Matayi 18 - MUKANDA WA MYIDI MUKULU

Udi mupite bakuabu nnganyi?

¹ Diba adi balongi kusemena kudi Yezu, bamukonka ne: — Udi mupite bakuabu mu Bukalenga bua mu diulu nnganyi?

² Yezu kubikila muana, kumuimanyika munkatshi muabu,

³ wamba ne: — Ndi nnujadikila ne: nuenu kanuyi bandamuke, badienze bu bana, kanuakubuela mu Bukalenga bua mu diulu to.

⁴ Udi mupite bakuabu mu Bukalenga bua mu diulu ngudi udipuekesha, udienza bu muana ewu.

⁵ Muntu udi wakidila muana bu ewu mu dina dianyi, udi ungakidila meme.

Badi bafikisha bantu ku bubi

⁶ — Yonsu udi wenzeja umue wa ku bana aba badi bangitaba bualu bubi, mbimpe bamusuike dibue dinene dia tshipelelu mu nshingu, bamuele muinshi mua mayi manene.

⁷ Diakabi didi panu, bualu bantu badi bafikisha bakuabu ku bubi. Malu a nanku neenzeke amu kuenzeka. Kadi diakabi ndia muntu udi wenzeja bantu bualu bubi nanku!

⁸ Pikala tshianza tshiebe, nansha dikasa diebe, bikuenzeja bubi, ubikose, ubimanshe mutantshi mule. Mbipite buimpe ubuele mu muoyi ne tshianza tshimue, nansha ne dikasa dimue, pa mutu pa wewe kuikala ne bianza bibidi, kabidi ne makasa abidi, bakuele mu kapia ka kashidi.

⁹ Pikala disu diebe dikuenzeja bubi, uditonkone, udimanshe mutantshi mule. Mbipite buimpe ubuele mu muoyi ne disu dimue, pa mutu pa wewe kuikala ne mesu abidi, bakuele mu tshikutu tshia kapia.

Lusumuinu lua mukoku mujimine

¹⁰ — Kanupepeji nansha umue wa ku badi bu bana. Ndi nnujadikila ne; batumibue ba Mvidi Mukulu, badi balama bana aba, badi mu diulu, bamonangana diba dionsu ne Tatu wanyi udi mu diulu. [

¹¹ Bualu Muana wa muntu mmuvue kusungidila bavua bajimine.]

¹² Nudi nuamba penu bishi? Padi muntu ne mikoku lukama, umue mujimina, kena ushiya mikuabu makumi tshitema ne tshitema pa mukuna, uya kukeba udi mujimina anyi?

¹³ Ndi nnujadikila ne: padiye uupeta, udi usankidila mukoku ewu bipite disanka didiye nadi bua mikoku makumi tshitema ne tshitema ivua kayiyi mijimine.

¹⁴ Ke mudi Tatuenu wa mu diulu kayi musue ne: umue wa ku badi bu bana aba ajimine.

Mutudi mua kubelangana

¹⁵ — Padi muanenu mukuenzele bibi, uye kumonangana nende bua kumuleja bubi buende. Kadi nuikale nende amu babidi. Pikalaye mukuteleje, wewe ke udi mumupingaje munkatshi muenu.

¹⁶ Kadi pikalaye kayi mukuteleje, nupingane kudiye ne muntu umue nansha babidi, bua “Bualu buonsu babujadike kudi bantu babidi nansha basatu,” mudi Mukanda wa tshijila wamba.

¹⁷ Kadi padiye kayi musue kuteleja bantu abu, muanyishe Tshisumbu tshia bena ditaba tshilumbu atshi. Padiye kayi musue kuteleja Tshisumbu tshia bena ditaba, umutangile bu muntu udi kayi witaba Mvidi Mukulu, nansha bu mulambuishi wa bitadi.

Kukandika bualu, ne kuanyisha bua babuenze

¹⁸ — Ndi nnujadikila ne: bionsu binudi nukandika pa buloba, nebabikandike ne mu diulu; bionsu binudi nuanyisha bua babienze pa buloba, nebabanyishe ne mu diulu.

¹⁹ Ndi nnujadikila kabidi ne: padi babidi ba kunudi pa buloba bumvuangane bua kulomba tshintu mu ditendelela, Tatu wanyi udi mu diulu neabapetshi.

²⁰ Bualu, muaba udi bantu babidi nansha basatu badisangisha mu dina dianyi, meme ndi munkatshi muabu.

Lusumuinu lua muena mudimu udi kayi ne luse

²¹ Ke Petro kusemena kudi Yezu, umukonka ne: — Mfumu, padi muanetu ungenzela amu bibi, ndi mua kumumvuila luse misangu bungi munyi? Yakumbana too ne ku misangu muanda mutekete anyi?

²² Yezu kumuandamuna ne: — To. Tshiena nkuambila ne: ikumbane too ne ku misangu muanda mutekete nansha. Kadi ifike too ne ku misangu makumi muanda mutekete misangu muanda mutekete.

²³ Bualu Bukalenga bua mu diulu budi mushindu ewu: Mukalenga wa ditunga uvua mushindike mua kubadika bintu biende bivua kudi bena mudimu bende.

²⁴ Amu yeye utuadija kubadika, kufikabu ne muntu uvua ne dibanza dipite bunene.

²⁵ Muntu ewu kavua ne kantu ka kuhita dibanza edi. Nanku mukalenga wende kutuma diyi bua bamupane bu mupika, bapane kabidi mukajende, bana bende, ne bionsu bivuaye nabi bua kuhita dibanza diende.

²⁶ Kadi muena mudimu awu kutua binu kumpala kua mukalenga wende, umusengelela ne: “Tukija, nenkufute bionsu!”

²⁷ Mukalenga kumvuila muena mudimu awu luse. Kuanyishaye bua aye. Kumulekelaye ne dibanza mene.

²⁸ Muena mudimu awu upatuka mu nzubu, kumonanganaye ne umue wa ku bena mudimu nende, uvua ne dibanza diende dikese. Kumukuataye mu nshingu, tunubela muminu, wamba ne: “Futa dibanza dianyi diudi nadi!”

²⁹ Muena mudimu nende kutua binu panshi ku makasa ende, umusengelela ne: “Tukija, nenkufute!”

³⁰ Kadi awu kavua musue to. Kumueleshaye mu nzubu wa lukanu, too ne pafutaye dibanza diende.

³¹ Bena mudimu nende bamona bionsu abi, kubungamabu bikole, kuyabu kulondela mukalenga wabu bivua bienzeka.

³² Nanku mukalenga kubikidisha muena mudimu awu, umuambila ne: “Wewe udi muena mudimu wa lonji. Meme kukulekela dibanza diebe dionsu, bua pauvua munsengelele.

³³ Nanku wewe kabidi uvua mua kumvuila mukuebe luse, bu mumvua meme mukumvuile.”

³⁴ Mukalenga kufika munda bikole, kufila muena mudimu awu kudi bena tshinyangu, bua banukengeshe too ne pafutaye dibanza adi dionsu.

³⁵ Yezu kushikila apa, kuamba ne: — Ke mudi Tatuanyi udi mu diulu mua kunuenzela, panudi kanuyi nulekelangana bilema ne muoyi wenu mujima.