁸ Mipote ayi kulomba ivua midimuke ne: “Tupeshayiku enu mafuta, bualu miendu yetu idi ikeba kujima.”

⁹ Midimuke kuandamuna ne: “Too! Bualu mafuta kaena mua kutukumbana nenu to. Nanku mbimpe nuye kudi bapanyishi, nuye kusumba enu.”

¹⁰ Nenku kuyayi bua kusumba mafuta. Kadi diba adi musedianganyi kufika. Mishikankunde isua mimane kudilongolola, kubuela nende mu nzubu wa dibaka. Kukangabu tshiibi tshia kumbelu.

¹¹ Pashishe mishikankunde mikuabu kufika payi, ikokola ne: “Mfumu, mfumu, utunzuluile!”

¹² Kadi musedianganyi kuandamuna ne: “Ndi nnujadikila bulelela ne: tshiena munumanye to.”

¹³ Nenku ikalayi batabale, bualu kanuena bamanye nansha dituku, nansha diba.

Lusumuinu lua bena mudimu basatu

¹⁴ — Bidi bu muntu uvua ukeba kuya ku luendu. Kubikilaye bena mudimu bende. Kubashilaye bintu biende.

¹⁵ Uvua mushile umue nkanu ya mpawungi nkama itanu, mukuabu nkanu nkama ibidi, muisatu nkanu lukama, bilondeshile bukole buvua yonsu mua kukuata nabu mudimu. Pashishe kuyaye ku luendu.

¹⁶ Muena mudimu uvua mupete nkanu nkama itanu, diakamue kuya kuenduluka nayi. Kupetaye minga nkanu nkama itanu.

¹⁷ Uvua mupete nkanu nkama ibidi, kuenza kabidi momumue. Kupetaye minga nkama ibidi.

¹⁸ Kadi uvua mupete nkanu lukama, kuyaye kumbula tshiina mu buloba, kusokokamu nkanu ya mfumuende ayi.

¹⁹ Matuku mavule apita, mfumu wa bena mudimu aba kupingana, kubadika bintu ne bena mudimu bende.

²⁰ Muena mudimu uvua mupete nkanu nkama itanu, kusemena kudi mfumu, kumuleja minga nkanu nkama itanu, wamba ne: “Mfumu, uvua munshile nkanu nkama itanu. Angataku minga nkama itanu eyi indi mupete.”

²¹ Mfumuende kumuandamuna ne: “Bimpe, muena mudimu wanyi muimpe, muitabi wa ku diyi dianyi. Uvua mukumbaje bimpe mudimu webe ne bintu bikese bindi mukushile. Nanku nenkushile bidi ne mushinga wa bungi. Buelaku mu tshibilu tshianyi, tusanke nebe.”

²² Pashishe uvua mupete nkanu nkama ibidi, kusemena kabidi, wamba ne: “Mfumu, uvua munshile nkanu nkama ibidi. Angataku minga nkama ibidi eyi indi mupete.”

²³ Mfumuende kumuamba ne: “Bimpe, muena mudimu wanyi muimpe, muitabi wa ku diyi dianyi. Uvua mukumbaje bimpe mudimu webe ne bintu bikese bindi mukushile. Nanku nenkushile bidi ne mushinga wa bungi. Buelaku mu tshibilu tshianyi, tusanke nebe.”

²⁴ Ku ndekelu muena mudimu uvua mupete nkanu lukama, kusemena kabidi, wamba ne: “Mfumu, mvua mukumanye muudi muntu wa malu makole. Udi unowa, paudi kuyi mukune; waka, paudi kuyi mumiamine ntete.

²⁵ Mvua ne bowa. Nanku meme kuya kusokoka nkanu yebe mu buloba. Angataku bintu biebe, mbiebi!”

²⁶ Mfumuende kuandamuna ne: “Muena mudimu mubi, wa lulengu! Uvua mumanye mundi nnowa, tshiyi mukune; ngaka, tshiyi mumiamine ntete.

