Lewitiki 7 - MUKANDA WA MYIDI MUKULU

d. Mulambu wa dinua tshibalu

¹ “Mulambu wa dinua tshibalu badi baulambula mushindu ewu: “Ke mulambu wa tshijila menemene.

² Badi ne bua kukosa nyama muminu, muaba udibu bashipela nyama ya milambu ya kuosha. Pashishe bamiamine mashi ku nseke yonsu ya tshilambuilu.

³ Kadi balambule Maweja-Nangila munyinyi onsu wa mafuta: mukila, mafuta onsu adi malamate ku bia munda,

⁴ tuonyi tubidi ne mafuta onsu adi malamateku, mafuta adi malamate ku lutandatanda ludi ku mutshima, ludibu balamuna pamue ne tuonyi.

⁵ Mutuangaji oshe bionsu ebi pa tshilambuilu. Bualu bidi mulambu wa dinua tshibalu, udibu boshila Maweja-Nangila, ushile.

⁶ Nanku anu bantu balume ba mu meku a batuangaji ke badi mua kudia munyinyi wa mulambu awu. Kadi baudile muaba wa tshijila, bualu udi wa tshijila menemene.

⁷ Mikenji ya mulambu wa dinua tshibalu ne ya mulambu wa kukobolola bantu, idi anu mushindu umue. Nanku amu mutuangaji udi ukobolola muntu ke udi wangata munyinyi awu.

e. Bidi mutuangaji wangata

⁸ “Padi muntu ufila nyama wa mulambu wa kuosha, tshiseba tshia nyama awu, tshishale amu tshia mutuangaji uvua mulambule mulambu awu.

⁹ Padi mulambu wa bintu bia mu madimi bioshe muiku, bilambe mu luesu, nansha bikange pa dilata, bintu ebi nebishale bia mutuangaji uvua mulambule mulambu awu.

¹⁰ Kadi padi milambu ya bintu bibishi kabiyi bilambe pa kapia, nansha ya bintu bisambakaja ne mafuta nansha ya bikuabu, babiabanyangana bungi bua momumue kudi bana ba Arone ba balume.

f. Mulambu wa bobumue

¹¹ “Mushindu wa kulambula Maweja-Nangila mulambu wa bobumue:

¹² “Padi muntu ulambula Maweja-Nangila nyama wa mulambu, wimba ne musangu bua kumutumbisha, asakidile kabidi milambu eyi: mulambu wa mikata mikanga kayiyi miela buanga bua mampa, wa tuampa tukese tulaba mafuta, katuyi tuela buanga bua mampa, ne wa mikata mienza ne bukula busambakaja ne mafuta.

¹³ Pashishe ambule kabidi diampa diela buanga, didibu balambula pamue ne mulambu wa kutumbisha nawu Maweja-Nangila.

¹⁴ Mutuangaji angate tshintu tshimue tshia ku mulambu ne ku mulambu bua kulambula Maweja-Nangila. Nunku bintu bionsu ebi nebishale bia mutuangaji uvua mumiamine mashi ku tshilambuilu.

¹⁵ Kadi bua munyinyi wa nyama wa mulambu wa bobumue, baudie ujika onsu anu dituku dimue, kauladi to.

¹⁶ “Padibu balambula Maweja-Nangila mulambu wa bobumue, bua mapiku nansha bua budisuile, munyinyi awu baudie dituku adi. Padiwu ushala, baudie baujikija patshiabu.

¹⁷ Kadi padiu ushala kabidi too ne ku dituku disatu, bawoshe mu kapia.

¹⁸ Padi muntu kampande udia munyinyi wa ku mulambu awu dituku disatu, Maweja-Nangila kena mua kuanyisha to. Mulambu wende kawena ne mushinga, bualu munyinyi kautshiena muimpe kabidi bua kuenza nawu midimu ya tshijila. Yonsu udi udia munyinyi awu, mmuena tshibawu. Mmudikebele tshilumbu.

