Matayi 20 - MUKANDA WA MYIDI MUKULU

Bena mudimu mu budimi bua nwinyo

¹ — Umvuayi: Bukalenga bua mu diulu mbufuanangane ne muena budimi uvua mumuke kuende ne dinda dionsu, bua kuangata bantu ku mudimu, bua badime budimi buende bua nwinyo.

² Uvua mumvuangane nabu bua kubateta difutu divua muena mudimu ne bua kupeta, lukanu lumue lua tshiamu tshitoke tshia mushinga mukole ku dituku. Ke kubatumaye bua badime budimi buende bua nwinyo.

³ Kupatukaye kabidi mu njila diba dia tshitema. Kumonaye bantu bakuabu bimane mu tshisalu, kabayi ne mudimu wa kuenza.

⁴ Kubambilaye ne: “Nuenu kabidi nuye kukuata mudimu mu budimi buanyi bua nwinyo. Nennutete difutu dikumbane.”

⁵ Ke kuyabu. Muena budimi kupatuka kabidi munda munya, pashishe ku diba isatu wa dilolu, kuenzaye anu momumue.

⁶ Kupatukaye kabidi ku diba itanu wa dilolu, kusanganaye bantu bakuabu bimane mu tshisalu. Kubakonkaye ne: “Dituku dijima nudi amu muaba ewu, kanuyi nukuata mudimu bua tshinyi?”

⁷ Bobu kumuandamuna ne: “Bualu muntu ki mmutuangate ku mudimu to.” Ke yeye kubambila ne: “Nanku nuenu kabidi nuye kukuata mudimu mu budimi buanyi bua nwinyo.”

⁸ Dilolu dikumbana, muena budimi bua nwinyo kuambila mfumu wa bena mudimu ne: “Ubikile bena mudimu, ubafute difutu diabu. Utuadije ne bantu ba ndekelu bamvua muangate ku mudimu. Neujikije ne bantu bamvua muangate kumpala.”

⁹ Nanku bavua batuadije mudimu pa diba itanu wa dilolu, kufikabu. Muntu yonsu kuangata lukanu lumue.

¹⁰ Pavua, bavuabu bangate ku mudimu kumpala, bafike, bavua bela meji ne: netupete bipite bia bakuabu. Kadi bavua bapete pabu muntu yonsu lukanu lumue.

¹¹ Kadi, bamane kupeta difutu diabu, kutontololabu bivua muena budimi bua nwinyo muenze,

¹² bamuambila ne: “Udi mutete bena mudimu, bauvua muangate ku mudimu ku ndekelu, difutu dia momumue ne dietu. Kadi bobu bavua bakuate mudimu amu diba dimue. Tuetu tuvua bakuate mudimu mu munya mukole dituku dijima!”

¹³ Kadi muena budimi kuandamuna umue wa kudibu ne: “Mulunda wanyi, tshiena mudie kantu kebe to. Kuvua muitabe bua kukuata mudimu, kupeta lukanu lumue ku dituku anyi?

¹⁴ Nanku, angata difutu diebe, umbuka. Ndi musue kufuta muntu umvua muangate ku mudimu ku ndekelu difutu dia momumue ne diebe.

¹⁵ Tshiena mua kuenza mundi musue ne nkanu yanyi anyi? Udi umvua lubabu, bualu ndi ne muoyi muimpe anyi?”

¹⁶ Ke Yezu kuamba kabidi ne: nanku ba ndekelu nebikale ba kumpala; ba kumpala nebikale ba ndekelu.

Yezu udi umanyisha musangu muisatu bua lufu ne dibika diende

¹⁷ Yezu uvua ubanda ku Yerushalayime. Uvua amu ne balongi bende dikumi ne babidi. Pavuabu baya nkayabu mu njila, uvua ubambila ne:

¹⁸ — Telejayi. Tudi tubanda ku Yerushalayime. Muana wa muntu nebamufile mu bianza bia bamfumu ba batuangaji, ne bia balongeshi ba mikenji. Nebamufundile tshibawu tshia lufu.

¹⁹ Nebamufile mu bianza bia benyi. Bantu abu nebamuseke, nebamufute mikaba, nebamupopele pa mutshi mutshiamakane. Kadi papita matuku asatu, neabike ku lufu.

Mamuende wa Yakobe ne Yowanane

²⁰ Ke mukaji wa Zebede kusemena ne bana bende kudi Yezu. Kudielaye panshi, bu muntu udi musue kulomba tshintu.

²¹ Ke Yezu kumukonka ne: — Tshiudi ujinga ntshinyi? Mamu awu kumulomba ne: — Pawatuadija bukalenga buebe, anyisha bua bana banyi ba balume aba basombe ewu ku diebe dia balume, munga ku diebe dia bakaji.

²² Yezu kuandamuna ne: — Kanuena bajingulule tshinudi nulomba nansha. Dikopu dia dikenga dinganua, nudi mua kudinua anyi? Bobu kumuandamuna ne: — Tudi mua kudinua.

²³ Ke Yezu kubambila ne: — Bushuwa, nenunue dikopu dianyi. Kadi meme tshiena mua kujadika udi mua kusomba ku dianyi dia balume, nansha ku dianyi dia bakaji. Nebasombemu kudi bantu badi Tatu mulongoluele miaba eyi.

²⁴ Balongi bakuabu dikumi bumvua bualu abu, kufikilabu balongi babidi aba bena muntu munda.

²⁵ Ke Yezu kubabikila bonsu, wamba ne: — Nudi bamanye ne: bamfumu ba bisamba bikuabu badi batumina bantu babu diyi dia bumfumu. Bantu banene kabidi badi baleja bantu mudibu bamfumu.

²⁶ Kadi munkatshi muenu kabiena mua kuenzeka nanku to. Wa kunudi udi musue kuikala ne muanzu, ikala muena mudimu wenu.

²⁷ Wa kunudi udi musue kuikala ku mutu kua bonsu, ikala mupika wenu.

²⁸ Nanku Muana wa muntu kena mufike bua bamuenzele mudimu, kadi amu bua kukuatshila bantu bakuabu mudimu, ne bua kufila muoyi wende bua kupikula bantu ba bungi.

Yezu udi utabeja mpofu ibidi

²⁹ Yezu umuka ne balongi bende mu Yeriko, bantu ba bungi kubatonda.

³⁰ Mpofu ibidi ivua misombe ku muelelu wa njila. Pumvuyi ne: Yezu udi upita, kuelayi mbila ne: — Mfumu, Muana wa Davide, utumvuile luse!

³¹ Bantu kukanyina mpofu ayi bua ipuwe. Kadi ivua amu yela mbila mikole mipite ne: — Mfumu, Muana wa Davide, utumvuile luse!

³² Ke Yezu kuimana, kuyibikila, kuyikonka ne: — Nudi basue, nnuenzele tshinyi?

³³ Mpofu kuandamuna ne: — Mfumu, mesu etu atabale!

³⁴ Yezu kuyumvuila luse, kulenga mesu ayi. Bantu babidi aba kutabala diakamue, kutonda Yezu.