Lewitiki 26 - MUKANDA WA MYIDI MUKULU

¹ “Kanuena mua kuenza mpingu ileja mvidie ya dishima. Kanuena mua kuimanyika mpingu ayi, nansha kujidila mabue. Kanuena mua kuteka mabue mu ditunga dienu, kuazola bua kuatendelela to. Bualu meme ndi Maweja-Nangila Mvidi Mukulu wenu.

² “Nuikishe dituku dia Dikisha. Nunemeke muaba wanyi wa tshijila. Bualu ndi Maweja-Nangila.

Mvidi Mukulu neanuele lupemba

³ “Panudi nuitaba meyi anyi, nutumikila mikenji yanyi, nuyilonda,

⁴ nendokeshe mvula pa diba diende, bua nupete biakudia bia bungi mu madimi enu, kabidi bua mitshi ikuame bimuma.

⁵ Nanku dishipula dia ntete mu ditunga dienu, neditungunuke too ne ku matuku a dinowa dia tumuma tua mvinyo. Dinowa dia tumuma tua mvinyo neditungunuke too ne ku matuku a dikuna . Nenuikale ne biakudia bia bungi. Kabidi nenusombe ku matshi talala.

⁶ Nembueje ditalala mu ditunga dienu, nenulale tulu mu nzubu, batalaja mioyi. Nembutule nyama ya lonji idimu. Baluishi kabakunubunda kabidi to.

⁷ Nenutshimune baluishi benu, nenubashipe bonsu.

⁸ Bena Izrayele batanu nebatshimune baluishi lukama. Bena Izrayele lukama, nebatshimune baluishi binunu dikumi, babashipe bonsu.

⁹ Nennutabalele bua nutante, nulele bana ba bungi. Nendame ndondu ituvua batua nenu.

¹⁰ Nenunowe biakudia bia bungi. Nenuhidie matuku mavule. Bua kupeta muaba wa kulama bipiabipia, anu nuenu banji kumusha bia kale.

¹¹ Nzubu wanyi wa tshijila neikale munkatshi muenu. Tshiena mua kunubenga to.

¹² Nengendakane nenu. Meme nengikale Mvidi Mukulu wenu, nuenu nenuikale bantu disanka dinene, nenku mushinga wabu kawena mua kushintuluka to banyi.

¹³ Meme ndi Maweja-Nangila Mvidi Mukulu wenu, uvua munupatule ku bupika mu ditunga dia Ejipitu. Meme kukosa nkanu ya bupika buenu, bua numone mua kuenda ntunku.

Dinyoka dia bena buenzayi

¹⁴ “Panudi nubenga kuitaba meyi anyi, nubenga kulonda mikenji yanyi,

¹⁵ panudi nubenga kunemeka ndondu wanyi, nubenga mikenji yanyi ne meyi andi munutumine,

¹⁶ nenku nennunyoke mushindu ewu: “Nennukuatshishe bowa, nunyane, nupete disama dia mubidi luya. Makenga aa neanupangishe mua kumona bimpe. Nenushale ne muoyi matuku makese. Nenukune biakudia mu madimi enu, kadi nebabidie amu kudi baluishi benu.

¹⁷ Nennukengeshe. Baluishi benu nebanutshimune, banutshimbakaje. Nenudinyemene, kakuyi muntu unuipata.

¹⁸ “Padi bionsu ebi binuenzekela kanuyi nungitaba, nanku nemvudije makenga enu awu misangu muanda mutekete, bua malu mabi anudi benza.

¹⁹ Bua kujikija ditambisha ne tshitunu tshinudi natshi, tshiena unulokeshila mvula to. Biakudia kabiena bitoloka to. Diulu nedikole bu tshiamu, buloba nebuume bu tshiamu tshikunze.

²⁰ Nenuditatshishe bua kudima, kadi biakudia kabiakutoloka, mitshi kayakukuama bimuma.

²¹ “Panudi anu numbenga kanuyi nungitaba, meme nemvudije kabidi makenga enu misangu muanda mutekete.

²² Nentume nyama ya tshisuku, ishipe bana benu, ibutule bimuna bienu. Nenubutuke, mu njila yenu mushale anu mutupu.

²³ “Panudi nuntombokela anu kuntombokela, manyoka aa kaayi anufikisha ku didilengeja,

²⁴ meme panyi nennubenge. Nemvudije tshiakabidi dinyoka dienu misangu muanda mutekete.