²⁷ “Nanku uvua ne bua kuteka nkanu yanyi mu nzubu wa bantu bavua mua kuenduluka nayi, bua mu dipingana dianyi ngapeta nkanu yanyi, ne mikuabu ya kasombela.

²⁸ Nenku munyengayi nkanu idiye nayi. Nuyifde kudi muntu udi ne nkanu nkama itanu.

²⁹ Bualu muntu yonsu udi ne tshintu, nebamupeshe bikuabu, bua biende bivulangane bipite. Kadi udi kayi ne tshintu, nebamunyenge ne tshikese tshidiye natshi.

³⁰ Muena mudimu wa tshianana ewu, musakilayi pambelu mu midima. Adidilemu miadi, atutakaje ne menu.”

Nebatulumbuluishe bishi?

³¹ — Dituku diafika Muana wa muntu, kabidi dialejaye butumbi buende buonsu, batumibue ba Mvidi Mukulu bonsu nebikale nende. Neaye kusomba mu nkuasa wende wa butumbi.

³² Bisamba bionsu bia pa buloba nebisangile kumpala kuende. Neabuluje bantu ne bakuabu, bu mudi mulami wa nyama wabuluja mikoku ne mbuji ya mpumbu.

³³ Neateke mikoku ku diende dia balume, mbuji ya mpumbu ku diende dia bakaji.

³⁴ Nenku mukalenga neambile bantu badi ku diende dia balume ne: “Vuayi, nuenu badi Tatu wanyi muele lupemba. Angatayi Bukalenga buvuabu banulongoluele, katshia bafuka bukua panu.

³⁵ Bualu mvua ne nzala, nuenu kumpesha tshiakudia. Mvua ne nyota, nuenu kumpesha tshiakunua. Mvua muenyi, nuenu kumbueja mu nzubu muenu.

³⁶ Mvua butaka, nuenu kumvuadika tshilamba. Mvua nsama, nuenu kunkumbula. Mvua mu lukanu, nuenu kuvua kunsamba.”

³⁷ Bantu ba malu mimpe nebamukonke ne: “Mfumu, diba kaayi dimvua bakumone, wewe ne nzala, tuetu kukupesha tshiakudia, nansha ne nyota, tuetu kukupesha tshiakunua?

³⁸ Diba kaayi dituvua bakumone wewe muikale muenyi, tuetu kukubueja mu nzubu, nansha wewe muikale butaka, tuetu kukuvuadika tshilamba?

³⁹ Diba kaayi dituvua bakumone wewe usama, nansha mu lukanu, tuetu kuvua kukusamba?”

⁴⁰ Mukalenga neabandamune ne: “Ndi nnujadikila bulelela ne: bilenga bionsu binuvua benzele umue wa ku bana betu bakese aba, ke meme unuvua babienzele.”

⁴¹ Pashishe mukalenga neambile bantu badi ku diende dia bakaji ne: “Umbukayi pandi, nuenu badi Mvidi Mukulu muele mulawu! Nuye mu kapia ka tshiendelele, kavuabu balongoluele diabolu ne batumibue bende!

⁴² Bualu mvua ne nzala, nuenu nansha kumpesha tshiakudia: Mvua ne nyota, nuenu nansha kumpesha tshiakunua.

⁴³ Mvua muenyi, nuenu nansha kumbueja mu nzubu. Mvua butaka, nuenu nansha kumvuadika tshilamba. Mvua nsama, nansha mu lukanu, nuenu nansha kuvua kunkumbula.”

⁴⁴ Bobu kabidi nebamukonke ne: “Mfumu, diba kaayi dituvua bakumone wewe ne nzala, ne nyota, kuyi ne nzubu, muikale butaka, usama, muikale mu lukanu, tuetu kubenga ku-kuambuluisha?”

⁴⁵ Mukalenga neabandamune ne: “Ndi nnujadikila bulelela ne: bilenga bionsu binuvua kanuyi benzele umue wa ku bakese aba, ke meme mene unuvua babenge kubienzela.”

⁴⁶ Bavua benza bibi aba, nebaye mu dinyoka dia tshiendelele. Bavua benza bimpe, nebaye mu muoyi wa kashidi.