Marke 5 - MUKANDA WA MYIDI MUKULU

Muntu udibu bakengesha kudi mikishi mibi

¹ Pashishe kufikabu dishiya dia dijiba dia Ngalileya, mu buloba bua Ngerasa.

² Yezu kutuluka mu buatu, diakamue muntu kupatuka mu nkita, bua kusambakena nende. Muntu utua ne mukishi mubi munda, umutatshisha.

³ Uvua usomba mu nkita. Muntu kavua mua kumusuika nansha ne nkanu.

⁴ Misangu mitule, bavua bamusuika nshinga ya biamu ku makasa, ne nkanu ku bianza, kadi utua utula nkanu ne nshinga ayi, uyikosa kabidi. Muntu nansha umue kavua ne dikanda dia kumutekesha.

⁵ Diba dionsu, munya ne butuku, uvua wendakanangana mu nkita ne ku mikuna, wela mbila, uditapa mputa ne mabue.

⁶ Kumuenenaye Yezu ku bule, kuyaye kudiye lubilu, kutuaye binu kumpala kuende,

⁷ kuela diyi dikole ne: — Yezu Muana wa Mvidi Mukulu wa kulu, butudi nebe mbunganyi? Ndi nkusengelela mu dina dia Mvidi Mukulu, kunnyoki nansha!

⁸ (Uvua muambe nanku bualu Yezu uvua mutumine mikishi mibi diyi bua ipatuke munda mua muntu ewu!)

⁹ Yezu kukonka muntu ne: — Dina diebe nnganyi? Muntu kuandamuna ne: — Dina dianyi ndi “Misumba,” bualu tudi ba bungi.

¹⁰ Kusengelelaye Yezu bikole bua kipatshi mikishi mibi mu ditunga.

¹¹ Muaba awu, uvua tshisumbu tshinene tshia ngulube pa mukuna, tshienda tshidia.

¹² Mikishi mibi kusengelela Yezu ne: — Ututume mu tshisumbu tshia ngulube, tubuele munda muayi.

¹³ Yezu kuanyisha. Mikishi mibi kupatuka munda mua muntu, kubuela munda mua ngulube. Tshisumbu tshijima tshia ngulube bu binunu bibidi kupulumuka pa tshibungubungu, kudiela mu dijiba, kufuilamu.

¹⁴ Bantu bavua balama ngulube kunyema, kutangalajabu lumu lua bualu abu mu tshimenga ne mu misoku ya ku mpenga. Ke bantu kufika bua kudimuena muvua bualu buenzeka.

¹⁵ Batantshila kudi Yezu, kumonabu muntu uvua ne mikishi mibi ya bungi awu musombe panshi, muvuale bilamba, lungenyi luende lubutame. Buowa kubakuata.

¹⁶ Bavua bamona malu aa onsu bavua balondela bantu bivua bienzekele muntu uvua ne mikishi munda ne bivua bienzekele ngulube.

¹⁷ Nanku bobu kusengelela Yezu bua kumukaye mu ditunga diabu.

¹⁸ Pakavua Yezu ubanda mu buatu, muntu uvua mikishi mibi mishiye awu kusengelela Yezu bua kuikalabu nende.

¹⁹ Yezu kubenga. Kadi kumuambilaye ne: — Pingana kuenu kudi bana benu. Ubalondele bionsu bidi Maweja-Nangila mukuenzele, mudiye mukufuile luse.

²⁰ Nanku muntu kumuka, kuya mu ditunga dia Bimenga Dikumi, wenda wambila bantu bionsu bivua Yezu mumuenzele. Bonsu bavua bumvua nanku bakatshila.

Nsongakaji, muana wa mfumu wa bena Yuda, ne mukaji udi ulenga tshilamba tshia Yezu

²¹ Yezu uvua utumina dia muamua dia dijiba. Bantu bavule bavua badisangishe, bamuele munkatshi, bualu uvua ku muelelu wa mayi.

²² Mfumu wa nzubu wa kutendelela wa bena Yuda, diende Yayire, kufika. Kumonaye Yezu, kudiela ku makasa ende,

²³ umusengelela bikole ne: — Muananyi wa bakaji udi upunga ne lufu. Anyisha ufike, umutentekele bianza, bua apande, kafu to!

²⁴ Yezu kuya nende. Bantu bavule bavua bamulonda, bamufimpakaja nseke yonsu.

²⁵ Muaba awu, kuvua mukaji ne disama dia mashi, apatuka amu kupatuka bidimu dikumi ne bibidi bilondangane.

²⁶ Uvua mukenga bikole kudi baminganga bavule, mutule makuta ende onsu. Kadi kavua mumvue bimpe to, disama divua amu dinemenene.

²⁷ Kumvuaye bantu batela Yezu. Ke kubuelaye munkatshi mua bantu mutua Yezu mu nyima, kulengaye tshilamba tshia Yezu.

²⁸ Bualu uvua udiambila ne: “Bu meme mulenge anu bilamba biende, disama didi dijika.”

²⁹ Diakamue mashi kukama. Kudiumvuaye disama diende dijike.

³⁰ Diakamue Yezu kumvuaye ne: bukole buvua bumupatuke. Ke kutangilaye munkatshi mua bantu, ubakonka ne: — Udi mulenge bilamba bianyi nnganyi?

³¹ Balongi bende kumuandamuna ne: — Udi mumone mudi bantu bakufinakaja nseke yonsu, udi ukonka kabidi ne: Udi mundenge nnganyi?

³² Kadi Yezu kukenzakana bua kumona muntu uvua mumulenge.

³³ Mukaji kutshina, bualu uvua mumanye tshivua tshimuenzekele. Kuyaye kudiela panshi ku makasa a Yezu, kumuambila amu muvua bualu.

³⁴ Yezu kumuambila ne: — Muananyi wa bakaji, ditaba diebe diajikiji disama diebe. Waya bimpe. Disama diebe ndijike.

³⁵ Patshivua Yezu wamba nanku, bantu kufikabu ne mukenji batumina kua mfumu Yayire, bamuambila ne: — Muanebe wa bakaji mmumane kufua. Utshidi utatshisha kabidi Mulongeshi bua tshinyi?

³⁶ Kadi Yezu kavua muteleje bivuabu bamba. Ke kuambilaye Yayire ne: — Kutshinyi nansha, itaba anu kuitaba.

³⁷ Yezu kavua muanyishe bua muntu mukuabu amufile nansha, kadi amu Petro ne Yakobe ne muanabu Yowanane.

³⁸ Kufikabu kua mfumu wa nzubu wa kutendelela wa bena Yuda. Yezu kusangana bantu ne tshimvundu tshikole, badila bela mbila mikole.

³⁹ Kubuelaye mu nzubu, ubamba ne: — Nudi nuenza tshimvundu, kabidi nudila bua tshinyi? Muana kena mufue to, udi mulale!

⁴⁰ Bantu kumuseka. Ke Yezu kubapatula buonsu. Kuangataye tatuende wa muana ne mamuende ne balongi bende basatu, kubuelabu mu tshibambalu tshivua muana.

⁴¹ Kumukuataye ku tshianza, umuambila ne: — Talita kume! (Mmomumue ne: “Nsongakaji, ndi nkuambila ne: juka!”)

⁴² Diakamue nsongakaji kujuka, kuenda. (Uvua ne bidimu dikumi ne bibidi). Bantu bamona nanku, kukemabu bikole.

⁴³ Kadi Yezu kubakandika bikole bua kabalondedi muntu bualu. Pashishe kubambilaye ne: — Mupeshayi biakudia.