Lewitiki 27 - MUKANDA WA MYIDI MUKULU

Malu makuabu tuasakidila: Mushinga wa malaya

¹ Maweja-Nangila kuambila Moshe

² bua amanyishe bena Izrayele mikenji idi ilonda eyi ne: “Padi muntu mulaye Maweja-Nangila bua kumulambula muntu, udi mua kukumbaja dilaya diende pa kufuta bungi kampande bua nkanu ya tshiamu tshitoke tshia mushinga mukole, pa mutu pa muntu awu:

³ bilondeshile mishinga eyi: “Bua muntu mulume wa bidimu makumi abidi too ne ku makumi asambombu, nebafute Maweja-Nangila nkanu ya tshiamu tshitoke tshia mushinga mukole makumi atanu, bilondeshile tshipimu tshia nkanu tshia muaba wa tshijila.

⁴ Bua mukaji nebafute Maweja-Nangila nkanu ya tshiamu tshitoke tshia mushinga mukole makumi asatu.

⁵ “Bua muana wa balume, wa bidimu bitanu too ne ku makumi abidi, nebafute Maweja-Nangila nkanu ya tshiamu tshitoke tshia mushinga mukole makumi abidi. Bua muana wa bakaji, nebafute nkanu dikumi.

⁶ “Bua muana wa balume wa ngondu umue too ne ku bidimu bitanu, nebafute Maweja-Nangila nkanu ya tshiamu tshitoke tshia mushinga mukole itanu. Bua muana wa bakaji, nebafute nkanu isatu.

⁷ “Padi muntu mumane kupita pa bidimu makumi asambombu, nebafute Maweja-Nangila nkanu dikumi ne itanu bua muntu mulume. Bua muntu mukaji badi ne bua kufila nkanu dikumi.

⁸ “Padi muntu ukenga, kayi mupete mushinga uvuabu balomba, udi ne bua kufila muntu, uvuaye mutela ne: ngua dilaya awu, kudi mutuangaji. Nenku mutuangaji neatshinke mushinga udi mukengi ewu mua kufuta, bilondeshile dimona diende dia makuta.

⁹ “Padi muntu mulaye bua kulambula Maweja-Nangila tshimuna tshia mapiku tshidibu mua kumulambula, tshimuna atshi ntshia tshijila.

¹⁰ Kabena mua kutshishintakaja ne tshimuna tshikuabu, nansha tshikale tshimpe tshipite, nansha tshikale tshishadile ku buimpe. Kadi muntu yeye mutshishintakaje, bimuna ebi bionsu bibidi, badi ne bua kubilambula Maweja-Nangila.

¹¹ “Padi tshimuna atshi ne mikiya, katshiyi tshikumbana mua kulambula Maweja-Nangila, muenatshi atshifile kudi mutuangaji.

¹² Mutuangaji neafue mushinga wa tshimuna atshi, utangila buimpe nansha bubi bua tshimuna. Nebumvuangane amu ku mushinga udiye wamba awu.

¹³ Padi muenatshi musue kutshipikula, asakidile tshia bitanu tshimue tshia mushinga uvua mutuangaji mulombe.

¹⁴ “Padi muntu musue kulambula Maweja-Nangila nzubu, mutuangaji neafue mushinga wa nzubu awu. Neamanye tshidi tshikolesha mushinga wa nzubu awu, nansha tshidi tshiutekeshisha. Nenku nebitabe mushinga udiye mutue.

¹⁵ Padi muena nzubu musue kumupikula, asakidile tshia bitanu tshimue ku mushinga uvua mutuangaji mulombe.

¹⁶ “Padi muntu musue kulambula Maweja-Nangila budimi bumue bua ku madimi ende, mushinga wabu udi ulondeshila bungi bua bintu bidibu mua kukunamu. Padi budimi bukumbakana bua kukuna ntete ya orje kilo nkama isatu, mushinga wabu newikale wa nkanu ya tshiamu tshitoke tshia mushinga mukole makumi atanu.

