Marke 10 - MUKANDA WA MYIDI MUKULU

Yezu udi ulongesha malu a pa dibaka

¹ Yezu kumuka aku, kuyaye mu buloba bua Yudeya, pashishe ne dia muamua dia Yardene. Bantu bavule kudisangisha kuvuaye. Pamue ne balongi bende, kubangaye kulongesha amu bu pa tshibidilu.

² Baparushe bakuabu kusemenabu kudiye bua kumuteta. Bobu kumukonka ne: — Mikenji yetu mmianyishe bua muntu abenge mukajende anyi?

³ Yezu kubebeja ne: — Moshe uvua munuelele mukenji kaayi.

⁴ Bobu kumuandamuna ne: — Moshe uvua muanyishe bua muntu udi ubenga mukajende, afunde mukanda wa kushipa nawu dibaka.

⁵ Nanku Yeye kubambila ne: — Moshe uvua munuelele mukenji ewu, bualu muoyi wenu udi mupape.

⁶ Kadi ku ntuadijilu Mvidi Mukulu mumane kufuka bintu bionsu “Wakabika muntu mulume ne mukaji.” Ke padibu bafunde mu Mukanda wa tshijila ne:

⁷ Bua nanku, mulume neashiye tatuende ne mamuende bua kulamataye mukajende.

⁸ Bubidi buabu bikale muntu mue. Nanku kabatshiena babidi kabidi nansha, badi tshintu tshimue.

⁹ Nenku muntu kabuludi tshidi Mvidi Mukulu mumane kusuika.

¹⁰ Padibu bapingana ku nzubu, balongi badi bela Yezu nkonku tshiakabidi pa bualu abu.

¹¹ Yeye kubambila ne: — Pikala mulume ubenga mukajende, usela mukuabu, udi wenza buenzayi kudi mukajende wa kumpala.

¹² Bidi momumue kabidi, pikala mukaji umuka kudi bayende, uya ku dibaka kudi mulume mukuabu, udi wenza buenzayi.

Yezu udi wela bana batekete lupemba

¹³ Bantu bavua baya ne bana kudi Yezu bua kubatentekela bianza, kadi balongi bavua babatandisha.

¹⁴ Padi Yezu umona nanku, kusodiaye, kuambila balongi bende ne: — Lekelayi kukandika bana! Balekelayi balue kundi, bualu Bukalenga bua Mvidi Mukulu mbua badi bu bana.

¹⁵ Ndi nnujadikila ne: udi kayi wanyisha Bukalenga bua Mvidi Mukulu bu mudi muana, kena mua kubuelamu nansha.

¹⁶ Pashishe kuambulaye bana mu maboku ende, ubatentekajila bianza, ubela lupemba!

Nsongalume muena mpetu

¹⁷ Pakavua Yezu ubanga luendu, muntu kulua lubilu kudiye, kutua binu kumpala kuende, umukonka ne: — Mulongeshi muimpe, bua meme kupeta muoyi wa kashidi, nengenze tshinyi?

¹⁸ Yezu kumukonka ne: — Udi umbikila muimpe bua tshinyi? Kakuena muntu udi muimpe, amu Mvidi Mukulu nkayende.

¹⁹ Udi mumanye mikenji ya ne: “Kushipi muntu; kuendi buendenda; kuibi; kuena mua kushiminyina muntu bualu; kuangatshi bintu bia bantu bakuabu ku dishima; unemeke tatuebe ne mamuebe.”

²⁰ Muntu kuandamuna ne: — Mulongeshi, ndi mutumikile mikenji yonsu eyi, biangatshile ku buana buanyi.

²¹ Yezu kumutangila, kumunanga, umuambila ne: — Bualu bumue butshidi bukushale. Uye, upane bionsu biudi nabi, upeshe bapele makuta, nanku neupete bubanji mu diulu. Pashishe Ulue, undonde meme.

²² Pumvu muntu nanku, kubungamaye, kumuka mufike munda, bualu uvua ne biuma bia bungi.

²³ Yezu ukenzakana, kuambilaye balongi bende ne: — Bidi bikole bua bantu babanji kubuela mu Bukalenga bua Mvidi Mukulu!

²⁴ Balongi kukema bikole pumvubu nanku. Kadi Yezu kubambila tshiakabidi ne: — Bana banyi, bidi bikole bua kubuela mu Bukalenga bua Mvidi Mukulu!

²⁵ Mbikole bua nyama wa kamelu kupitshila mu disu dia kashingi, kadi bidi bipite bukole kabidi bua muntu mubanji kubuelaye mu Bukalenga bua Mvidi Mukulu!

²⁶ Balongi bavua bakema amu kukema, bakonkangana ne: — Kadi, nanku udi mua kupanda nnganyi?

²⁷ Yezu kubatangila, kubambila ne: — Bantu kabena mua kubuenza nansha, kadi Mvidi Mukulu udi wenza. Bualu ku bionsu kakuena tshidi mua kukolela Mvidi Mukulu nansha.

²⁸ Ke Petro kumuambila ne: — Teleja, tudi bamane kushiya bionsu bakulonda.

