Marke 16 - MUKANDA WA MYIDI MUKULU

Yezu udi ubiika ku bafue

¹ Dituku dia Dikisha dimane kupita, Mariya muena Magdala, ne Mariya mamuende wa Yakobe kabidi ne Salome kusumbabu manananshi bua kuya kulaba tshitalu tshia Yezu.

² Dituku dia lumingu pa kabundubundu, diba dimane kupatuka, kuyabu ku lukita.

³ Bavua belangana ne: — Muntu udi mua kubunguluja dibue didi ku mushiku wa lukita nnganyi?

⁴ Kadi padibu babanduluka, kumonabu dibue divua dipite bunene dimana kubunguluja ku luseke.

⁵ Kubuelabu mu lukita, kumonabu nsongalume musombe ku dia balume, muvuale nkanzu mutoke. Buowa kubakuata.

⁶ Kadi yeye kubambila ne: — Nudi nukeba Yezu wa mu Nazarete uvuabu bapopela pa mutshi mutshiamakane. Ukadi mumane kubiika ku lufu, kena apa nansha. Jojayi muaba uvuabu bamuteke. Kanutshinyi nansha.

⁷ Nuye mpindiewu, nuambile balongi bende kabidi ne Petro ne: Yezu udi udianjila kumpala kuenu mu Ngalileya. Momu ke munuamumuena amu bu musuaye munuambile.

⁸ Bakaji kupatuka mu lukita, kunyemabu bonsu benda bazakala, batshina. Kadi ka-bavua mua kuyukila ne muntu bualu nansha bumue, bualu bavua ne bowa. [

Yezu udi umuenekela Mariya muena mu Magdala

⁹ Yezu mumane kubiika ku lufu pa kabundubundu mu dinda, dituku dia lumingu, uvua mudianze kumuenekela Mariya muena mu Magdala uvuaye mumushe mikishi mibi muanda mutekete.

¹⁰ Mariya kuya kumanyisha lumu alu kudi bavuaye wendakana nabu. Bobu kubungama, kudila kabidi.

¹¹ Kadi pumvubu bivua Mariya wamba ne: Yezu udi ne muoyi, mvua mumumone, kabavua bamuitaba nansha.

Yezu udi umuenekela balongi babidi

¹² Pashishe, Yezu kumueneka mushindu mukuabu kudi balongi babidi, bavua baya ku musoku.

¹³ Bobu kupingana, kulondela bakuabu bualu abu, kadi kabavua mua kubitaba nansha.

Yezu udi umuenekela balongi dikumi ne umue

¹⁴ Ku ndekelu, Yezu kumuenekela balongi dikumi ne umue pavuabu badia. Uvua ubatandisha bua pavuabu kabayi ne ditaba ne pavuabu ne muoyi mupape kabayi mua kuitaba bantu bavua bamane kumumona ne muoyi bamba.

¹⁵ Pashishe kubambilaye ne: — Nuye mu buloba bujima, nulongeshe bantu bonsu Lumu lua Disanka.

¹⁶ Muntu udi witaba, bamutue mu mayi, neapande. Kadi wabenga kuitaba neapete tshibawu.

¹⁷ Umvua yi bishima bidibu mua kumanyina bantu badi bitaba mbiebi: nebipate mikishi mibi mu dina dianyi, nebakule miakulu mipiamipia,

¹⁸ nansha bobu bakuate nyoka ne bianza biabu, nansha bobu banue mayi a lulengu, kabiena bibenzela bualu bubi nansha bumue. Nebatenteke babedi bianza masama abu neajike.

Yezu udi ubanda mu diulu

¹⁹ Mfumu Yezu mumane kuyukila ne balongi bende nanku, kumuambulabu mu diulu, kusombaye ku dia balume dia Mvidi Mukulu.

²⁰ Balongi kuya kulongesha miaba yonsu Lumu lua Disanka. Mfumu uvua ubambuluisha mu mudimu ewu, bua kuleja ne bivuabu balongesha bivua bia bushiwa ku bishima bivuabu benza.]