Marke 2 - MUKANDA WA MYIDI MUKULU

Yezu udi ujikija disama dia muena tuneke

¹ Matuku mamane kupita, Yezu kupingana ku Kefamawume. Bantu kumvua ne: mmumane kufika ku nzubu.

² Bantu bavule kudisangisha, kujika too ne ku tshiibi tshia ku mushiku wa mbelu. Ke Yezu kubalongesha.

³ Bantu bakuabu kufika, bamutuadila muena tuneke, muambule kudi bantu banayi ba kudibu.

⁴ Kadi kabavua bamona mua kufika nende kudi Yezu bua bungi bua bantu. Ke kupapulabu tshitupa tshia musaka wa nzubu tshia kulu kua muaba uvua Yezu muimanyine. Ke kupuekeshilabu muena tuneke mulale pa tshiata mu dikela adi.

⁵ Yezu mumane kumona ditaba dia bantu abu, kuambilaye muena tuneke ne: — Muananyi, mbakujimijile mibi yebe.

⁶ Bamue balongeshi ba mikenji bavua basomba muaba awu, kuela meji munda muabu ne:

⁷ “Mudi muntu ewu ne dikima dia kusendeka Mvidi Mukulu nunku mmunyi? Udi mua kujimijilangana mibi nnganyi? Amu Mvidi Mukulu nkayende?”

⁸ Diakamue Yezu kumanya meji avuabu bela munda muabu, kubakonkaye ne: — Nudi nuela meji a nanku bua tshinyi?

⁹ Tshidi tshitekete, nkuambila muena tuneke ne: “Mbakujimijile mibi yebe,” nansha nkuamba ne: “Juka, ambule tshiata tshiebe, uye?”

¹⁰ Kadi ndi musue mimanye ne: Muana wa muntu udi ne bumfumu pa buloba bua kujimija mibi ya bantu. Ke kuambilaye muena tuneke ne:

¹¹ — Ndi nkuambila ne: juka, ambule tshiata tshiebe, uye kuebe!

¹² Diakamue patshivua bantu bonsu bamutangila, muntu kujuka, kuambula tshiata tshiende, kuyaye. Bonsu kukema bikole. Bavua batumbisha Mvidi Mukulu, bamba ne: — Katshia katuena banji kumona bualu bua mushindu ewu!

Yezu udi ubikila Levi

¹³ Yezu kumukaye kabidi ku dijiba dia Ngalileya. Bantu bavule kuya kudiye, bua yeye kubalongesha.

¹⁴ Pavuaye upita, kumonaye Levi muana wa Alfayi musombe mu nzubu uvuaye ulambuishila bitadi. Yezu kumuamba ne: — Ntua mu nyima! Levi kujuka, kumutua mu nyima.

¹⁵ Pashishe Yezu kudia biakudia mu nzubu wa Levi. Balambuishi ba bitadi ba bungi ne bantu benji ba malu mabi bakuabu bavua nende ku mesa ne balongi bende, bualu bantu ba bungi ba mushindu ewu ke bavua bamulonda.

¹⁶ Balongeshi ba mikenji bavua batua ku tshia Baparushe, kumona muvua Yezu udia pamue ne bantu bonsu abu. Kukonkabu balongi bende ne: — Bua tshinyi udi udia pamue ne balambuishi ba bitadi ne benji ba malu mabi?

¹⁷ Yezu umvua nanku, kubambilaye ne: — Bantu badi ne bukole bua mubidi kabena bakengela munganga nansha, amu badi basama ke badi bamukengela. Tshiena mulue kubikila bantu bakane. Kadi ndi mulue kubikila benji ba malu mabi.

Badi bakonka Yezu bua dijila dia biakudia

¹⁸ Dituku dikuabu, balongi ba Yowanane-Batiste ne Baparushe bavua bajila biakudia. Bantu kufika kudi Yezu, kumukonka ne: — Mudi balongi ba Yowanane-Batiste ne balongi ba Baparushe bajila biakudia, kadi bebe kabayi bajila, mbua tshinyi?

¹⁹ Yezu kubandamuna ne: — Nudi nuela meji ne: balunda ba bayende wa mukaji badi mua kujila biakudia patshidi musedianganyi mutshikale nabu anyi? Nansha kakese! Patshidi bayende wa mukaji mutshikale nabu kabena mua kujila biakudia nansha.

²⁰ Kadi tshikondu netshifike, tshiabanyengabu bayende wa mukaji. Padi dituku adi dikumbana nebajile biakudia.

²¹ Muntu kena wasa tshitetela tshia tshilamba tshipiatshipia ku tshilamba tshikulukulu. Yeye muenze nanku, tshitetela tshia tshilamba tshipiatshipia tshidi tshipanda tshilamba tshikulukulu, disosu nedidiunde kabidi.

²² Muntu kena wela nwinyo mupiamupia mu milondu ya biseba bikulukulu. Yeye muenze nanku, nwinyo mupiamupia neapande milondu, maluvu ne milondu nebijimine tshiapamue. Kadi bidi bimpe kuela nwinyo mupiamupia mu milondu ya biseba bipiabipia!

Badi bakonka Yezu bua dituku dia Dikisha

²³ Dituku dikuabu dia Dikisha, Yezu uvua upitshila mu madimi a ntete ya kuenza bukula. Balongi bende kutuadija kutula miepu ya ntete ivua ku muelelu wa njila.

²⁴ Baparushe kukonka Yezu ne: — Tangila, mudi balongi bebe benza bualu budi mikenji yetu mikandike dituku dia Dikisha mbishi?

²⁵ Yezu kubandamuna ne: — Kanuena banji kubala muvua Davide muenze ne bantu bende, pavua nzala mibasume anyi?

²⁶ Uvua mubuele mu nzubu wa Mvidi Mukulu, kudia mampa avuabu balambule Mvidi Mukulu. Abiyatare ke uvua mutuangaji munene tshikondu atshi. Mikenji yetu mmianyishe amu batuangaji nkayabu bua kudia mampa aa. Kadi Davide uvua muangate, muapeshe bantu bende kabidi.

²⁷ Yezu kubambila kabidi ne: — Dituku dia Dikisha, ndienzela muntu. Kadi muntu ki mmuenzela dituku dia Dikisha to.

²⁸ Nenku Muana wa muntu udi mfumu mene wa dituku dia Dikisha.