Matayi 15 - MUKANDA WA MYIDI MUKULU

Bibidilu bia bankambua

¹ Diba adi Baparushe ne balongeshi ba mikenji bafumina ku Yerushalayime, kufika kudi Yezu, bamukonka ne:

² — Balongi bebe badi babenga kulonda bibidilu bia bankambua bua tshinyi? Badi badia kabayi bowe mayi ku bianza bua tshinyi?

³ Yezu kubakonka pende ne: — Kadi nuenu nudi nubenga kukumbaja tshidi Mvidi Mukulu musue, nulonda anu bibidilu bienu nkayabi bua tshinyi?

⁴ Bualu Mvidi Mukulu uvua muambe ne: “Nemeka tatuebe ne mamuebe.” Uvua muambe kabidi ne: “Udi wamba tatuende nansha mamuende bibi, basangane kumushipa anyi? Bamushipe!”

⁵ Kadi nuenu nudi nulongesha bantu ne: “Pikala muntu muambile tatuende nansha mamuende ne: ‘Bintu bimvua mua kubambuluisha nabi, ndi mbilambula Mvidi Mukulu’,

⁶ muntu awu kena ne tshilumbu tshia kuambuluisha kabidi tatuende to.” Ke munudi nunyanga muaku wa Mvidi Mukulu, bua kukumbaja bibidilu bienu.

⁷ Nuenu bena mpala ibidi, Yeshaya kavua mushime, pavuaye unuamba ne:

⁸ “Bantu aba badi bannemeka amu ne miaku patupu, kadi muoyi wabu udi kule, kawena kundi.

⁹ Padibu bantendelela, kabena bapeta tshintu, bualu bidibu balongesha, bidi amu mikenji ya bantu.

Mudi bantu bapia mikiya

¹⁰ Pashishe Yezu kubikila bantu, kubambila ne: — Telejayi, numvue bindi ngamba:

¹¹ Tshidi tshibuela mukana mua muntu ki ntshidi tshimupisha mikiya to. Kadi amu tshidi tshipatukamu, ke tshidi tshimupisha mikiya.

¹² Ke balongi kusemena kudi Yezu, bamukonka ne: — Udi mumanye muvua Baparushe bafike munda pa kumvua muuvua wakula anyi?

¹³ Yezu kuandamuna ne: — Mutshi onsu udi Tatu wanyi udi mu diulu kayi mukune, nebawujule ne miji yawu.

¹⁴ Balekelayi! Bampofu, badi balombola bampofu! Kadi padi mpofu ulombola mpofu nende mu njila, bonsu babidi nebadishinde mu tshiina.

¹⁵ Petro kumulomba ne: — Utumvuije tshiuvua muambe bua mikiya.

¹⁶ Yezu kuamba ne: — Munudi nuenu penu kanuyi mua kumvua mbishi?

¹⁷ Kanuena bamanye ne: bionsu bidi bibuela mukana mua muntu, bidi biya mu tshifu, pashishe bipatukamu, bibuela mu nkumba anyi?

¹⁸ Kadi malu adi mukana muamba, adi afuma mu muoyi. Ke adi apisha muntu mikiya.

¹⁹ Bualu mu muoyi wa muntu ke mudi mufume meji mabi, adi amusaka bua ashipe bantu, ende buendenda, enze malu a bundu, ibe, ashiminyinangane malu, anyangilangane lumu.

²⁰ Ke malu adi abipisha muntu! Kadi padi muntu udia, bianza kabiyi biowa, kena upia mikiya to.

Mukaji udi kayi muena Yuda udi witaba Yezu

²¹ Pashishe Yezu umuka aku, kuyaye mu buloba bua Tire ne Sidone.

²² Ke mukaji wa bena Kenaane, uvua musombe mu buloba abu, kufika kudi Yezu, wela lubila lukole ne: — Mfumu, Muana wa Davide, mfuilaku luse! Muananyi wa bakaji kena bimpe to! Mbamu-kengeshe kudi mukishi mubi.

²³ Kadi Yezu nansha kumuandamuna. Balongi bende kusemena kudiye, bamulomba ne: — Mumushe! Bualu udi wenda utulonda, wela amu mbila!

²⁴ Yezu kumuandamuna ne: — Mbantume anu bua kuya kudi mikoku mijimine ya mu bena Izrayele.

²⁵ Kadi mukaji awu kudiela panshi kumpala kuende, umuamba e: — Mfumu, ungambuluishe!

²⁶ Yezu kuandamuna ne: — Ki mbimpe kunyenga bana biakudia, kubielela mbua.

²⁷ Ke mukaji ne: — Mulongeshi, udi wamba amu bimpe. Kadi nansha mbua idi idia bisunsukila bidi bipona panshi ku mesa a bamfumu bayi.

²⁸ Ke Yezu kukema, wamba ne: — Kia! Mukaji, ditaba diebe ndinene! Biudi ujinga nebienzeke. Muanende kupanda anu diba adi.

Yezu udi ujikija masama a babeedi ba bungi

²⁹ Yezu umuka aku, kuyaye ku muelelu wa dijiba dia Ngalileya. Kubandaye ku mukuna, kusombamu.

³⁰ Bantu ba bungi kufika kudiye ne batebuki, bampofu, bena tuneke, tumama, ne babeedi bakuabu ba bungi. Kubatekabu ku makasa a Yezu. Yezu kujikija masama abu.

³¹ Nanku bantu kukema patuabu bamona tumama tuakula, bena tuneke bumvua bimpe, batebuki benda, bampofu bamona. Kutumbishabu Mvidi Mukulu wa Izrayele.

Yezu udi udisha bantu binunu binayi

³² Yezu kubikila balongi bende, kubambila ne: — Ndi ngumvua luse bua bantu bonsu aba. Tudi nabu kukadi matuku asatu. Kabatshiena ne tshiakudia nansha tshikese to. Tshiena mua kubatangalaja, kabayi badia. Badi mua kupungila mu njila.

³³ Balongi bende kumukonka ne: — Kadi mu tshipela emu, kutudi mua kupeta biakudia bikumbane bua kudisha bantu bungi nenku nkuepi?

³⁴ Yezu kubebeja ne: — Nudi ne mampa bungi munyi? Bobu ne: — Tudi ne mampa muanda mutekete, ne tushipa tukese.

³⁵ Ke Yezu kuambila bantu bua basombe panshi.

³⁶ Pashishe kuangataye mampa muanda mutekete awu, kabidi ne tushipa. Kuelaye Mvidi Mukulu tuasakidila, kukosololaye mampa ne tushipa, kupesha balongi bende. Bobu kuabanyina bantu.

³⁷ Muntu yonsu kudia kuukuta. Balongi kusangisha bisaka muanda mutekete biwule tente ne bisunsukila.

³⁸ Bavua badie bavua bantu balume binunu binayi, kabayi babale bungi bua bakaji ne bana.

³⁹ Yezu mumane kupingaja bantu ku mabu, kubuelaye mu buatu, kuya mu buloba bua Magadane.