Marke 12 - MUKANDA WA MYIDI MUKULU

Lusumuinu lua bena mudimu babi ba mu budimi bua nwinyo

¹ Yezu kubanga kubambila malu mu nsumuinu ne: — Kusua muntu mukune mionji ya nwinyo mu budimi. Kubuelaye mu lupangu, kumbulaye tshiina tshia tshikaminu tshia tumuma, kuibakaye kazubu ka batentekedi.” Pashishe kushilaye bafutshidi budimi abu, kuyaye ku luendu.

² Padi tshikondu tshia kupola tumuma tshikumbana, kutumaye muena mudimu wende kudi bafutshidi ba budimi abu, bua kupeta tuende tumuma tua nwinyo kudi bafutshidi.

³ Bafutshidi kukuata muena mudimu, kumutuuta, kumuipata bianza bitupu.

⁴ Muena budimi kutuma muena mudimu mukuabu. Bobu kumutuuta bintu ku mutu, bamupenda.

⁵ Muena budimi kutuma muena mudimu mukuabu kabidi, bafutshidi kumushipa. Kuenzelabu bena mudimu bakuabu ba bungi mushindu awu: kutuutabu bamue, kushipa bakuabu.

⁶ Muena budimi uvua mushale amu ne muntu umue, ke muanende wa balume uvuaye munange bikole. Kumutumaye kudi bafutshidi ku ndekelu, wela meji ne: “Nebanemeke muananyi.”

⁷ Kadi bafutshidi kuambilangana ne: “Ke washala ne bumfumu bua budimi pashishe wawa. Tuyayi banushipe, budimi bushale buetu!”

⁸ Kukuatabu muana, kumushipa, kuimanshabu tshitalu tshiende ku mpenga kua budimi.

⁹ Yezu kubakonka ne: Nenku muena budimi bua nwinyo udi mua kuenza tshinyi? Muena budimi bua nwinyo nealue, neashipe bafutshidi ba budimi bua nwinyo, neafile budimi kudi bantu bakuabu.

¹⁰ Kanuena banji kubala bulelela, mudi Mukanda wa tshijila, wamba ne: “Ke dibue divua bibaki bimanshe, dikadi dibue didi dishindika nzubu.

¹¹ Maweja-Nangila ke udi muenze nanku, bidi bikemesha patudi bitangila!”

¹² Bamfumu ba bena Yuda bavua bakeba mushindu udibu mua kukuata Yezu. Bualu bavua bamanye muvuaye wela lusumuinu elu bualu buabu. Kadi bavua batshina bantu, nenku bobu kumulekela kuyabu.

Tshitadi tshia Kezare

¹³ Kutuminabu Yezu bamue Baparushe ne bamue bantu ba mu tshisumbu tshia bena Erode bua kumuteta.

¹⁴ Kufikabu, bamuambila ne: — Mulongeshi, tudi bamanye ne: udi wamba bulelela. Kuena utshina bidi bantu bela meji. Bualu kuena utangila bua mpala wa muntu, kadi udi ulongesha bulelela mudi Mvidi Mukulu musue bua muntu enza. Tuambilaku: mikenji yetu mmianyishe bua kufuta mukalenga wa bakalenga wa bena Rome tshitadi anyi? Tudi mua kumufuta anyi katuena mua kumufuta?

¹⁵ Kadi Yezu uvua mumanye ne: mbasokoke meji abu malelela. Kubandamunaye ne: — Nudi nunteta bua tshinyi? Ndejayi lukanu lunudi nalu, ndumone.

¹⁶ Kumutuadilabu lukanu lumue. Yeye kubakonka ne: — Mpala ne dina bidibu bazolapu mbia nganyi? Bobu kumuandamuna ne: — Mbia mukalenga wa bakalenga.

¹⁷ Yezu kubambila ne: — Futayi mukalenga wa bakalenga bintu bidi biende. Kadi lambulayi Mvidi Mukulu kabidi bidi biende. Kukemabu bikole bua diandamuna diende.

Bafue nebabiike anyi?

¹⁸ Basaduke bakuabu kuya kudi Yezu. (Bobu ke badi balongesha bantu ne: bafue kabena mua kubiika ku lufu). Kumukonkabu ne:

¹⁹ — Mulongeshi, Moshe uvua mutuelele mukenji ne: “Pikala muntu ne muanabu wa balume mufue, mushiye mukaji kayi mulele nende bana, bidi bimpe muanabu wa balume awu apiane mukamba awu, alelele muanabu mufue awu bana.”

²⁰ Kuvua bana ba balume muanda mutekete. Wa kumpala kusela mukaji, kufuaye kayi mushiye bana.

²¹ Muibidi kuangata mukamba uvua mushale awu, kufuaye kabidi kayi mulele bana. Muisatu kubalonda kabidi amu nanku.

²² Buonsu muanda mutekete bavua bangate mukaji, balondangana kutuabu kabayi bashiye bana. Ku ndekelu kua bonsu, mukaji kubalonda kabidi.

²³ Dituku diabiika bantu ku bafue, udi mua kuikala muena mukaji awu munkatshi muabu amu nnganyi? Bualu buonsu muanda mutekete bavua bamuangate!

²⁴ Yezu kubandamuna ne: — Ke panudi nutupakana, bualu kanuena bajingulule, nansha Mukanda wa tshijila, nansha bukole bua Mvidi Mukulu.

