Matayi 11 - MUKANDA WA MYIDI MUKULU

Yowanane-Batiste udi utuma balongi bende kudi Yezu

¹ Yezu mumane kuambila balongi bende dikumi ne babidi mikenji eyi, kumukaye muaba awu, kuyaye kulongesha mu bimenga bia mu ditunga. Kumanyishaye bantu Lumu lua Disanka.

² Yowanane-Batiste uvua mu lukanu. Kumvuaye balonda malu avua Kristu wenza. Kutumaye balongi bende bakuabu kudi Kristu,

³ bua kumukonka ne: — Wewe ke utuvua bamanye ne: udi ufika, anyi tuindile mukuabu?

⁴ Ke Yezu kubandamuna ne: — Nupingane kudi Yowanane, numuambile binudi numvua, ne binudi numona:

⁵ mpofu idi imona, batebuki badi benda, bena nsudi badi bapanda, bena mapapa badi bumvua, bafue badi babika, bapele badi babamanyisha Lumu lua Disanka.

⁶ Muena diakalenga ngudi ungitaba, kayi unwila.

⁷ Balongi ba Yowanane bamane kumuka, Yezu kukonka bantu bua Yowanane ne: — Mu tshipela nuvua baye kumona tshinyi? Nuvua bamone lushiba ludibu banyungisha kudi lupepele anyi? Nansha kakese!

⁸ Nanku tshinuvua bakebe kumona ntshinyi? Muntu muvuale bilamba bimpe anyi? Kadi badi bavuala bilamba bimpe badi basomba mu nzubu ya bakalenga ba matunga.

⁹ Kadi unuvua batekemene kumona nnganyi? Muambi anyi? Ndi nnujadikila ne: eyowa, unuvua bamone mmupite ne muambi mene.

¹⁰ Yowanane ke udibu bamba mu Mukanda wa tshijila ne: “Meme Mvidi Mukulu, ndi ntuma muntu wanyi kumpala kuebe, bua akulongoluele njila.”

¹¹ Eyowa, ndi nnujadikila bulelela ne: ku bonsu bavua bamamu balele, kakuena muntu wa buneme mupite Yowanane-Batiste. Kadi udi mushadile ku bonsu mu Bukalenga bua mu diulu, udi mupite Yowanane ku buneme.

¹² Biangatshile tshikondu tshivua Yowanane-Batiste utuadija kulongesha, Mvidi Mukulu kutuadija kulongolola Bukalenga buende. Kadi too ne ku lelu, bena tshimvundu badi bakeba kukandika bantu, bua kababuitabi.

¹³ Bambi bonsu, ne Moshe mu mikenji yende, too ne ku Yowanane-Batiste, bavua amu bamanyisha bantu Bukalenga ebu.

¹⁴ Nuenu basue kuitaba tshindi ngamba, numanye ne: Yowanane ke Eliya uvuabu batumanyishe ne: neafike!

¹⁵ Udi ne matshi a kumvua asangane kumvua anyi? Umvue!

¹⁶ Bena tshikondu etshi, ndi mua kubafuanyikija ne banganyi? Ndi mbafuanyikija ne bana badi basomba mu tshialu, banaya. Ke bamue kuambila bakuabu ne:

¹⁷ “Tuetu kunuelela nshiba, bua nuje maja, nuenu nansha kuja! Tuetu kunuimbila misambu ya madilu, nuenu nansha kudila!’’

¹⁸ Yowanane kufika, kayi upita kudia, kayi unua maluvu. Bantu kumuamba ne: “Udi ne mukishi mubi munda!”

¹⁹ Kadi Muana wa muntu kufika, muikale udia, unua. Ke kumuambabu ne: “Ewu mmudiavi, munu wa maluvu, mulunda wa balambuishi ba bitadi, ne wa bena buenzayi!” Kadi midimu idi Mvidi Mukulu wenza, idi ileja meji mimpe adiye nawu.

Badi babenga kuitaba

²⁰ Pashishe Yezu kutuadija kudiwula bena bimenga bavua bamone bishima bivule bivua-ye muenze, bualu kabavua badilengeja to. Ke Yezu kuambila bimenga ebi ne:

²¹ — Wewe, Korazine, udi muena diakabi! Wewe, Betsayida, udi muena diakabi! Bualu bishima bidibu benzele muenu, bu biobi bienzekela mu Tire, ne mu Sidone, bena bimenga ebi kuonsu eku bakavua bavuale bilamba bikayapale, badilabe butu, bua kuleja ne: tudi basue kudilengeja.

²² Ke pandi nnujadikila ne: dituku didi Mvidi Mukulu ukosa nsambu, dinyoka dia Tire, ne dia Sidone, nedikale dishadile ku dienu.

²³ Wewe, Kefamawume, udi wela meji ne: neudibandile mu diulu anyi? Nansha kakese! Nebakuele mu kandondu ka buloba. Bualu bishima bidibu benzele muebe, bu biobi bienzekela mu Sodome, tshimenga etshi tshivua mua kuikalaku too ne ku lelu.

²⁴ Ke pandi nnujadikila ne: dituku didi Mvidi Mukulu ukosa nsambu, dinyoka dia Sodome, nedikale dishadile ku dienu.

Vuayi kundi, nenupete dikisha

²⁵ Tshikondu atshi, Yezu uvua wamba ne: — Eyo, Tatu, Mfumu wa diulu ne buloba, ndi nkutumbisha, bualu udi muambile bantu bashadile malu audi musokoke bena meji ne bantu bavua balonga mikanda.

²⁶ Eyowa, Tatu, ke muuvua musue ne: bienzeke nanku.

²⁷ Tatu mmumpeshe bintu bionsu. Kakuena muntu udi mumanye Muana, anu Tatu nkayende. Kakuena muntu udi mumanye Tatu, amu Muana nkayende, kabidi ne bonsu badi Muana musue kumanyisha Tatu.

²⁸ Vuayi kundi, nuenu bonsu badi bapungile ne bujitu bunudi nuambula. Meme nelumpeteshe dikisha.

²⁹ Ambulayi bujitu buanyi pambidi penu. Nuanyishe bua meme kunulongesha, bualu ndi mupole ne mupuekele ku muoyi. Nanku nenupete dikisha mu mioyi yenu.

³⁰ Bujitu bundi nnupesha, nebunulengelele. Bujitu bundi nteka pa makaya enu, budi bupepele.