²⁹ Yezu kumuandamuna ne: — Ndi nkujadikila ne: muntu yeye mushiye nzubu wende, nansha bana babu ba balume, bana babu ba bakaji, mamuende, tatuende, bana bende, madimi ende, mu dina dianyi ne bua Lumu lua Disanka,

³⁰ neapete misangu lukama mu matuku atudi aa, nzubu, bana babu ba balume, bana babu ba bakaji, bamamuende, bana ne madimi, kabidi ne makenga; pashishe mu matuku adi alonda neapete muoyi wa tshiendelele.

³¹ Kadi ba bungi badi kumpala mpindiewu nebikale ba nshikidilu. Badi ku nshikidilu mpindiewu nebikale ba kumpala.

Yezu udi umanyisha musangu muisatu bua lufu ne dibiika diende

³² Bavua mu njila batangila ku Yerushalayime. Yezu uvua kumpala kua balongi bende. Bobu bavua ne bowa, kabidi bantu bavua babalonda bavua ne luzakalu. Yezu kuangata balongi dikumi ne babidi tshiakabidi, kubangaye kubambila malu avua pabuipi ne bua kumuenzekela.

³³ Uvua ubambila ne: — Telejayi, tukadi tuya ku Yerushalayime. Muaba awu, nebafile Muana wa muntu mu bianza bia batuangaji banene ne balongeshi ba mikenji. Nebamufundile tshibawu tshia lufu, nebamufile mu bianza bia benyi.

³⁴ Bobu abu nebamuseke, nebamutuile mate pambidi, nebamutuute mikaba, nebamushipe. Kunyima kua matuku asatu, neabiike ku lufu.

Yakobe ne Yowanane badi balomba Yezu muanzu

³⁵ Pashishe bana ba Zebede, Yakobe ne Yowanane, kusemena kudi Yezu, kumuambila ne: — Mulongeshi, tudi tujinga utuenzele tshitudi basue kukulomba.

³⁶ Yezu kubakonka ne: — Nudi basue nnuenzele tshinyi?

³⁷ Bobu kumuandamuna ne: — Pawikala mu Bukalenga buebe bua butumbi, wanyishe bua tuetu kusomba nebe, umue ku dia balume diebe, mukuabu ku dia bakaji diebe.

³⁸ Yezu kubandamuna ne: — Kanuena bamanye tshinudi nulomba to. Nuenu nudi mua kunua dikopu dindi ne bua kunua meme, nansha badi mua kunutua mu mayi bu mudibu mua kuntua anyi?

³⁹ Bobu kumuandamuna ne: — Tudi mua kuenza. Yezu kubambila ne: — Mmomu. Bua dikopu dindi ne bua kunua nudi mua kunuinamu, kabidi badi mua kunutua mu mayi bu mudibu bantua.

⁴⁰ Kadi meme ki nngudi ujadika muntu udi mua kusomba ku dia balume dianyi, nansha ku dia bakaji dianyi nansha. Miaba eyi idi bua badi Mvidi Mukulu muyilongoluele.

⁴¹ Padi balongi bakuabu dikumi bumvua nanku, kufikilabu Yakobe ne Yowanane munda.

⁴² Ke Yezu kubabikila buonsu kubambila ne: — Nudi bamanye bantu badibu bamba ne: mbamfumu ba matunga: badi batumina bantu babu diyi, kabidi baneme badi baleja bantu mudibu ne bumfumu.

⁴³ Kadi kabienzeki nanku munkatshi muenu nansha. Padi umue wa kunudi nuenu musue kuikala munene, ikale muena mudimu wenu.

⁴⁴ Pikala muntu wa kunudi musue kuikala wa kumpala, ikale mupika wa bonsu.

⁴⁵ Bualu Muana wa muntu kena mulue bua bamukuatshile mudimu, kadi mmulue bua kukuatshila bantu mudimu ne kufila muoyi wende bu tshieya bua kupikula bantu ba bungi.

Yezu udi ujikija bumpofu bua Bartimeye

⁴⁶ Kufikabu ku Yeriko. Pavua Yezu upatuka mu tshimenga etshi ne balongi bende pamue ne bantu basule, mpofu mukuabu diende Bartimeye, muana wa Timeye, uvua musombe ku njila, ulomba tshia pa luse.

⁴⁷ Padiye umvua ne: assu udi usua Yezu wa mu Nazarete, kubangaye kuela mbila ne: — Yezu, Muana wa Davide, umfuile luse!

⁴⁸ Bantu ba bungi kumutandisha, bamuamba bua apuwe. Kadi kukoleshaye amu diyi ne: — Muana wa Davide, umfuile luse!

⁴⁹ Yezu kuimana, kuamba ne: — Mubikilayi. Bobu kubikila mpofu bamuambila ne: — Kolesha muoyi, juka, Yezu udi ukubikila.

⁵⁰ Mpofu kuimansha tshilamba tshiende tshivuaye natshi pambidi, kutupika uya kudi Yezu.

⁵¹ Yezu kumukonka ne: — Udi musue nkuenzele tshinyi? Mpofu kumuandamuna ne: — Mulongeshi, ngambuluishe bua ntabale tshiakabidi.

⁵² Yezu kumuambila ne: — Ndaku, ditaba diebe diakondapi. Diakamue, kutabalaye, kutuaye Yezu munyima.