Lewitiki 8 - MUKANDA WA MYIDI MUKULU

BADI BAJIDILA BATUANGAJI BA KUMPALA Tshibilu tshia kujidila

¹ Maweja-Nangila kuambila Moshe ne:

² — Ubikidishe Arone ne bana bende ba balume ku mushiku wa ntenta wa kusambakena. Ulombeshe bilamba biabu bia tshijila, ne mafuta a kubalaba. Batuale kabidi ngombe mulume wa kubakobolola nende, mikoku ibidi ya bimpanga, ne tshisaka tshia mampa kaayi mela buanga.

³ Pashishe ukunguje bantu bonsu ba bena Izrayele muaba ewu.

⁴ Moshe kuenza bionsu bivua Maweja-Nangila mumuambile. Bantu bonsu kutuilangana ku mushiku wa ntenta wa kusambakena.

⁵ Moshe kubambila ne: “Mpindiewu ndi ne bua kuenza tshivua Maweja-Nangila muambe.”

⁶ Moshe kubikila Arone ne bana bende ba balume, kubowesha mayi bu muvua Maweja-Nangila mumuambile.

⁷ Kuvuadikaye Arone muntumpu, kumusuika mukaba, kumuvuadika muntumpu mulamika tshilamba tshia efode kutshisuikila panyima ne tukaba tuatshi.

⁸ Kumuladika tshilamba tshia pa tshiadi, kubuejamu Urime ne Tumime.

⁹ Kumuasaye tshifulu ku mutu. Kumpala kua tshifulu, kuvua kulamika tshitata tshia tshiamu tshia mpawungi, tshifuane tshilongu, bilondeshile mikenji ya Maweja-Nangila.

¹⁰ Ke Moshe kuangata mafuta a tshijila, kualaba ku ntenta wa kusambakena ne ku bintu bionsu bivuamu.

¹¹ Kumiaminaye kabidi mafuta awu misangu muanda mutekete ku tshilambuilu, ne ku bintu bivuaku, ku dilongu dinene dia koweshila bantu mayi, ne ku tshitaku tshiadi.

¹² Kuelaye Arone mafuta a tshijila mu mutu bua kumujidila.

¹³ Pashishe Moshe kubikila bana ba Arone ba balume, kubavuadika mintumpu, kubasuika mikaba, kubasa bifulu ku mitu, bu muvua Maweja-Nangila mumuambile.

¹⁴ Pashishe kutualabu ngombe mulume bu mulambu wa kukobolola nawu bantu. Arone ne bana bende ba balume kutenteka bianza pa mutu pa ngombe awu.

¹⁵ Moshe kukosa ngombe awu muminu, kutua munu mu mashi, kualaba ku matumba matalame avua ku tshilambuilu bua kumbusha mikiya. Pashishe kuitshikijaye mashi avua mashale kuinshi kua tshilambuilu. Ke muvua Moshe mujidile tshilambuilu bua tshikale muaba wa kulambuila milambu ya kukobolola nayi bantu.

¹⁶ Ke Moshe kulamuna mafuta onsu avua ku bia munda, lutandatanda lua ku mutshima, tuonyi tubidi ne mafuta onsu avua malamateku, kubioshila Maweja-Nangila pa tshilambuilu.

¹⁷ Kadi munyinyi wa ngombe awu uvua mushale, tshiseba, bia munda ne bunyawu, Moshe kumuka nabi mu mitanda, kuya kubiosha amu muvua Maweja-Nangila mumuambile.

¹⁸ Pashishe kutualabu kabidi mukoku wa tshimpanga wa mulambu wa kuosha. Arone ne bana bende ba balume kutentekabu bianza pa mutu wa tshimpanga atshi.

¹⁹ Moshe kukosa tshimpanga atshi muminu, kumiamina mashi atshi ku nseke yonsu ya tshilambuilu.

²⁰ Moshe kusaya tshimpanga atshi, kutshikosolola mabulu mabulu, kuosha pamue ne mutu, kabidi ne munyinyi wa mafuta.

