Luke 7 - MUKANDA WA MYIDI MUKULU

Mfumu wa basolayi ba bena Rome

¹ Yezu mumane kuambila bantu malu onsu aa, kuyaye ku Kefamawume.

² Muaba awu muvua mfumu wa basolayi ba bena Rome, muikale ne muena mudimu wende uvuaye munange bikole. Muena mudimu awu uvua usama bikole, wamba kufua.

³ Mfumu wa basolayi umvua lumu lua Yezu, kutumaye bakulu ba bena Yuda kudi Yezu, bua bamulombe ne: ufike bua kujikija disama dia muena mudimu wanyi.

⁴ Bakulu kufika kudi Yezu, bamusengelela bikole ne: — Muntu awu mmuntu muimpe. mBimpe umuambuluishe.

⁵ Udi munange tshisamba tshietu. Yeye mene ke uvua muibakishe nzubu wetu wa kutendelela.

⁶ Ke Yezu kuya nabu. Pakavuaye pabuipi ne kufika ku nzubu, mfumu wa basolayi kumutumina balunda bende bua bamuambile ne: — Mfumu, kaditatshishi to. Tshiena mukumbane bua ubuele mu nzubu muanyi nansha.

⁷ Ke pamvua muele meji ne: tshiena muakanyine bua mfike kuudi. Kadi tuma anu diyi, muena mudimu wanyi neumvue bimpe.

⁸ Meme mene ndi ku bumfumu bua bantu bakuabu, kabidi ndi ne basolayi bandi ntumina diyi. Ndi ngamba ewu ne: “Ndaku,” udi uya. Ndi ngambila mukuabu ne: “Pingana,” udi upingana. Pandi ngambila muena mudimu wanyi ne: “Enza mudimu ewu,” udi wenza.

⁹ Yezu umvua miaku eyi, kukatshilaye mfumu wa basolayi awu. Ukudimuka kudi bantu bavua bamulonda, kubambilaye ne: — Ndi nnujadikila ne: nansha mu bena Izrayele, tshiena muanji kusangana ditaba dia mushindu ewu.

¹⁰ Bantu bavuabu batume kupingana kua mfumu wa basolayi, kusangana muena mudimu mumane kumvua bimpe.

Yezu udi ubisha nsongalume ku lufu

¹¹ Pashishe Yezu kuya mu tshimenga tshia Nayine. Balongi bende ne bantu bakuabu bavule bavua baya nende.

¹² Pakavuaye pabuipi ne tshiibi tshia ku tshibuelelu tshia tshimenga, kumonaye bantu bavua baya kujika muntu ku nkita. Muntu awu uvua muana wa balume mulela umue wa mukaji mukamba. Bena mu tshimenga ba bungi bavua bafila mamu awu.

¹³ Mfumu ubamona, kumvuilaye mamu awu luse. Kumuambilaye ne: — Lekela muadi.

¹⁴ Ke Yezu kuya ku mushete wa tshitalu, kuulenga ne tshianza. Bavua bawambula, kuimanabu. Yezu kuambila mufue ne: — Nsongalume, ndi nkutumina diyi, biika!

¹⁵ Mufue kubiika, kusomba, kutuadija kuakula. Yezu kumupingajila mamuende.

¹⁶ Bantu bonsu kumvua bowa. Kutumbishabu Mvidi Mukulu, bamba ne: — Muambi munene mmupatuke munkatshi muetu! Mvidi Mukulu mmufike bua kusamba bantu bende!

¹⁷ Bantu ba mu ditunga dijima dia Yudeya, ne ba mu matunga a ku mpenga, bavua bumvua lumu lua malu avua Yezu muenze.

Yowanane-Batiste udi utuma balongi kudi Yezu

¹⁸ Balongi ba Yowanane bavua bamulondela malu aa onsu. Ke Yowanane kubikila balongi babidi.

¹⁹ Kubatumaye kudi Mfumu bua kumukonka ne: “Wewe ke Musungidi wetu utudi bamanye ne: udi ne bua kufika, anyi tuindile mukuabu?”

²⁰ Balongi aba bafika kudi Yezu, kumuambilabu ne: — Yowanane-Batiste mmututume, ukukonka ne: “Wewe ke utudi bamanye ne: udi ne bua kufika, anyi tuindile mukuabu?”

²¹ Diba adi Yezu uvua ujikijila bantu bavule masama abu mashilangane. Uvua wipata kabidi mikishi mibi, utabeja mpofu ya bungi.

²² Ke kuandamunaye bantu bavua Yowanane mutume ne: — Nupingane kudi Yowanane, numulondele bionsu binudi bamone, ne binudi bumvue: mpofu idi imona, batebuki badi benda biakane, bena nsudi badi bakana mibidi, bena mapapa badi bumvua, bafue badi babiika ku lufu, bapele badi bumvua Lumu lua Disanka.

²³ Muena diakalenga ngudi ungitaba, kayi unwila.

²⁴ Bantu bavua Yowanane mutume bumuka, Yezu kutuadija kulondela bantu malu a Yowanane, wamba ne: — Tshinuvua baye kumona mu tshipela ntshinyi? Nuvua baye kumona lushiba ludibu banyungisha kudi lupepele anyi? To!