²⁵ Nennutumine bena mvita bua baluishe ditunga dienu. Nennunyoke bua ndondu wanyi unudi nunyanga. Nansha nuenu baye kusokoma mu bimenga, nennutumine disama dia kishi. Baluishi benu nebanutshimbakaje.

²⁶ Nenkepeshe biakudia, bakaji dikumi nebasangile ditshiwa dimue bua kuoshilamu mampa, bapeta muaba mukumbane. Nebanuabanyine tupese tua mampa tukese tukese, nudia kanuyi nukuta to.

²⁷ “Kadi padi makenga onsu aa kaayi anutekesha, nuenu nubenga amu kubenga mua kungitaba,

²⁸ meme nennufikile munda, nnuluisha. Nemvudije dikenga dienu tshiakabidi misangu muanda mutekete.

²⁹ Nenudie munyinyi wa bana benu banudi balela.

³⁰ Pandi nnufikila munda, nennyangakaje miaba inudi nulambuila mvidie yenu milambu. Nengupule bilambuilu bienu bia manananshi. Nententakaje bitalu bienu pa mpingu yenu imvua mutshibule.

³¹ Nembutule bimenga bienu, ne miaba yenu ya tshijila, bienza bipela. Dipembu dia bintu binudi nungoshila kadiakunsankisha kabidi to.

³² Nennyangakaje ditunga dienu bikole. Nansha baluishi benu bine bapinganamu, nebakeme be.

³³ Nennuluishe, nnutangalaje mu matunga makuabu. Ditunga dienu nedishale tshipela, bimenga bienu bionsu nebibutuke.

³⁴ “Nenku bidimu bionsu binudi mu bupika mu ditunga dia baluishi benu, ditunga dienu dinuvua bashiye nedipete dikisha, bilondeshile bungi bua bikondu binuvua kanuyi bikishisha buloba.

³⁵ Eyowa, buloba nebuikishe bua bukumbaje bungi bua bikondu bimuma kanuyi babuikishishe, diba dinuvua basombamu.

³⁶ “Kadi bena Izrayele bikale bashale ne muoyi mu ditunga dia baluishi babu, nembakuatshishe bowa bua bungi. Nebanyeme too ne mutoyi wa dibeji dia mutshi dinyungisha kudi lupepela, bu mudi muntu unyema mvita. Nebende badishinda, kakuyi muntu udi ubipata.

³⁷ Nebadinyemene benda basakilangane, bu badi banyema mvita, kadi kakuyi muntu Udi ubipata. Nebapange bukole bua kuluangana mvita.

³⁸ Ku ndekelu nebafuile mu tshimuangi. Matunga menyi a baluishi babu awu neababutule.

³⁹ Bena Izrayele bakese bikale bashale ne muoyi mu matunga a baluishi babu, nebabutuke bua mibi yabu ne ya bankambua babu.

Mvidi Mukulu neavuluke ndondu wende

⁴⁰ “Kadi badi bashala ne muoyi abu, nebashishe kujadika muvuabu bangenzele bibi bitambe, ne mudibu, bobu ne bankambua babu, bantombokela.

⁴¹ Nebajadike ne: meme ke uvua mubanyoke, mubafile kudi baluishi babu. Nanku nebatonde bubi buabu, nebitabe manyoka onsu andi mubatumine.

⁴² Pashishe, nenkuluke ndondu wanyi, umvua mutue ne bankambua babu aba: Abrahame, Izake ne Yakobe. Nemvuluke kabidi malu onsu amvua mubalaye bua ditunga diabu.

⁴³ Kadi bena Izrayele bamane kumuangala mu ditunga, miaba ivuabu badime ayi neyipete dikisha. Mu tshikondu tshidi maloba awu mu dikisha, bena Izrayele nebapete dinyoka, bualu mbabenge meyi anyi ne mikenji yanyi.

⁴⁴ Kadi matuku adibu mu tshimuangi awu, tshiena mbalekela amu kashidi to, tshiena mbabutula. Kabidi, tshiena nnyangakaja ndondu wanyi to, bualu meme ndi Maweja-Nangila, Mvidi MuKulu wabu.

⁴⁵ Nemvuluke ndondu umvua mutue ne bankambua babu, pamvua mubapatule mu ditunga dia Ejipitu, bisamba bionsu bitangile, bua meme kubapandisha ne kuikala Mvidi Mukulu wabu. Ndi Maweja-Nangila.”

⁴⁶ Nanku ebi ke mikenji ne meyi ne malongesha, bivua Maweja-Nangila mumanyishe Moshe pa mukuna wa Sinayi bua ambile bena Izrayele.