²⁵ Pashishe pabiika bantu ku lufu, bantu balume ne bantu bakaji kabena mua kuselangana nansha, kadi nebikale bu mudi batumibue ba Mvidi Mukulu mu diulu.

²⁶ Kadi bua bantu bafue, ne bua dibiika diabu ku lufu. Kanuena babale mu mukanda wa Moshe bivua Mvidi Mukulu muambe mu tshipuka tshitema kapia anyi? Mbafundemu ne: Mvidi Mukulu uvua muambile Moshe ne: “Ndi Mvidi Mukulu wa Abrahame, Mvidi Mukulu wa Izake, ne Mvidi Mukulu wa Yakobe.”

²⁷ Yezu kuamba kabidi ne: — Mvidi Mukulu udi Mvidi Mukulu wa bantu badi ne muoyi, kena wa bafue nansha. Nudi batupakane bikole.

Mukenji udi mupite mikuabu

²⁸ Mukuabu mulongeshi wa mikenji uvua mumvue muvuabu belangana mpata. Kumonaye ne Yezu uvua muandamune Basaduke bimpe. Kusemenaye kudiye, umukonka ne: Ku mikenji yonsu, mmukenji kaayi udi mupite mikuabu?

²⁹ Yezu kumuandamuna ne: — Mukenji udi mupite mikuabu udi ne: “Izrayele, teleja! Maweja-Nangila Mvidi Mukulu wetu udi Maweja-Nangila nkayende.

³⁰ Unange Maweja-Nangila Mvidi Mukulu webe ne muoyi webe onsu, ne lungenyi luebe luonsu, ne meji ebe onsu, ne bukole buebe buonsu.”

³¹ Mukenji muibidi udi ne: “Unange muntu nebe bu muudi mudinange wewe mene.” Kakuena mukenji mukuabu udi mupite mikenji ibidi eyi nansha.

³² Mulongeshi wa mikenji kuambila Yezu ne: — Mbimpe bitambe, Mulongeshi! Biudi muambe mbia bulelela. Maweja-Nangila ke Mvidi Mukulu nkayende. Kakuena Mvidi Mukulu mukuabu amu yeye.

³³ Nenku, muntu udi ne bua kunanga Mvidi Mukulu ne muoyi wende onsu, ne lungenyi luende luonsu ne bukole buende buonsu. Udi ne bua kunanga kabidi muntu nende bu mudiye mudinange yeye mene. Kuenza nanku nkupita kuoshila Mvidi Mukulu nyama pa tshilambuilu ne kumulambula milambu ya mishindu yonsu.

³⁴ Yezu umona ne mmuandamune ne lungenyi, kumuambilaye ne: — Wewe udi pabuipi ne bukalenga bua mu diulu. Abi bimane kuenzeka, muntu nansha umue kavua ne dikima dia kumuela lukonku kabidi nansha.

Meshiya ne Davide

³⁵ Pavua Yezu ulongesha mu nzubu wa Mvidi Mukulu, kukonkaye ne: — Mudi balongeshi ba mikenji mua kuamba ne Meshiya udi wa ku ndelanganyi ya Davide mbishi?

³⁶ Bualu Davide nkayende mulombolakudi Mueyelu wa Tshijila, uvua wamba ne: “Maweja-Nangila Mvidi Mukulu uvua wamba Mfumu wanyi ne: Luaku usombe ku diboku dianyi dia balume, too ne pandi nteka baluishi bebe muinshi mua makasa ebe.”

³⁷ Davide mene udi umubikila “Maweja-Nangila.” Mudi Meshiya mua kuikala kabidi wa ku ndelanganyi ya Davide mbishi? Bantu ba bungi bavua bateleja Yezu ne disanka.

Dimukayi ku bidi balongeshi ba mikenji balongesha

³⁸ Uvua wambila bantu bavuaye ulongesha ne: — Nudimukile balongeshi ba mikenji. Badi banange mua kuendakana bavuale mintumpu mile, banange bua bahele mioyi ya kanemu miaba idi bantu basangile.

³⁹ Badi basungula nkuasa ya lumu mu nzubu ya kutendelela ya bena Yuda ne mu miaba ya kudia ya bibilu.

⁴⁰ Badi banyenga bakaji bakamba bionsu bidibu nabi, kabidi badi batendelela mutantshi mule bua kumuenekabu bantu bakane. Kadi nebabanyoke bikole bipite.

Mulambu wa mukaji mukamba

⁴¹ Yezu uvua musombe buludiludi ne mushete wa milambu ya mu nzubu wa Mvidi Mukulu, kumonaye muvua bantu bavule belamu makuta. Bantu babanji ba bungi bavua bela makuta a bungi.

⁴² Mukaji mukamba mupele kufika. Kuelaye makuta a tshiamu tshikunze abidi, mikale ne mushinga wa nseki.

⁴³ Ke Yezu kubikila balongi bende, ubambila ne: — Ndi nnujadikila ne: mukaji mukamba mupele ewu mmuele mu mushete mulambu mupite wa bantu bakuabu bonsu.

⁴⁴ Bualu bantu bakuabu bonsu mbele makuta mavule avuabu nawu. Kadi yeye ewu ne bupele buende, mmulambule kende konsu kavuaye naku.