Matayi 17 - MUKANDA WA MYIDI MUKULU

Balongi basatu mbamone butumbi bua Yezu

¹ Matuku asambombu mamane kupita, Yezu kuangata Petro, Yakobe ne Yowanane, muanabu ne Yakobe, kuya nabu ku mukuna mutumbuke. Kuine aku bavua amu nkayabu.

² Yezu kuandamuka mpala, balongi bende bamone. Mpala wende kukenka bu diba. Bilamba biende kutoka too.

³ Diakamue balongi kumona Moshe ne Eliya, bayukila ne Yezu.

⁴ Ke Petro kuambila Yezu ne: — Mfumu, ndisanka kaayi dia kuikala muaba ewu! Bu wewe musue, nengase apa ntenta isatu, umue webe, wa Moshe umue, ne munga wa Eliya.

⁵ Patshivua Petro wakula, divuba dikenka kubabuikila. Diyi kumvuika mu divuba ne: — Ewu ke Muananyi menemene, undi munange. Yeye udi unsankisha bikole. Numuteleje.

⁶ Balongi bumvue nanku, kudielabu mpala panshi. Bowa kubakuata bikole.

⁷ Ke Yezu kusemena kudibu, kubalenga, wamba ne: — Jukayi! Kanutshinyi!

⁸ Balongi babanduluka, kabatua bamona muntu mukuabu, kadi anu Yezu nkayende.

⁹ Patuabu bapueka ku mukuna, Yezu kubakandika ne: — Kanuambidi muntu malu anudi bamone aa, too ne pabika Muana wa muntu ku bafue.

¹⁰ Pashishe balongi kukonka Yezu ne: — Balongeshi ba mikenji badi balongesha ne: Eliya udi ne bua kudianza kufika, bua tshinyi?

¹¹ Yezu kuandamuna ne: — Bulelela, Eliya udi ne bua kufika bua kuakaja bionsu.

¹² Kadi ndi nnujadikila ne: Eliya ukadi mumane kufika. Bantu kabatua bamujingulula, kadi batua bamuenzela muvuabu basue. Ke muakengeshabu kabidi Muana wa muntu.

¹³ Balongi kumanya ne: udi utuambila bua Yowanane-Batiste.

Muana muena tshiseke

¹⁴ Bamane kufika pabuipi ne bantu, ke muntu kusemena kudi Yezu, kumufuila binu panshi,

¹⁵ wamba ne: — Mfumu, umtuileku muananyi wa balume luse. Udi ne disama dia tshiseke, ukenga bikole. Misangu mitule udi upaluka, udishinda mu kapia, nansha mu mayi.

¹⁶ Mvua mumufikishe kudi balongi bebe. Kadi kabatua ne bukole bua kujikija disama diende.

¹⁷ Yezu kuandamuna ne: — Nuenu nudi bantu babi, badi kabayi bitaba Mvidi Mukulu! Nenshale nenu kabidi matuku bungi munyi? Nengikale amu ndengulula malu enu too ne ku diba kaayi? Semenayi ne muana kundi apa.

¹⁸ Ke Yezu kukanyina mukishi mubi. Kupatukawu munda mua muana. Disama dia muana kujika amu pa diba adi.

¹⁹ Nanku balongi kusemena kudi Yezu pa nkayabu, bamukonka ne: — Tuetu tuvua bapange kupatula mukishi mubi ewu bua tshinyi?

²⁰ Ke Yezu kubandamuna ne: — Bualu ditaba dienu kadiena dikumbane to. Ndi nnujadikila bulelela ne: bu nuenu ne ditaba bunene bua lutete lua mutshi wa lusanga, malu onsu adi anuteketela. Diba adi, nenutumine mukuna ewu diyi ne: “Umuke apa, uye papa,” mukuna kuya! [

²¹ Kadi mukishi mubi wa mushindu ewu, badi baupatula anu ku ditendelela, ne ku dijila dia biakudia.]

Yezu udi umanyisha tshiakabidi lufu ne dibika

²² Dituku dikuabu balongi kusangila bonsu pamue mu Ngalileya. Yezu kubambila ne: — Bantu nebakuatshishe Muana wa muntu.

²³ Nebamushipe. Kadi dituku disatu neabike ku bafue. Balongi bumvue nanku, kubungamabu bikole.

Tshitadi tshia nzubu wa Mvidi Mukulu

²⁴ Yezu ne balongi bende bafike mu Kefamawume, balambuishi ba tshitadi tshia nzubu wa Mvidi Mukulu kusemena kudi Petro, bamukonka ne: — Mulongeshi wenu kena ulambula tshitadi tshia nzubu wa Mvidi Mukulu anyi?

²⁵ Ke Petro kubandamuna ne: — Eyowa, utu utshilambula. Kadi pavua Petro ubuela mu nzubu, ke Yezu kudianza kumukonka ne: — Simone, udi wela meji munyi? Panuapa, badi ne bua kuteta bakalenga ba matunga bitadi ne milambu mbanganyi? Bena diku diabu anyi, peshi mbantu bakuabu?

²⁶ Petro kuandamuna ne: — Bantu bakuabu ke badi bateta. Ke Yezu ne: — Nanku bena diabu kabena bateta nansha.

²⁷ Kadi bua katubafikishi munda, uye mu dijiba, ela ndobu. Mushipa uwadianza kukuata, uubulula mukana. Neusanganemu makuta. Uangate, uye kuteta tshitadi tshiebe, ne tshianyi.