Matayi 16 - MUKANDA WA MYIDI MUKULU

Baparushe ne Basaduke badi balomba tshishima

¹ Baparushe ne Basaduke kuya kudi Yezu bua kumuteta. Bavua bamulomba bua abaleje ne tshishima mudi bumfumu buende bufume kudi Mvidi Mukulu.

² Kadi Yezu kubandamuna ne: — Dilolu, nuenu bamona kulu kukunze, nudi nuamba ne: “Maloba nekuikale kulenga.”

³ Mu dinda, padi kulu kufikuluke, nudi nuamba kabidi ne: “Lelu mvula nealoke.” Nanku nudi bamanye mua kujingulula bidi bienzeka padi kulu kuandamuke. Kadi munudi kanuyi mua kujingulula bidi bienzeka matuku aa mbishi?

⁴ Bena lelu, nansha bobu bantu babi, badi kabayi bitaba Mvidi Mukulu, badi amu balomba tshishima. Kadi kabakubaleja tshishima tshikuabu to, amu tshia Yona. Yezu kubashiya nanku, kuya.

Balongi kabena ne lubatshi

⁵ Pavua balongi basabuka dishiya dia dijiba, bavua bapue muoyi bua kuangata mampa.

⁶ Yezu kubambila ne: — Dimukayi, kanuangatshi buanga bua mampa bua Baparushe ne Basaduke.

⁷ Balongi bumvua nanku, kuambilanganabu ne: — Udi wamba nanku, bualu katuena bangate mampa.

⁸ Yezu kumanya tshiyuabu bambilangana, kubebejaye ne: — Nudi nuamba ne: mbua patudi katuyi ne mampa, bua tshinyi? Nudi ne ditaba dikese!

⁹ Kanuena banji kujingulula malu anyi? Kanutshiena bavuluke mampa atanu, amvua mukosoluele bantu binunu bitanu, ne bisaka bia bisunsukila binuvua basangishe anyi?

¹⁰ Kanutshiena bavuluke mampa muanda mutekete, amvua mukosoluele bantu binunu binayi, ne bisaka bia bisunsukila binuvua basangishe anyi?

¹¹ Munudi kanuyi bumvue mbishi? Tshivua muakule bua mampa to! Dimukayi. Kanuangatshi buanga bua mampa bua Baparushe ne Basaduke.

¹² Ke balongi kushisha kumvua ne: kavua mubambile bua badimuke ku buanga bua mampa, kadi amu ku dilongesha dia Baparushe ne Basaduke.

Wewe udi Kristu! Wewe udi Petro!

¹³ Yezu kuya mu buloba buvua pabuipi ne tshimenga tshia Kezareya wa Filipe. Kukonkaye balongi bende ne: — Bantu badi bamba ne: Muana wa muntu nnganyi?

¹⁴ Kumuandamunabu ne: — Bamue badi bamba ne: udi Yowanane-Batiste, bakuabu ne: udi Eliya, badipu kabidi ne: udi Yirmeya, nansha muambi mukuabu.

¹⁵ Yezu kubakonka kabidi ne: — Kadi nuenu, nudi nungamba ne: ndi nganyi?

¹⁶ Simone Petro kuandamuna ne: — Wewe udi Kristu, Muana wa Mvidi Mukulu udi ne muoyi.

¹⁷ Pashishe Yezu kumuambila ne: — Wewe Simone, muana wa Yowanane, udi wa diakalenga, bualu udi mukujanduile bulelela ebu, ki mmuntu wa mubidi ne mashi to, kadi nTatu wanyi udi mu diulu.

¹⁸ Kadi meme ndi nkuambila patoke ne: wewe udi Petro, dibue. Nanku pa dibue edi nengasepu Tshisumbu tshia bantu banyi. Nansha lufu mene kaluakutshibutula to.

¹⁹ Nenkupe nsapi ya Bukalenga bua mu diulu: tshiwakandika pa buloba, nebatshikandike ne mu diulu; tshiwanyisha pa buloba, nebatshianyishe ne mu diulu.

²⁰ Pashishe Yezu kukandika balongi bende bua kabambidi muntu ne: Yezu udi Kristu.

Yezu udi umanyisha bua lufu luende ne dibika

²¹ Bituadijila ku tshikondu atshi, Yezu kubanga kumanyisha balongi bende patoke ne: — Ndi ne bua kuya mu Yerushalayime. Muine amu bakulu, batuangaji banene, ne balongeshi ba mikenji, nebankengeshe bikole. Nebanshipe, kadi dituku disatu nembike ku bafue.

²² Ke Petro kuya nende ku luseke, kutuadija kumutandisha, wamba ne: — Mfumu, Mvidi Mukulu akuepule ku bualu ebu! Bualu bua nanku kabinuenzekedi!

²³ Kadi Yezu kukudimuka, kuambila Petro ne: — Umbuka kundi, uye kule, diabolu! Udi ukeba kundenduisha! Bualu meji audi wela ki nga kudi Mvidi Mukulu to, kadi nga kudi bantu.

²⁴ Pashishe Yezu kuambila balongi bende ne: — Pikala muntu musue kuenda nanyi mu njila, anji kudibenga, ambula wende mutshi mutshiamakane, andonde.

²⁵ Bualu muntu udi musue kusungidila muoyi wende, neaujimije. Kadi wajimija muoyi wende bualu buanyi, neaupete.

²⁶ Muntu udi upeta buloba bujima, kadi ujimija muoyi wende, nebimuambuluishe ku tshinyi? Kakuena tshidi muntu mua kufila bua kupeta tshiakabidi muoyi wende.

²⁷ Bualu Muana wa muntu neafike, mu butumbi bua tatuende, pamue ne batumibue bende. Diba adi neafute muntu yonsu, bilondeshile malu avuaye muenze.

²⁸ Bulelela, ndi nnuambilamu ne: bamue batudi nabu apa, kabakufua kabayi bamona Muana wa muntu ufika mu Bukalenga buende.