¹⁷ Padibu balambula Maweja-Nangila budimi abu, ku ntuadijilu wa tshidimu tshia ‘Mufikilu’ wa

¹⁸ Padibu balambula Maweja-Nangila budimi tshidimu tshia ‘Mufikilu’ wa disanka dinene tshimane kupita, mutuangaji neapuekeshe mushinga, bilondeshile bungi bua bidimu bitshidi bishale bua kufika ku tshidimu tshipiatshipia tshia ‘Mufikilu’ wa disanka dinene.

¹⁹ “Padi muena budimi musue kubupikula, udi ne bua kusakidila tshia bitanu tshimue ku mushinga uvua mutuangaji mulombe. Pashishe neangate budimi buende.

²⁰ “Kadi padiye kayi muanji kupikula budimi buende, udi mua kubupana kudi muntu mukuabu. Diba adi katshiena mua kudipikuilabu to.

²¹ Nenku mu tshikondu tshia ‘Mufikilu’ wa disanka dinene, budimi abu budi amu bupingana kudi Maweja-Nangila. Nebushale mu dina dia batuangaji, bu budimi buvuabu balambule Maweja-Nangila bua kashidi.

²² “Padi muntu ulambula Maweja-Nangila budimi buvuaye musumbe, kabuyi bupeta ku bupianyi,

²³ mutuangaji neatshinke mushinga wa budimi abu, bilondeshile bungi bua bidimu bitshidi bishale bua kufika ku tshidimu tshia ‘Mufikilu’ wa disanka dinene. Muena budimi abu afute mushinga awu anu dituku adi, bua baulambule Maweja-Nangila.

²⁴ Kadi mu tshidimu tshia ‘Mufikilu’ wa disanka dinene, budimi nebabuangate anu kudi mfumuabu wa kumpala uvua mubupiane awu.

²⁵ “Nanku nebatshinke mushinga wa bionsu abi, bilondeshile nkanu idi muaba wa tshijila. Lukanu kumue ludi ne bujitu bua grame dikumi.

Milambu mishilangane

²⁶ “Muntu nansha umue kena ne bumfumu bua kulambula mu dina diende yeye nkayende, muanabute wa ngombe, lukungulu lua mbuji, nansha muana wa mukoku to. Bualu nyama yonsu idi mikale banabute, ikadi ya Maweja-Nangila.

²⁷ Padi muanabute wa tshimuna atshi muikale wa nyama udi ne mikiya, muenatshi udi mua kutshipikula. Kadi asakidile tshia bitanu tshimue ku mushinga udi mutuangaji mulombe. Padi muenatshi kayi mua kutshipikula, mutuangaji udi mua kutshipana kudi muntu mukuabu ku mushinga onsu udiye utshinka.

²⁸ “Nanku bua bintu bionsu bidi muntu ulambula Maweja-Nangila bua kashidi, kabena mua kubipana nansha kubipikula to, bu mudi muntu, nyama nansha budimi bupiana. Bintu bidibu balambula mushindu ewu, mbia Maweja-Nangila nkayende, mbia tshijila menemene.

²⁹ Nansha muntu mumane kujidila kashidi mu dina dia Maweja-Nangila nanku, kabena mua kumupikula to. Nansha bua kumushipa, basangane kumushipa anye? Bamushipe.

³⁰ “Nenku bena Izrayele badi ne bua kulambula Maweja-Nangila tshia dikumi tshimue tshia biakudia bia mu madimi, kabidi ne tshia bimuma bia ku mitshi. Bualu mbintu biende.

³¹ Padi muntu musue kupikula tshikuabu tshia ku bidibu balambula Maweja-Nangila, muntu awu udi ne bua kusakidila tshia bitanu tshimue ku mushinga udi mutuangaji mulombe.

³² Padi muntu ne ngombe, mikoku nansha mbuji, udi ne bua kulambula Maweja-Nangila tshimuna tshimue pa bimuna dikumi.

³³ Muena bimuna abi, kena mua kusunguluja bimuna bidi bimpe ne bidi bibi. Kabidi kena mua kubishintakaja to. Yeye mubishintakaje, bionsu bibidi nebishale bia tshijila mu dina dia Maweja-Nangila. Kena mua kubipikula to.”

³⁴ Nenku ke mikenji ivua Maweja-Nangila mumanyishe Moshe pa mukuna wa Sinayi, bua ambile bena Izrayele.