²¹ Kusukulaye bia munda ne bikonu mu mayi. Kubishaye ne munyinyi wa nyama uvua mushale pa tshilambuilu. Bualu mmulambu wa kuosha, udi ne dipembu dimpe didi disankisha Maweja-Nangila.

²² Pashishe kumutuadilabu tshimpanga tshikuabu bua kujidila batuangaji. Arone ne bana bende kutenteka bianza pa mutu wa tshimpanga atshi.

²³ Moshe kukosa tshimpanga atshi muminu, kulaba Arone mashi atshi ku lusongu lua ditshi, ku tshiala ne ku muana nkasa munene bia ku luseke luende lua dia balume.

²⁴ Pashishe kubikilaye kabidi bana bonsu ba balume ba Arone, kubalaba mashi ku nsongu yabu ya matshi, ku biala ne ku minu minene ya bana ba nkasa bia ku luseke luabu lua dia balume. Ke kumiaminaye kabidi mashi avua mashale ku nseke yonsu ya tshilambuilu.

²⁵ Pashishe Moshe kuangata mukila wa tshimpanga atshi, mafuta onsu adi malamate ku bia munda, lutandatanda lua ku mutshima, tuonyi tubidi ne mafuta onsu adi malamateku, kabidi ne tshibelu tshia luseke lua dia balume.

²⁶ Mu tshisaka tshivua kumpala kua Maweja-Nangila, tshikale ne mampa kaayi mela buanga, Moshe kuangata diampa dimue kadiyi diela buanga, mukata muenza ne mafuta, kabidi ne kakata kakese. Kubitekaye pa mafuta ne pa tshibelu tshia luseke lua dia balume dia tshimpanga.

²⁷ Moshe kupesha Arone ne bana bende ba balume bintu bionsu abi ku bianza bua babiele mulu, babinyukule kumpala kua Maweja-Nangila.

²⁸ Pashishe kuangataye kabidi bintu abi ku bianza bia Arone ne bia bana bende ba balume, kubitentekajaye pa mutu pa milambu ya kuosha ivua pa tshilambuilu, kubioshila Maweja-Nangila. Ke muvuabu benza mudimu wa kubueja batuangaji mu mudimu nanku. Mulambu awu uvua ne dipembu dimpe didi disankisha Maweja-Nangila.

²⁹ Moshe kuangata tshiadi tshia tshimpanga atshi, kutshiela mulu, kutshinyukula. Pashishe kutshiangataye, anu muvua Maweja-Nangila mumuambile.

³⁰ Moshe kusambakaja mafuta a tshijila mu mashi avua ku tshilambuilu. Kuamiaminaye Arone, ne ku bilamba biende. Pashishe kuamiaminaye kabidi bana bende ba balume, ne ku bilamba biabu. Ke Arone ne bana bende ba balume ne bilamba biabu kushala bia tshijila.

³¹ Moshe kuambila Arone ne bana bende ba balume ne: — Nulambile munyinyi wa tshimpanga tshibidi atshi mu mushiku wa ntenta wa kusambakena. Nuudile nuenu nkayenu anu muaba awu, pamue ne mampa a tshijila. Ke mumvua munuambile diyi dia Maweja-Nangila ne: bintu ebi nebabidie amu kudi Arone ne bana bende ba balume.

³² Kadi munyinyi ne mampa bidi bishale, nubioshe mu kapia.

³³ Nushale mu mushiku wa ntenta wa kusambakena too ne pakumbana matuku muanda mutekete a tshijila tshienu.

³⁴ Nanku bitudi benza lelu ebi, ke bivua Maweja-Nangila mutume diyi bua tuenze bua kunukobolola.

³⁵ Nushale anu mu mushiku wa ntenta wa kusambakena matuku muanda mutekete a munya ne a butuku, bua kuenza mudimu munufundile kudi Maweja-Nangila, bua kanufu. Ke mikenji ivua Mvidi Mukulu mungambile.

³⁶ Arone ne bana bende ba balume, kukumbaja mikenji yonsu ivua Maweja-Nangila mubatumine kudi Moshe.