Marke 8 - MUKANDA WA MYIDI MUKULU

Yezu udi udisha bantu binunu binayi

¹ Tshikondu atshi, bantu bavule bavua badisangisha tshiakabidi. Kabavua ne tshiakudia to. Ke Yezu kubikila balongi bende, ubambila ne:

² — Ndi mumvue luse bua bantu aba, bualu tudi nabu kukadi matuku asatu, kabatshiena ne tshiakudia to.

³ Meme mubapingaje kuabu kabayi badie, badi mua kuzengela, kudishinda mu njila, bualu ba bungi ba kudibu mbafumine kule.

⁴ Balongi bende kumukonka ne: — Mpenyi patudi mua kupeta bia kubadisha buonsu buabu mu tshipela emu?

⁵ Yezu kubakonka ne: — Nudi ne mampa bungi bishi? Bobu kuandamuna ne: — Adi muanda mutekete.

⁶ Yezu kuambila bantu bua kusombabu panshi. Pashishe kuangataye mampa muanda mutekete, kuelaye Mvidi Mukulu tuasakidila, kuatshibula, kuapeshaye balongi bende bua kuabanyina bantu. Balongi kuenza nanku.

⁷ Bavua kabidi ne tushipa tukuabu tukese. Yezu kuela Mvidi Mukulu tuasakidila bua tushipa atu, kuambilaye balongi bua kutuabanyinabu bantu kabidi.

⁸ Bantu bonsu kudia, kuukuta. Balongi kusangisha bitupa bivua bishale, kuwujabu bisaka muanda mutekete.

⁹ Bantu bavua bu binunu binayi. Pashishe Yezu kubatuma ku mabu.

¹⁰ Diakamue, Yezu kubuela mu buatu ne balongi bende, kuya mu buloba bua Dalmanuta.

Baparushe badi balomba tshishima

¹¹ Baparushe kufika, kutuadijabu kuelangana mpata ne Yezu bua kumuteta. Kumulombabu bua aleje tshishima tshidi tshijadika ne: bumfumu buende mbufume kudi Mvidi Mukulu.

¹² Yezu kutua tshikema munda munda, wamba ne: — Bena lelu aba badi balomba tshishima bua tshinyi? Ndi nnujadikila ne: Kabena mua kubapesha tshishima nansha tshimue!

¹³ Pashishe, kulayanganaye nabu, kubuelaye mu buatu kuya dia muamua dia dijiba.

Buanga budi butuntumuna mampa bua Baparushe ne bua Erode

¹⁴ Balongi bavua bapue muoyi bua kuangata biakudia. Bavua amu ne diampa dimue mu buatu.

¹⁵ Yezu kubabela ne: — Nuadimuka bikole, nuepuke buanga budi butuntumuna mampa bua Baparushe ne Erode!

¹⁶ Balongi kuelangana meji ne: — Udi wamba nanku bua patudi katuyi ne mampa.

¹⁷ Yezu kumanyaye bivuabu bamba, kubakonkaye ne: — Nudi nuamba ne: bualu katuena ne mampa bua tshinyi? Kanuena banji kujingulula anyi? Lungenyi luenu ndujibale anyi?

¹⁸ Nudi ne mesu, kanuena numona anyi? Nudi ne matshi kanuena numvua anyi? Kanuena bavuluke anyi?

¹⁹ Pamvua mutshibule mampa atanu bua bantu binunu bitanu, nuvua bambule bisaka bungi bishi bia bipese bivua bishale? Bobu kuandamuna ne: — Bisaka dikumi ne bibidi.

²⁰ Yezu kubakonka kabidi ne: — Pamvua mutshibule mampa muanda mutekete bua bantu binunu binayi, nuvua bumbule bisaka biuwule tente bungi bishi? Bobu kuandamuna ne: — Bisaka muanda mutekete.

²¹ Yezu kubakonka ne: — Kanuena banji kujingulula anyi?

Yezu udi ujikija bumpofu bua muntu mu Betsayida

²² Bobu kufika mu Betsayida. Bantu kumutuadila mpofu, basengelela Yezu bua kumulengaye.

²³ Ke Yezu kukuata mpofu ku tshianza, kuya nende ku mpenga kua musoku. Pashishe kulabaye muntu awu mate ku mesu, kumutenteka bianza, umukonka ne: — Udi umona tshintu anyi?

²⁴ Mpofu kutabala, wamba ne: — Ndi mmona bantu, ndi mbamona bu mitshi, kadi badi benda.

²⁵ Yezu kutenteka tshiakabidi bianza pa mesu a muntu. Muntu kutangila, kumona bintu bionsu bimpe, bufofu bujike.

²⁶ Pashishe Yezu kumutuma kuabu, umuambila ne: — Kupinganyi mu musoku to.

Wewe udi Kristu

²⁷ Yezu ne balongi bende kuyabu mu misoku idi pabuipi ne tshimenga tshia Kezareya wa Filipe. Patshivuabu mu njila, kubakonkaye ne: — Bantu badi bangamba ne: ndi nganyi?

²⁸ Bobu kumuandamuna ne: — Bamue badi bamba ne: udi Yowanane-Batiste, bakuabu ne: udi Eliya, banga ne: udi umue wa ku bambi ba kale.

²⁹ Yezu kubakonka ne: — Kadi nuenu, nudi nungamba ne: ndi nganyi? Petro kumuandamuna ne: — Wewe udi Meshiya.

³⁰ Yezu kubakanyina bikole bua kabambidi muntu nansha umue.

Yezu udi umanyisha lufu luende ne dibiika diende

³¹ Pashishe Yezu kubanga dilongesha balongi bende, wamba ne: — Muana wa muntu neakenge bikole. Bakulu, batuangaji banene ne balongeshi bamikenji, nebamubenge. Nebamushipe, kunyima kua matuku asatu neabiike ku lufu.

³² Yezu uvua mubambile miaku eyi patoke. Ke Petro kumukoka ku luseke, kutuadijaye kumutandisha.

³³ Kadi Yezu kukudimuka, kutangila kudi balongi bende, ukanyina Petro, umuamba ne: — Umuka kundi, diabolu, bualu kuena wela meji bu mudi Mvidi Mukulu wela. Kadi udi wela meji bu mudi bantu bela.

³⁴ Pashishe Yezu kubikila bantu ne balongi bende, kubambila ne: — Padi muntu musue kulua kundi, kaditu mushinga, ambule mutshi wende mutshiamakane, andonde.

³⁵ Bualu muntu udi musue kusungidila muoyi wende, neaujimije. Kadi udi ujimija muoyi wende bualu buanyi ne bua Lumu lua Disanka, neausungidile.

³⁶ Pikala muntu upeta bintu bionsu bia panu pa buloba, ujimija muoyi wende, bidi mua kumuambuluisha ku tshinyi?

³⁷ Kudi tshintu tshidi muntu mua kufila bua kupikula natshi muoyi wende anyi?

³⁸ Pikala muntu ufua bundu bualu buanyi ne bua miaku yanyi munkatshi mua bena lelu, badi babenga Mvidi Mukulu, benza malu mabi, nenku Muana wa muntu kabidi neafue bundu bualu buende pafikaye mu butumbi bua Tatuende pamue ne batumibue ba tshijila.