¹⁹ Padi munyinyi awu ulenga ku tshintu tshidi ne mikiya, kabaudi to, bawoshe mu kapia. “Nanku anu muntu udi kayi ne mikiya ke udi mua kudia munyinyi wa mulambu ewu.

²⁰ Muntu yonsu udi mudipile nkayende mikiya, padiye udia munyinyi wa mulambu wa bobumue, udibu balambula Maweja-Nangila, nebamuipate munkatshi mua bena Izrayele.

²¹ Kabidi muntu yonsu udi ulenga mukuabu udi ne mikiya, ulenga tshimuna tshidi ne mikiya, nansha nyama wa tshisuku udi ne mikiya, neapete dinyoka dia mushindu umue ne muntu udi mudie munyinyi wa mulambu wa bobumue uvuabu balambule Maweja-Nangila muikale ne mikiya.”

Bidi bena Izrayele ne bua kuenza

²² Maweja-Nangila kuambila Moshe ne:

²³ manyisha bena Izrayele ne: “Kanuena mua kudia munyinyi wa mafuta a nyama, nansha a ngombe, a mukoku, nansha a mbuji.

²⁴ Munyinyi onsu wa mafuta, wa nyama mudifuile, nansha mushipa kudi nyama mukuabu wa lonji, kabena mua kuudia to, kadi badi mua kukuata nawu midimu mikuabu.

²⁵ Padi muntu udia mafuta a nyama udibu balambula bu mulambu wa kuoshila Maweja-Nangila, muntu awu bamuipate munkatshi mua bena Izrayele.

²⁶ Nanku muaba onsu unudi basomba kanuena mua kudia kabidi mashi a nyunyi, nansha a nyama too ne kashidi.

²⁷ Padi muntu udia mashi, bamuipate munkatshi mua bena Izrayele.”

²⁸ Maweja-Nangila kuambila Moshe ne: imanyisha kabidi bena Izrayele ne:

²⁹ Padi muntu ulambula Maweja-Nangila nyama wa mulambu wa bobumue, neapeshe Maweja-Nangila bidi bimutangila.

³⁰ Neambule yeye mene bionsu bidibu ne bua kulambula Maweja-Nangila: ke munyinyi wa mafuta, ne tshiadi tshia nyama awu. Bele tshiadi tshia nyama atshi mulu, batshinyukule bua kutshilambula.

³¹ Mutuangaji oshe munyinyi wa mafuta onsu pa tshilambuilu. Kadi tshiadi atshi tshikale tshia Arone ne bana bende ba balume.

³² Nudi ne bua kumusha kabidi tshibelu tshia luseke lua balume lua nyama wa mulambu, kutshipesha mutuangaji.

³³ Tshibelu tshia nyama atshi, ntshia mutuangaji udi ulambula mashi ne mafuta pa tshilambuilu.

³⁴ Maweja-Nangila udi unutumina diyi bua nuenu bena Izrayele, kumusha tshiadi ne tshibelu bia nyama inudi nulambula bu mulambu wa bobumue. Nupeshe mutuangaji Arone ne ndelanganyi yende bintu abi, bualu ke bintu binudi ne bua kubapesha matuku onsu too ne kashidi.”

³⁵ Bintu abi, bidibu bumusha ku milambu idibu balambula Maweja-Nangila, nebikale bia Arone ne bana bende, biangatshile dituku didibu babajidile ku mudimu wa butuangaji bua kukuatshila Maweja-Nangila mudimu.

³⁶ Nanku Maweja-Nangila udi unutumina diyi nuenu bena Izrayele, bua nupeshe Arone ne bana bende bintu ebi dituku didibu babajidila. Nulame mukenji ewu kashidi.

³⁷ Eyi ke mikenji idi itangila milambu ya kuosha, milambu ya bintu bia mu madimi, milambu ya kukobolola nayi bantu, milambu ya dinua tshibalu, milambu ya dibanjija ne milambu ya bobumue.

³⁸ Maweja-Nangila mmupeshe Moshe mikenji eyi, mu tshipela ku mukuna wa Sinayi, dituku divuaye mutumine bena Izrayele diyi, bua bikale bamulambula milambu.