²⁵ Nenku tshinuvua baye kumona ntshinyi? mMuntu muvuale bilenga anyi? Kadi badi bavuala bilamba bilenga, basanka ne bintu bia mushinga mukole, badi basomba mu nzubu minene ya bakalenga.

²⁶ Nenku tshinuvua baye kumona ntshinyi? mMuambi anyi? Eyowa, ndi nnuambila ne: mmupite kabidi ne muambi.

²⁷ Bualu Yowanane ke muntu udi mukanda wa Mvidi Mukulu ujadikila ne: “Meme Mvidi Mukulu ndi ntuma muntu wanyi kumpala kuebe, bua akulongoluele njila.”

²⁸ Ndi nnujadikila kabidi ne: kakuenamuntu nansha umue, udi bamamu balele, mupite Yowanane. Kadi udi mushadile ku bonsu mu Bukalenga bua Mvidi Mukulu udi mumupite.

²⁹ Bantu bonsu ne balambuishi ba bitadi mene bavua bateleja Yowanane, bitaba bivua Mvidi Mukulu mubalombe, bavua baya kudi Yowanane bua abatue mu mayi.

³⁰ Kadi Baparushe ne balongeshi ba mikenji bavua babenga tshivua Mvidi Mukulu mubalongoluele. Nanku kabavua basue bua Yowanane abatue mu mayi.

³¹ Yezu kubambila kabidi ne: — Bena lelu ndi mua kubafuanyikija ne banganyi? mBafuanangane ne banganyi?

³² mBafuanangane ne bana badi basomba mu tshisalu, bamue bambila bakuabu ne: “Tuetu kunuelela nshiba bua nuje maja, nuenu nansha kuja! Tuetu kunuimbila misambu ya madilu, nuenu nansha kudila!”

³³ Bualu Yowanane-Batiste uvua mufike, kayi udia mampa, kayi unua nwinyo. Nuenu kumuamba ne: “Udi ne mukishi mubi munda!”

³⁴ Muana wa muntu kufika pende, udia, unua. Nuenu kuamba ne: “Ewu muntu mmusombele amu kudia ne kunua nwinyo. mMulunda wa balambuishi ba bitadi ne bena buenzayi bakuabu!”

³⁵ Kadi bonsu badi bitaba meji a Mvidi Mukulu, ke badi bajingulula buimpe buawu.

Yezu mu nzubu mua Simone Muparushe

³⁶ Muparushe mukuabu uvua mubikile Yezu bua kudiaye kuende. Yezu ufika kua muntu awu, kusombaye ku mesa.

³⁷ Mu tshimenga atshi muvua mukaji muena malu mabi. Pavuaye mumvue ne: Yezu udi udia kua Muparushe, kuangataye mulangi wa albatre, muwule ne manananshi.

³⁸ Kuimanaye panyima pa Yezu, ku makasa ende. Uvua udila, ubolesha makasa a Yezu ne binsonji. Uvua wakupula ne nsuki yende, watua mishiku, walaba manananshi.

³⁹ Muparushe uvua mubikile Yezu, umona nanku, kuelaye meji ne: “Bu muntu ewu muambi wa Mvidi Mukulu bulelela, uvua mua kujingulula mukaji ewu, kumanya ne: mmuena malu mabi.”

⁴⁰ Nanku Yezu kuambila Muparushe ne: — Simone, ndi ne bualu bua kukuambila. Simone kuandamuna ne: — Mulongeshi, ambaku.

⁴¹ Ke Yezu ne: — Musombeshanganyi wa makuta uvua ne bena mabanza ende babidi, ewu ne dibanza dia nkanu ya tshiamu tshitoke tshia mushinga mukole nkama itanu, mukuabu ne dibanza dia nkanu makumi atanu.

⁴² Bu muvuabu kabayi ne mushindu wa kumufuta, yeye kubalekela mabanza bonsu babidi. Nanku wa ku babidi aba, udi mua kupita kumunanga nnganyi?

⁴³ Simone kumuandamuna ne: — Ndi ngela meji ne: uvuaye mutekele dibanza dinene. Ke Yezu kumuandamuna ne: — Udi muambe anu bimpe.

⁴⁴ Pashishe Yezu ukudimuka kudi mukaji, kuambila Simone ne: — Udi mumone mukaji ewu anyi? Meme kufika kuebe, kuena mumpeshe mayi a kuowa ku makasa. Kadi yeye mmungoweshe makasa ne binsonji biende, muakupule ne nsuki yende.

⁴⁵ Wewe kuena muntue mishiku bua kungakidila. Kadi yeye katshia ngafika kuebe, udi uvua anu mishiku ku makasa anyi.

⁴⁶ Wewe kuena mungele mafuta mu mutu. Kadi yeye udi mulabe manananshi ku makasa anyi.

⁴⁷ Ke pandi nkujadikila ne: bunene bua dinanga didiye mundeje, budi bujadika mudibu bajimije mibi yende mivule. Kadi muntu udibu bajimija mibi mikese, udi uleja dinanga dikese.

⁴⁸ Ke Yezu kuambila mukaji awu ne: — Mibi yebe mmijimine.

⁴⁹ Bantu bavua ne Yezu ku mesa kukonkangana ne: “Muntu udi ujimijilangana mibi ewu, mmuntu wa mushindu kaayi?”

⁵⁰ Kadi Yezu kuambila mukaji ne: — Ditaba diebe diakusungidi. Waya bimpe.